《再見了，還會再見嗎？》: 第46章 – 天才表演（下）
「你哋啱啱係咪見咗黃姑娘喇？」陳sir一入到嚟就問我哋。
「係啊，佢叫我哋喺到等一陣」Lily回應。
「咁我哋等下先啦」
過咗冇耐，黃姑娘就出返嚟。
黃姑娘：「你哋準備好未㗎？我入面set好嘢㗎喇」
陳sir：「我諗佢哋ok㗎喇，Parco你去先得唔得」
Parco：「哦，好呀」
Parco終於開聲講嘢，差啲以為佢今日啞咗。
「咁車仔同Lily你兩個去另一邊準備下先啦」陳sir對我哋2個講。
「死啦，有啲緊張添」一邊行我一邊同Lily講。
「又唔係比賽，驚咩啫。衰咗咪衰咗，啲老人家睇得開心咪得囉」
「更何況你又唔係未比過賽，嗰咪仲緊張啦」
Lily又講得冇錯嘅……
「我去換返套衫先〜 一陣你彈前奏叫我出嚟啦」
又換衫。
我呑一呑口水。
唔得，都係專心做嘢先。
Parco喺呢個時候已經行返入嚟，睇嚟順利表演完。
「到你喇」
跟住我都行咗出去。
觀眾大約係十幾個，但個個都面無表情，睇嚟啱啱都幾唔掂。
「Hello 公公婆婆，啱啱睇得開唔開心呢？」我拎住支咪問佢哋。
「好悶啊，都唔知佢講緊啲咩」
「係囉，而家啲後生連笑話都唔識講，仲要口窒窒」
睇嚟係一致負評，咁我要做好啲先得。
「頭先唔開心唔緊要，我特登練咗幾首你哋後生嗰陣嘅流行曲嚟彈俾你哋聽，包你哋鍾意嘅！！」
「後生仔，你係咪真係得㗎」有個婆婆質疑我。
「點會唔得，識唱記得一齊唱添呀〜」
老實講，呢啲歌我真係舊到聽都冇聽過。
我最老聽過嗰啲年代嘅歌都係，咩夜機啊，靜夜的單簧管啊，呢類喺我出世前十年內嘅歌㗎咋。
不過咁講，以前啲歌嘅pattern都少啲同簡單啲，所以要練根本就冇乜難度。
我一邊彈嘅時候都聽到有啲公公婆婆跟住嚟唱，又幫手打晒拍子咁，睇嚟大家都幾享受。
完咗自己嗰部分，我換上Lily俾我嘅琴譜，開始彈第一首歌嘅前奏。
估唔到Lily換上咗一套背心芭蕾舞衣，唔講仲以為係底衫嚟。
套衫完全突顯晒佢嘅身材……
明明我同佢都係同年，點解佢好似發育得咁良好，但我就只係得嗰一米六幾生唔高咁㗎呢……
雖然眼前嘅畫面非常吸引啊，但係我再唔專心彈就會好肉酸㗎喇。
我認真咁彈埋淨低嘅歌，途中都有偷望下啲公公婆婆嘅反應。
佢哋都好似睇得幾開心幾陶醉。
咁當然我都有偷望下Lily，
咁動人嘅舞姿啦……
彈完最後粒音，我行過去拖住Lily，向前面嘅所有人鞠個躬。
佢哋亦都拍手掌回應返我哋，然後我哋兩個就行出咗間房。
「咸濕仔，拖夠未，仲要十字緊扣」Lily將我同佢十字緊扣嘅手拎高到我臉前講。
我二話不說即刻放手fing甩佢。
Lily：「仲以為你想學埋啲老土方法，嗰啲咩拖住唔放手，然後順便表白添」
我：「你成日都咁樣玩人，鬼有人會鍾意你咩，你都傻傻地」
Lily：「不知幾多人鍾意我，係我想有個好嘅初戀先唔應承佢哋咋〜」
我：「吹少陣水啦你，換完衫快啲出嚟幫手喇」
Lily：「哼〜」
我行出去join返Parco，揾咗個公公同佢捉象棋吹下水。
我：「係呢，公公你有冇孫仔㗎？」
公公：「有啊，佢叫阿風，不過好少返嚟探我」
我：「點解嘅？」
公公：「我個孫仔佢去咗外國讀書呀，都過咗去好一段時間。嗰陣我記得好似佢係就快要考會考，但老豆老母覺得佢考唔好，所以索性送佢去外國」
會唔會我遲啲都係咁呢，咁嫲嫲咪好慘囉……
我對公公點頭，表示我有認真聽緊。
公公：「過咗兩三年，佢哋全家仲移民咗過去，所以得返我自己一個住喺祖屋」
我：「你自己一個人住唔悶咩？」
公公：「悶，所以平日去社區會堂呢到識下人同捉下棋囉」
我：「咁都好呀，有人陪下你傾偈，好過一個人咁無聊嘛」
之後我再揾咗幾個公公婆婆傾偈，聽佢哋分享自己嘅故事。
即使呢啲事唔係話好特別，又唔會令人傷人欲絕，亦唔係咩驚天動地嘅事。
但每個老人家喺講故事嘅時候都流露住真實嘅情感，都係發自內心嘅感受，所以特別引人入勝。
傾下傾下好快就天黑，我亦都準備要離開。
突然，有把熟悉嘅聲音喺附近傳出。
「家姐，呢啲嘢係咪都要執埋㗎？」
「係啊，執埋呢到我哋就返屋企食飯啦」黃姑娘回應。
望一望過去，果然係小雲。
佢咁啱都抬起咗頭，因而同我相目交投，然後一邊行過嚟一邊講。
「車仔？點解你會喺到嘅？？」小雲驚訝地問。
「我今日早走咪就係嚟幫學校做義工囉……」
呢個時候，Lily都行咗出嚟問，
「車仔，你行得未㗎，差你咋」
「你今日就係嚟同佢做義工？？」小雲疑惑地問。
呢頭小雲熟路，我要走應該唔難啫。
所以我決定回應咗Lily先，因為費事要陳sir等我咁耐。
「你幫我同陳sir講我自己走啦，我唔跟車喇」
然後我再回應返小雲，
「我同陳sir佢哋一齊嚟啊……」
我坐低將所有嘅事簡單地同小雲講清楚。
「原來係咁……」小雲聽完都係有啲迷惘。
「係呢，我想問我而家要點走……」
「我帶你行去搭小巴啦」小雲笑一笑。
「家姐！！我去送埋車仔搭小巴先返去呀，一陣你走先啦」
「車仔？？」小雲家姐行咗出嚟。
「幸會幸會，原來你就係車仔。啱啱表演得好好睇呀，好彩今日有你哋咋」
應該係我講…… 原來你就係小雲家姐。
「邊係呢……」我尷尬地掃一掃自己個頭。
「有機會下次再傾啦，再見喇〜」
乜我哋真係會再見咩……