《再見了，還會再見嗎？》: 第20章 – 我一直都在（下）

〜以下為小雲視角〜

〜11月中某日〜

唔知點解，我一返到學校就覺得今日會有啲事發生，硬係周身唔聚財咁。

而最特別嘅係嗰班人竟然今日冇搞過車仔，所以我決定喺班房留多一陣先走。

「砰！砰！」





Locker嗰邊突然傳嚟兩聲巨響。

我企起身望到嘅，係瞓咗喺地下嘅車仔。

「Choco，快啲幫手叫老師過嚟啦，今次真係搞出人命喇！！」我緊張地說。

「得得得，我即刻跑去，你唔好衝過去俾人打呀」

Choco一支箭咁跑咗出去外面。





當我再望返過去，個肥仔已經雙手舉起咗個locker門。

「停手呀！！！」我一邊大叫一邊跑過去。

「砰！」

個locker門直接打中咗車仔個頭。

喺打中嗰刻，我啲眼淚開始流出嚟。





我冇理佢哋直接跑去攬住車仔。

「車仔，應下我啦！！」我一邊喊一邊講。

佢冇回應……

「仆街，佢唔醒喎，快啲走啦」男的說。

我冇阻住佢哋離開，反而坐咗喺地下將車仔個頭放上我大脾。

淚水一直滴落車仔塊臉，一直冇停過。

陳sir喺呢個時候同Choco一齊衝咗入嚟，

「我揹張轟浩落醫療室先，你幫佢執埋啲嘢之後都落埋嚟」





Choco行咗過嚟。

「你冇俾佢哋打嘛？」Choco擔心地問。

「我冇……但係車仔俾佢地……打到……」我喊到講唔到嗰幾個字出口。

「嗯，我見到，佢會冇事㗎」Choco攬住我講。

「我哋執好嘢就落去睇佢啦，好冇？」

「嗯」

我幫車仔執好嘢就伏咗喺佢枱面，諗返啱啱發生嘅事。





「一係你拎佢啲嘢落去先啦，你啲嘢我一陣拎落嚟俾你」

「嗯，唔該」

一路行落去嘅時候，我好怕以後再冇機會見到佢。

好怕佢會好似爸爸咁，突然離開我。

可能係我諗得太悲觀，但我真係真係唔想再經歷多次重要嘅人離開我。

入到醫療室，見到陳sir坐喺旁邊陪住車仔。

「你嚟就啱喇，幫我睇住張轟浩先，我要去打俾佢媽媽」

「唔好打俾佢媽媽啊，佢媽媽返去會鬧死佢㗎。陳sir，你打去揾佢爸爸啦」我立即開聲阻止。





「Um……都得嘅。咁你幫我睇住佢先啦，我一陣再返嚟同你了解件事」

我坐喺佢旁邊捉住佢隻手。

陳sir過咗一陣就返嚟，我即刻放開捉住車仔嘅手。

「哈哈，其實你照捉住佢都冇所謂，我唔介意呢啲嘢」陳sir對我講。

話晒都係訓導主任，點知會唔會秋後算帳，更何況俾佢講一講搞到我都好尷尬。

「唔使喇。我係咪要講成件事俾你聽？」我問陳sir。

「當然啦，你講出嚟係幫緊佢」





「咁我要由平時發生嘅事開始講起，咁上年……」我逐一將嗰班人針對車仔嘅起因同經過講晒俾陳sir知。

Choco喺中途都有嚟過，但係佢要趕住補習，所以擺低我個袋就好快走咗。

「原來發生過啲咁嘅事，呢樣係我哋學校嘅問題，我會諗方法解決。另外你啱啱好似話佢同媽媽嘅關係唔係幾好？」陳sir再問。

「係啊，佢媽媽……」

「睇嚟張同學平日都受緊好大壓力。你幫我叫佢聽朝嚟揾一揾我，我而家去處理埋啲首尾先，有咩事即刻嚟教員室揾我」

「唔使送車仔去醫院檢查下？」我問陳sir。

「我有喺電話勸過佢爸爸幾次，但佢爸爸好堅決話唔使送，所以我只好尊重佢意見。佢爸爸淨係話如果7點都仲未醒先再通知佢。」

「吓，咁都得㗎咩。」我無奈地說。

「有咩緊要嘢記得第一時間去話我知，我去搞埋啲嘢先」

淨低嘅時間我一直坐喺車仔旁邊，先發覺原來我好耐冇認真望過佢。

同幾個月前嘅佢相比，好似少咗一份稚氣。

「呢幾個月一定過得好辛苦喇」我掃一掃佢個頭。

唔經唔覺就已經6點幾，

「唉，仲未醒，唔好有事啊」

唔得喇，坐得太耐真係好辛苦，要離開下呢間房。

我圍住學校行咗一個圈，途中不斷有寒風吹過嚟，愈吹反而愈令我更加清醒。

我開始怪責自己，竟然喺佢最需要人陪嘅呢段時間離開咗佢，冇好好保護佢。

又哭了。

一直喊，直到淚水都唔識再流。

「要快啲返去睇下車仔喇」我對自己講。

我再次返到嗰間房，見到一個坐咗起身嘅男仔。

「車仔！！」我感動到大叫咗出嚟。

仲要一衝入去就攬住佢。

「你知唔知你擔心死我喇！！」我一邊講一邊喊。

「吓，我冇事喎……」

「你咁樣都話冇事，頭先叫極你都唔醒呀……」我無奈地說。

「話我知咩事啦，求下你」

講唔講好呢……

「我坐咗喺你隔離2個幾……」我尷尬地說。

「Ahhh……都係唔講喇，唔講喇，唔想再提啊！！走啦我哋，我幫你執好嘢㗎喇〜」