《再見了，還會再見嗎？》: 第69章 – 選好了

當晚返到屋企，我好似平時咁沖涼食飯，然後就返咗入房。
 
但係我冇同媽媽講話今日喺學校派卷嘅事，所以佢都冇特別問啲咩。
 
直到媽媽行入我間房掃地，先見到我枱面有張選科表。
 
「乜你要選科喇，啱啱唔同我哋講嘅？」媽媽拎住張選科表問我。
 
媽媽個語氣又冇好惡嘅，只係見到張嘢先好奇問一問我啫。
 




「上次咪已經傾過囉，咁我諗住都冇咩特別啦，個成績又同平時差唔多咁」我回應。
 
「咩呀，你上次唔係話差一科未諗好㗎咩？」
 
我諗一諗之後回應。
 
「哦，我諗我應該會揀Bio，好似都係啲科學嘢啱我多啲」
 
「咁好啦，我都唔阻你休息喇」
 




估唔到一兩句說話就可以打發咗媽媽走，仲以為要傾成個幾兩個鐘添。
 
過咗一陣，突然電話響起，原來係阿盈打俾我。
 
「衰人，自己放學都算，仲要成晚都唔揾我！！」
 
阿盈一打嚟就講呢句，搞到我都有啲不知所措。
 
「Sorry……」
 




「傻仔，冇嬲你喇。想打嚟問下你啲科點揀咋～」
 
又係同媽媽同一個問題，好煩呀，點解個個都講呢樣嘢。
 
「我應該會揀E班呀，啫係M2嗰班。跟住咪Phy Chem Bio囉～」我將呢個已經答過無數次嘅答案機械式咁講出嚟。
 
「喂呀，我打嚟係想問下你會唔會同我一齊揀地理呀，反正你又唔係咁想揀Bio，然後Geog成績又唔差」阿盈嘗試說服我。
 
呢科我又冇諗過喎……
 
「都唔係唔得嘅，可以試下」
 
「唔好勉強呀，我都係提議下咋，你冇興趣可以唔使理我㗎」
 
「唔係，只係我冇諗過會咁樣揀啫，兩個理科配一個文科」




 
跟住阿盈就成功說服咗我同佢揀同一科。
 
可能你哋會心諗，邊有咁易說服到理科人揀文科呀？？？
 
嗱，咁我又覺得唔係嘅～
 
本身我就對Bio冇乜興趣啦，所以其實自己都唔係好想揀，但只係出於佢都係理科，先想1 Set三件咁揀齊佢，費事諗咁多啫。
 
如果除咗Bio之外，成績好嘅科就有地理同世史我係覺得比較有趣嘅。
 
不過，我一聽到歷史呢個字，就硬係覺得好悶，而且好似同自己大纜都扯唔埋。
 
相反，地理就好似仲有啲可能。
 




因為自己本身都對大自然嗰啲嘢有啲興趣，咩樹林啊，火山啊，呢啲我都有興趣嘅。
 
「係喎，我有冇話你知我哋會揀咩班呀？」阿盈問我。
 
你冇講我點會知啫……
 
「冇啊，不過你地應該都唔會入數學嗰2班㗎啦？」
 
「唔係啊，阿天同Simon應該會同你一樣揀E班讀M2，然後小雲話唔想讀M1/M2所以入C班，淨低嘅我哋都會去D班讀M1」
 
我聽完嘅第一個反應…… 唔係掛，我有冇聽錯……
 
「真係估唔到喎…… 你哋又會一齊去讀M1嘅……」我驚訝地回應。
 
「係咪唔俾先，我哋數學都未差到咁啫～」




 
「唔係咁嘅意思……我只係嚇親啫……」
 
「Ahhhhh……好開心啊，你竟然肯陪我去揀同一科～」
 
阿盈講完之後補多句。
 
「好啦，唔阻你休息喇，過兩日家長日見啦～」
 
同阿盈收線後，我行咗去書枱前坐低，將份form填好埋佢，準備喺家長日嗰陣交返學校。
 
填完張嘢我又攤返上床，個腦一路喺到諗：
 
「唔知下年大家唔同咗班會點呢？」
 




「唔知仲有冇機會傾偈呢？」
 
「唔知我同阿盈仲會keep到幾耐呢？」
 
唉，都係唔好諗咁多，呢啲嘢都係順其自然啦。