《再見了，還會再見嗎？》: 第47章 – 意料之外

「你係住喺呢到附近㗎？」行去搭車嘅途中我問小雲。

「係啊，我出世開始就已經住喺到」

我：「唔會覺得好唔方便，想搬返出市區咩？」

小雲：「唔會啊，其實好多嘢都係習慣咗就冇乜嘢，刻意去改變而家嘅情況，反而愈得唔到想要嘅結果。而一啲冇期望過會出現嘅情境就反而喺身邊發生緊，根本避無可避」

小雲好似有啲語帶雙關，但我又唔知佢暗示緊咩。





唔關要啦，有個渠道俾佢宣洩下情緒都係好事嚟嘅。

我：「你係咪有心事呀，可以話俾我知喎」

小雲：「唉，連你呢個傻仔都聽得出我有心事」

傻仔…… 呢個稱呼好似都冇喺小雲把口聽過。

小雲：「咁我就鍾意咗個男仔，都好耐㗎喇，亦都有試過同佢表白，不過佢都不為所動。之後我識咗一個好朋友，佢亦鍾意咗呢個男仔，都同佢表咗白」





個男仔就好啦，咁多人同佢表白。

我：「乜你兩個鍾意埋同一個人㗎」

小雲：「我個好朋友唔知我都鍾意嗰個男仔㗎」

我：「咁所以你個好朋友表白成功咗？」

小雲：「冇，個男仔都係冇回應佢」





有咁多女仔同佢表白都唔應承…… 

雖然我都冇應承人哋表白，不過我得一個人同我表白咋。

小雲：「原本呢啲事都冇乜嘢，但前排有個人喺呢個時候同我表白，令我想放棄原本鍾意嗰個」

我：「有人同你表白就應承啦，仲等咩喎」

小雲：「我始終都係想等嗰個男仔回應我，或者我好朋友先。我都等咗咁耐，唔差在呢少少時間啦」

我：「咁你都啱嘅，希望佢會快啲回應你哋是但一個啦」

話時話，小雲都令我醒返起我仲未回應阿盈。

睇嚟要趁呢排諗清楚，喺考試前要俾個答覆佢先得。





過咗幾分鐘，小雲心情好似平復返，然後一轉話題。

「係呢，你同頭先嗰個女仔好熟㗎？啱啱放學嗰陣見佢喺課室門口等你嘅？」

「我係同佢一齊跟陳sir做義工嗰陣識㗎，後尾仲發現原來佢都係合唱團」我回應。
 
「有冇諗住同人哋再熟啲啊？人哋都幾靚女丫」
 
做咩突然會咁問嘅…… 唔通小雲知我上過佢屋企？
 
「Er…… 冇啊，佢有鍾意嘅人㗎喇」
 
「我夠有鍾意嘅人啦，可能佢都係鍾意你呢〜」小雲講笑咁講。
 




「點會喎，我知佢鍾意邊個㗎。佢今日嚟我哋班房就係為咗睇佢鍾意嗰個咋，唔通真係嚟接我放學咩……」
 
「估唔到你喺自己班以外都有咁熟嘅朋友，連人哋鍾意邊個你都知」
 
「睇嚟喺呢一個學期，你同我都變咗好多」小雲若有所思。
 
「乜我，都有變咗好多咩？」我皺起眉頭疑惑地問。
 
「你自己就緊係唔覺啦，我由你中一開始就一直喺你隔離，你有咩改變我點會唔知」
 
乜真係咩？
 
「而家幾點啊？」小雲無啦啦問我。
 
我望一望手錶。




 
「6點8囉，做咩啊？」
 
「冇啊，下架小巴要搭9先有，坐喺嗰到等啦，我送埋你上車先返去」小雲指一指站旁一排膠櫈。
 
「講返啱啱件事先，明明我都一直喺你隔離㗎喎，但係我又唔覺你有咩改變嘅？」我問返小雲。
 
「咁係因為你太蠢啫，有時知少啲嘢都係好事嚟。起碼……可以少啲麻煩」
 
麻煩？？？
 
「其實我哋都係俾呢個新嘅環境改變咗。開始有啲懷念以前靜靜地得我同你兩個温書嘅日子」小雲繼續講。
 
「而家就好似你啱啱講咁，由個鄉村搬咗出市區生活。雖然日子係開心嘅，但只係遇到嘅挑戰同意外發生嘅事有啲多，令到個人有啲攰，感覺好似好漫長」
 




「遲啲放聖誕假休息多啲啦，好快就會習慣㗎喇」我對小雲講。
 
「嗯，有車喇，聽日見啦」
 
「Byebye〜」
 
俾小雲講一講，我都有啲掛住以前嘅日子。
 
可惜，過去嘅事係不可逆轉。