［已出實體書］《香港殘響》-荃灣倖存者基地: 50

令人窒息的影片繼續播放……
 
在這個血腥修羅場，最特別的是，龍頭老大天哥與其手下簡爺的傷勢。
 
在倒臥的關公像處，年邁的天哥整條右手臂被扯斷，全身上下行刑式插滿廿多支黑色殭屍指甲，人被牢牢釘在牆上。
 
旁邊的簡爺情況一模一樣。
 
「 佢兩個得罪咗啲咩人…… 好似畀人報復咁？」天佑說出自己的想法。
 




「 醒啦！佢哋醒啦！」
 
旁邊傳來興奮的聲線，是半跪在地的女隊員聲音。
 
阿拔率先清醒過來，「 救命…救命呀！ 係新品種嘅殭！！救我！救我！」神態狂亂。
 
「阿拔…你放心！你而家好安全架！」
 
阿拔緊抓住女同伴的衣領：「 你係邊個！你係邊個！？」
 




「我係阿翠，你唔認得我？咁你……」
 
一波未平，一波又起。
 
碰！
 
旁邊的古仔發狂打了駱隊長一拳。
 
「死仔，你咁重手！」駱隊長臉頰中拳， 不禁有些嬲怒。
 




古仔仍然滿頭汗的亂舞手腳， 將身邊的急救用品都踢開了。
 
「 喂！你記唔記得自己係邊個呀！」駱隊長嘗試用雙手控制他但不成功。
 
「 老虎……老虎嘅斑紋 ……獨眼！ 成班人完全傷唔到佢！血腥大屠殺！」
 
「 你再亂喐我就要打暈你啦！」
 
「 放開我！放開我！」
 
古仔掙脫控制，狂亂的跑了起來！
 
跑出商場範圍，衝到在連接另一商場的天橋處， 打算跳下去！
 
駱隊長與另一女隊員像箭一般衝出，「喂！發記！ 拉住佢！」




 
可惜還是晚了一步。
 
發記攔不住古仔。
 
砰。
 
人類墮樓的聲音。
 
影片的焦點轉為在地，拍片者的手在震。
 
天佑倒抽一口涼氣，「 點解……點解會咁㗎…」
 
一個自殺，一個瘋了。
 




天佑覺得天旋地轉，他望向商場的另一個方向，另一邊天橋的位置。
 
突然，他見到什麼似的……嚇得跌坐在地上。
 
「咩、 依隻係咩野黎！？」
 
遠處站著一隻高壯的白色怪物。
 
鏡頭重新對焦： 華都商場玻璃門外，佇立著一隻兩米高的白毛殭屍。
 
似人……但感覺更像是一隻野獸，白猩猩。
 
由於全身都是白毛，看不出其性別……只見它灰黑的雙手低垂著，一雙大犬齒外露， 雖然是野獸狀，但卻有著一雙睿智的眼睛。
 
它正在默默觀察著這個修羅場的情況。




 
雖然沒有想傷人咬人的行動， 但它每分每秒都在散發著殺氣。
 
天佑 的舌頭幾乎打結：「佢、佢企咗喺度幾耐！？呢種感覺……好強大的壓迫感……呢種級數，同其他殭屍明顯唔一樣。」
 
影片驟然結束。
 
阿力一直睜大眼睛看著那白毛獸殭，似是相當震撼，但嘴角卻又有一絲微微的笑意。
 
我吞了吞口水，望向蕙，「 咁最後……？」
 
「佢冇事…… 駱sir佢哋雖然手上有精良裝備，但當刻無人夠膽同依隻白毛獸殭開戰， 最後佢哋成班人喺商場嘅另一邊離開。」
 
「咁阿拔…？」
 




「後來情況變穩定，正常返。」
 
我撫摸著下巴，「咁睇黎依單野，好大機會係嗰隻虎殭做嘅。」
 
善兒猶有餘悸：「 但係、但係佢點解要咁做…？正常殭屍係會不斷咬人 去增加同伴，但係黑社會嗰度係無一個人被咬……」
 
「只有純粹嘅殺戮、虐待。」陳景。 
 
阿朗神情凝重，「嗰隻唔郁嘅白毛殭都好可疑，好與眾不同…… 莫非係佢嘅同伴？」
 
……
 
當時我沒有說出自己內心的想法。
 
根據我的戰鬥直覺——它與它，絕非同一級數。
 
那種眼神、殺氣、 壓迫感。
 
這白毛殭， 感覺上比虎殭還要強上數倍。
 
而且，它身上還有一種獨特的……
 
遠古氣息。
 
⊕
 
一天後的晚上，雖然我傷勢還未完全康復， 但我急不及待要找他了。
 
高層單位外。
 
我按了一下門鈴。
 
門打開了一半， 門後是戴著無框眼鏡與醫院口罩，穿著鬆厚衣服的楊醫生，他正以完好的左手拉著門。
 
病懨懨的眼神……因為他穿著厚大衣， 所以我看不清其右手的狀況。
 
「 楊醫生，唔好意思，你病左我仲要打攪你，但我想知……」
 
「 未完成。」楊醫生聲調如冰，「我知你想問咩，但未完成。」
 
「咁……」
 
可能因為重感冒，醫生的聲音有點沙啞，「 喺我同小方嘅努力下，解毒疫苗嘅研發進度已經完成咗一大半 ，宜家final stage要喺你妹妹嘅血液幹細胞同個隻少女黑甲嘅細胞方面做啲測試，要觀察、要等待……總之未有咁快可以有完成品。」
 
「ok... 麻煩曬你哋， 我都係心急想問下……」
 
「就咁，我要休息。」
 
當我張開口，還想問另一問題的時候……
 
木門已經砰的一聲關上了。