《伙記唔該落單》: 第三十八章「一波未平」

琴日同子彈喺華明兩個打廿個都唔洗死，仲確認到沛霖係安全嘅，我就放心曬。

琴晚同子彈分別之後，我返咗屋企自己洗傷口同埋包紮，唔洗去醫院嘅都盡量唔去，費事俾啲護士問長問短。

「早晨。」抖咗晚，我見冇咩大礙，就如常返工。

「喂杰少，唔洗抖多日咩。」子彈都返咗嚟。

「唔洗啦，皮外傷啫。」





「你冇事就得啦，哈哈。」

好彩有恆爺救駕，唔係嘅話晨早出咗事。

做到午市嘅時候，我又見到幾個似曾相識嘅人喺鋪頭出面行嚟行去。

「西裝友？之前好似見過佢哋。」

「究竟佢哋嚟搞乜，又唔係食嘢。」





於是我就去問子彈，知唔知班西裝友咩料。

「子彈，嗰幾個人你識唔識？」我指住門口嗰幾個人問。

「嗯...唔識喎，但好似見過呢幾個人。」

「我都見過，唔知搞乜。」

子彈望咗佢哋一陣，又繼續做嘢。





「由佢啦，做嘢先。」

「都係。」

去到晏晝三點幾冇乜客嘅時候，嫻姐無啦啦叫咗我同子彈出鋪頭門口，話有嘢同我哋講。

我同子彈對望咗一眼，就跟住嫻姐出咗去。

「子彈...杰少。」嫻姐好似怪怪哋咁。

「係咪有咩事？」子彈問。

「嫻姐我...下星期就唔做呢度喇...」嫻姐嘆一嘆氣，然後皺起眉頭。

「唔做？係咪退休享清福喇！」子彈笑笑口咁問。





「放心啦！有我同子彈喺度，加埋雄哥，會幫你睇住間鋪嘅。」我搭住咗嫻姐。

嫻姐搖一搖頭，好似想講啲嘢，但又冇講到，有口難言咁樣。

我同子彈開始有啲驚，對望咗眼之後，子彈就問嫻姐。

「究竟發生咩事？」

「隆發...」

















「要執喇。」

「下！？」我同子彈第一時間就係呢個反應。

「唔係掛？好哋哋點解要執？」我問。

「係囉，生意不嬲唔錯架。」子彈都和應。





嫻姐苦笑起嚟，然後抬起頭望住我同子彈。

「其實早幾個月，領匯已經開始加我租，加咗兩成，嫻姐勉強捱到兩個月，但而加真係做唔到喇...」

「所..所以午市啲餐飲先由三蚊加到五蚊..？」我突然醒起原來已經有少少跡象。

「係...你兩個為鋪頭仆心仆命，我唔想扣你哋人工..所以先喺喺餐飲加價，盡量吊住間鋪...不過嫻姐捱唔住喇...」

「真係做唔到落去...？」我問。

嫻姐無奈地搖搖頭。

我嘆一嘆氣，之後抬起頭望子彈，發現佢好似諗緊啲嘢。





「有咩諗法？」

「我喺度諗，唔通，頭先嗰幾個西裝友係地產公司啲人？」子彈望一望我。

「應該都係...我早兩個月已經見過佢哋一次。」我有啲無奈咁講。

「嗯...所以嫻姐我喺度通知你哋一聲...等你哋呢個禮拜可以準備下...」嫻姐有啲沮喪咁同我哋講。

我同子彈喺呢個時候唔知可以講咩，唯有拍一拍嫻姐，安慰下佢。

「寫嘢呀伙記！」

「嚟啦，返入去做嘢喇。」嫻姐勉勉強強擠咗個笑容出嚟，就返咗入去。

我知道呢一刻最痛苦嘅一定係嫻姐，隆發係嫻姐一手一腳建立出嚟，而加突然要執笠，佢肯定好唔開心。

「仆街。」我用力打咗下門口塊玻璃。

「喂唔好咁啦，冇人控制到。」

「唉！不過喺度做咗咁多年，都有啲唔捨得。」子彈苦笑起嚟。

「最慘呢！係冇得再見嗰幾條𡃁妹lu...」子彈講完呢句，就返咗入去做嘢。

係喎，如果隆發執咗。

我同沛霖，仲會唔會再見？