《再見了，還會再見嗎？》: 第68章 – 初中的最後抉擇

要嚟嘅始終都會嚟，終於到咗派卷嘅日子。
 
老實講我又真係唔太驚會考得唔好嘅，話晒都已成定局。
 
唔通我而家驚完又會改變咗個分數咩，講到尾咪又係喺到自己嚇自己。
 
「兩日冇見，有冇掛住我啊～～」阿盈一入班房就行咗過嚟揾我。
 
就算冇掛住都扮有啦，想死咩……
 




「點會冇，不知幾掛住你」我講完之後瞇起成塊臉向住阿盈。
 
「算你啦！」阿盈一邊講一邊meet我塊臉。
 
「乜晨早流流又見到你兩個喺到痴纏呀」阿天拖住雯雯一齊行入課室。
 
「點都好過你哋啦，仲好意思話我哋喎」阿盈回應。
 
「點啊，坐住咗我個位，肯讓返俾我未？」啱啱入課室嘅Simon問，而企喺佢隔離嘅係小雲。
 




睇到小雲同Simon一齊都好似好開心咁嘅樣，睇嚟我擔心Simon嘅嘢都係有啲多餘。
 
「俾囉俾囉，坐一陣都唔得，真係孤寒……」阿盈回應完就行返去自己個位。
 
跟住嘅時間，其他同學都陸陸續續返咗嚟課室，大家俾出嚟嘅感覺好似比前兩日嘅佢哋多咗一份認真。
 
大家唔好誤會呀，我講嘅認真唔係佢哋個個都死老竇咁嘅樣，只係會傾多咗啲學業上嘅嘢啫。
 
過咗冇耐，班主任Miss Wong就拎住一大疊嘢入咗嚟。
 




Miss Wong：「相信大家都知我哋中三嘅派卷方式就有少少唔同嘅，會係由班主任將所有嘅試卷派晒俾大家先。然後覺得有問題或者改錯嘅位，就要喺今日內去揾返嗰科嘅老師改分數……」
 
其實我都唔明點解會咁古怪，可能係因為學校想留啲時間俾我哋決定揀咩科掛，所以先至唔分幾日去派卷。
 
望住手上嘅卷，啲分數都係意料之內，睇嚟都唔會揀唔到自己想要嘅科㗎喇，應該安全嘅。
 
「睇到你個樣同個表情，就知你應該考得唔差啦」Anson擰轉頭同我講。
 
「都係嘅，你呢，考成點呀？」我問返佢。
 
「我冇咩特別啦，都係同平時差唔多」
 
「你睇下嗰邊，佢哋有啲睇完個成績就伏咗喺枱面，睇嚟唔多掂喎……」Anson細細聲同我講。
 
唉，其實我覺得只要係真係夠勤力嘅，要拎個合格都唔係冇可能。




 
不過，就真係要好有決心囉，仲要唔係臨考前一個月先勤力，真係要長期浸下浸下咁累積返嚟。
 
可惜啦，我科中文到而家都係冇乜心機放時間落去。
 
不過呢啲嘢就係咁，成績愈差就愈冇動力去温，愈唔温就成績愈差，結果就變咗個惡性循環。
 
Miss Wong：「大家集中返嚟外面先。而家放喺我枱面嘅呢，係你哋每一科嘅分紙。你哋一陣出到嚟就每疊拎一張，然後再喺Choco張枱拎埋張揀科嘅Preference表。我就唔嗌名喇，而家你哋順住班號出嚟拎啦。」
 
又到咗呢啲好似行刑咁嘅排隊，每次望住都會覺得好唔舒服。
 
雖然唔係好鍾意呢種行刑式排隊，但係都冇得揀啦，唔通唔出去咩。
 
其實呢一張張嘅分紙都冇咩好睇，只係列晒我哋每一科嘅平時分同考試嘅分數出嚟，依然對我哋嘅揀科都係冇乜幫助，因為我哋都係唔知我哋嘅全級總排名係點。
 




都係今晚返去再認真諗下先再填張嘢啦。
 
喺我執緊嘢準備走嘅時候，Anson擰轉頭好似有嘢想同我講咁。
 
「一唔一齊放學啊？反正我哋都係同一條路」Anson問我。
 
「一齊啦，我行得㗎喇～」我回應。
 
行到出黑板前面，阿盈叫一叫停我。
 
「車仔，你放學喇？」阿盈問。
 
「係呀，我啱啱應承咗同Anson一齊走」
 
「嗯，咁好啦，我一陣都自己返去」阿盈帶點失望地回應。




 
「咁我哋行先喇，Byebye～」