《伙記唔該落單》: 第三十九章「一波又起」

呢一日，鋪頭嘅氣氛變得好沉寂，連平時最多嘢講嘅子彈都靜起嚟。

「伙記！唔該落單。」

「食咩。」搞到我都冇咩心情。

「蝦肉雲吞麵，凍檸茶。」

「嗯。」落完單之後，我挨住收銀，望住隔離嗰張圓枱。





原來不經不覺，喺呢度都做咗差唔多一年。

由初初咩都唔識，做到而加熟能生巧，喺呢度識到嫻姐、雄哥，仲有子彈呢個好兄弟。

最重要，係識到沛霖。

係隆發救咗我呢個死飛仔，係嫻姐俾機會我繼續靠自己對手生存落去。

冇隆發，就冇沛霖，就冇而加嘅杰少。





「唉。」

係咪真係要同呢度講再見。

去到夜晚八點，我都夠鐘收工，同子彈佢哋道別之後，我一個人去咗沛霖屋企樓下。

「沛霖，冇咗隆發，我哋仲會唔會再見。」我點起咗枝煙，望住沛霖嘅屋企，諗返起好多嘢。

「由初初因為爭吵而相識，去到化解誤會成為朋友，再到親如戀人嘅甜蜜階段。」





「去到而加，大家又變返陌路人一樣。」

「所有嘢，係咪都要完喇。」

我拎起電話，望住沛霖嘅名，猶豫咗好耐，猶豫應唔應該打俾佢，叫佢落嚟，同佢坦白一切，然後講清楚自己嘅心意。

「好掛住你會上嚟我屋企氹婆婆，好掛住你喺我身邊吵吵鬧鬧，我真係好掛住你。」

「沛霖。」

諗咗一陣，我決定打俾沛霖，叫佢落嚟，同佢講清楚自己嘅心意。

「嘟...嘟嘟...嘟...嘟嘟...」

「喂...？」





「喂？沛霖？」

「杰仔....？咳...咳...搵我有事...？」

「係..係呀...你仲未好返？」

「咳咳...未呀...咳...可能溫書溫得太夜...咳咳..身體差咗好多...」

「咁呀...都係冇嘢喇...」本來想叫沛霖落嚟，但而加天寒地凍，夜媽媽叫佢落嚟好似唔太好，而且就嚟考dse，都係唔阻佢溫書。

「哦...咳...杰仔...你最近幾好嗎？」沛霖把聲好沙，應該病得好嚴重。

「我好好呀，冇事，你自己照顧自己呀。」





「嗯....咳咳..我要溫書喇...遲啲再講啦...」

「好啦，拜拜。」

結果，我都係冇機會講出口。

本身仲想同沛霖講，隆發就嚟執，睇下佢可唔可以再嚟食多最後一次。

不過佢而加身體咁差，都係唔好同佢講好啲，於是我就返咗屋企，沖完涼就瞓咗教。

第二日，我朝早返完學之後，就返咗去開工。

「嫻姐、雄哥。」我微笑起嚟。

「杰少。」嫻姐都笑咗笑。





「點呀，最後幾日見我喇喎。」子彈行過嚟搭住咗我。

「真係好，唔洗見到你。」

「屌你...」

其實我好唔捨得你，子彈。

冇你，我諗我而加都仲係一個庸庸碌碌嘅人。

「唔該...兩位。」突然，門口傳一把熟悉嘅聲音。

「敏..敏怡？」仲有嘉瑩。





「入嚟坐....」我有啲呆濟咁望住佢哋，因為佢兩個好耐都冇嚟過食嘢。

「hi...好耐冇見...」敏怡對我同子彈揮揮手，嘉瑩就同我哋點咗個頭。

佢哋坐低下咗，但感覺同以前有少少唔同，不過我又講唔出係咩唔同。

「食啲咩？」

「兩個A餐。」

「好..呃係呢，沛霖...佢唔嚟嘅？」我一路寫單，一路問佢哋。

「沛霖佢唔太舒服...所以...冇嚟到。」嘉瑩同敏怡對望咗眼，就答我。

「哦...」

「我同嘉瑩知道呢度就嚟執...所以諗住嚟食多最後一次。」原來係咁，唔知沛霖會唔會喺呢度執之前再嚟一次。

佢哋啲嘢食嚟到之後，我就挨咗喺收銀，諗住同佢哋傾下偈，話曬都叫做一場相識。

「你哋最近..幾好嗎？」

「都係咁囉..溫書溫得好辛苦呀..」敏怡扁一扁嘴咁話。

「哦..咁你哋有冇話想讀咩..」

「我哋三個都想讀Creative media呀。」嘉瑩微微笑住答我。

「沛霖都係？」

「嗯！係呀。」

「咁你哋有冇信心入到？」

「都叫有嘅哈哈，我哋三個不嬲成績都唔差，但係沛霖數學就渣啲囉！」敏怡托住下巴咁講。

「但係上次數學卷，佢成績無啦啦進步咗好多...唔知做咩嚟。」嘉瑩皺起眉頭咁話。

梗係，有我教佢做數呀嘛。

「伙記！」

「唔講喇，我做嘢先。」