《再見了，還會再見嗎？》: 第19章 – 我一直都在（上）

〜以下為小雲視角〜

「媽媽，我返嚟喇〜」

「今日辛唔辛苦啊？你入房休息下先啦，一陣食飯我再叫你啦」媽媽回應我。

一入到房我就攤咗上床。

「唉，你鍾意同佢食就食晒5日啦，我唔會阻你哋」我回想起今日講過嘅嘢。





唉，我今日係咪過份咗呢，竟然對車仔講埋啲咁嘅侮氣說話。

我冇諗過我竟然會開口話佢，但亦冇勇氣再去主動同佢講返嘢。 

「點解呢班要有Zoe喺到，我唔甘心咩都輸俾佢呀！！」我大叫。

過咗5秒，我房門打開咗。

係家姐。





「靜啲啦，我喺隔離做緊嘢㗎」

「唔好嘈喇，出嚟食飯啦〜」媽媽叫我哋兩個。

食完飯我就返咗房，攞咗本weekly planner出嚟。

「原來仲有一個月就考試，睇嚟我都要開始温下書喇。」我自言自語。

由呢日開始，我每日一放學就會去學校圖書館温習。





除咗係為温書，更係想避開車仔。

雖然我好蠢，去開口話個鍾意嘅人，但我都未至於蠢到留喺課室阻住佢同Zoe兩個人。

〜某日放學後〜

「點解冇咗本數學書嘅？」

我喺圖書館將成個書包嘅嘢倒晒出嚟。

「唔係漏咗喺課室嘛……」

我唯有死死地氣行返課室攞啦。

喺課室窗口望入去，我見到車仔同Zoe好似玩得好埋。再望真啲，原來佢哋仲share同一個耳機用。





睇嚟之前所有嘢都只係我一廂情願，做咗咁耐電燈膽阻住佢哋。

呢一刻我好嬲，但都好自責。

我嬲Zoe，我嬲佢嘅出現令我同車仔嘅關係變成咁。

我嬲自己，嬲自己冇能力控制自己。明明一早已經同車仔熟咗，但又自己破壞咗擁有嘅關係。

今日車仔竟然主動行過嚟揾我，但我一諗起佢同Zoe喺班房嘅情境，就冇辦法面對佢。 

Choco：「小雲，佢過緊嚟喎」

我：「我唔想留喺到，陪我落去食啲嘢丫」

買完嘢食，我哋喺操場坐低咗。

Choco：「其實你做咩要避佢啫，好好地同佢傾下咪冇事囉」

我：「點傾啫，佢都同咗Zoe一齊」

Choco：「唔好亂咁諗啦，佢哋一齊温書咋嘛。人哋都主動嚟揾你啦，你都仲要避人」

我：「算啦，我唔想阻住佢哋。佢想同邊個熟都唔輪到我干涉啦，我又唔係佢邊個」

Choco：「好啦好啦，你話點就點」

「曾看著同星空 閒聊吹風 看日出多……」

九點半都仲有人打嚟嘅……





原來係Choco。

我：「喂，咁夜打俾我做咩呀？」

Choco：「你個車仔今日一放學就坐咗喺你個位啊，仲話要等你返嚟，之後我真係頂唔順就鬧走咗佢。」

我：「你做咩鬧佢喎！！」

Choco：「你睇下你幾緊張〜仲講到冇所謂咁」

Choco：「我叫佢唔好再成日煩住你咋，冇鬧佢成日揾Zoe呀」

我：「邊個敢蝦佢我一定唔會放過啲人！！」





Choco：「我都想有人對我咁好啊……我瞓喇，聽日學校見啦〜」

〜新學年第一日〜

「隔咗成個暑假，唔知車仔點呢〜」我問Choco。

「你一陣返去咪知囉，問我我點知喎，我淨係知Zoe調咗班咋。」

「你點知㗎？」我追問。

「我有同佢練跑㗎嘛，但當然同你熟啲啦」

原來Zoe已經走咗。

唉，如果我今年都仲係唔得就冇得怪其他人喇。

一入到班房就已經望到自己一個坐嘅車仔。

唔知係咪太耐冇見，成日都想望下佢。

但估唔到隔咗兩個月再返嚟，嗰班人都仲係煩住車仔，仲要比以前更煩。

係真係煩咗好多好多。

今日同Choco食完嘢返到去，見到車仔啲嘢俾班人倒晒落地下。

我望到嘅第一個反應係即刻幫佢執返晒地嘅嘢。

「啲嘢又唔係你嘅，唔好執啦」Choco叫我。

「啲嘢車仔㗎，你都幫下我啦！！」

「唉，怕咗你喇，執啦執啦」

將地下嘅嘢執好之後，我將所有嘢放返去車仔個位。

希望個傻仔唔會知有人搞過佢啲嘢啦。

如是者過咗三日，Choco都開始習慣每日食完飯返嚟第一樣做嘅嘢，就係幫車仔執嘢。

〜第四日〜

Choco：「日日都係咁，班友好無聊呀。而家好似變咗係騷擾緊我，唔係張轟浩」

我：「你當係幫我啦，兩個人一齊都係執幾分鐘啫」

Choco：「日日咁執法我哋執得幾多次，佢一陣自己返嚟搞咪得囉」

我：「咁我哋食完嘢返嚟又冇嘢做，你咪當幫下我囉」

Choco：「唉，佢點對你啊，你仲對佢咁好」

車仔：「Errr……唔該晒你哋啊」

一聽到車仔把聲，嚇到我心都離一離，即刻拉埋Choco一齊走。

我：「點解佢今日會咁早返嚟㗎，嚇死我咩」

Choco：「咁咪幾好，而家佢自己知喇。其實你為佢做咁多嘢真係一啲都唔值得，佢唔會珍惜㗎」

我：「但係我唔想放棄呀……」

Choco：「咁你咪直接開口同佢講做返朋友囉，話極都唔聽」

小雲：「嗯，我再諗下啦……」

喺跟住嘅日子，我都冇再幫車仔執過嘢。

不過我成日都會跟喺佢附近，因為真係好驚佢會有咩事，希望佢冇發現我啦。

每日眼見佢俾人淋水，但我乜都做唔到嘅感覺真係好難受。

呢日我一直跟住佢，佢竟然行咗去E班班房門口。

「原來佢仲係鍾意Zoe，唉」

車仔企咗喺門口望下望下又唔敢入去，做咩呢？

過咗2分鐘，車仔就行後樓梯走咗。

「又會咁奇怪，企喺外面又唔入去」我自言自語。

於是我扮做咁啱路過E班門口偷望入去，

原來Zoe同緊嗰個Simon一齊喺入面，唔怪得車仔唔入去啦。

「仲有機會㗎，唔好放棄啊」我自己鼓勵自己。

「嘩，小雲姐，做咩嚟我哋班咁錯蕩啊？」

一拎轉頭，係阿天。

「嚟睇下你考慮成點囉〜」

「我實得㗎，做你Christmas嗰個比賽伴奏咋嘛。我原本就係坐喺嗰個司琴位，只係幫你彈多一首歌啫。」

「我反而擔心你入唔入到決賽咋，條友鍾意埋啲歌手嘅歌咁難唱」阿天指住我講。

「你少擔心，我而家連鈴聲都改埋，日聽夜聽一定會入到圍」我雙手抱胸自信地說。

「咁你過到初賽再話我知你揀邊首啦，練習就遲啲再約」

「到時見〜」