《伙記唔該落單》: 第三十一章「單純的快樂」
「好幼稚呀你。」
沛霖可能估唔到一個mk仔居然會做埋啲咁白痴嘅行為。
「氹你開心呀嘛，鬼叫你咁易嬲咩。」
「我易嬲！？」
「拿拿拿，仲話唔係？」
沛霖俾我講到面紅耳熱，哼咗聲就繼續行。
佢話想去踩單車，我見而加五點幾，就同佢入大尾篤租咗兩部單車，踩完食個飯就收得工。
「你識唔識踩單車？」沛霖問。
「識，以前成日踩住架子彈仔周圍飛。」
諗返起以前同班飛仔開行個喇叭，播住頭搖又尾擺，喺上水踩嚟踩去嗰段日子，都幾懷念。
「咩係子彈仔呀？」沛霖似乎唔識呢個名詞。
於是我就用電話搵咗幅圖俾佢睇。
「哦！呢啲就係子彈仔呀？」沛霖好似恍然大悟咁樣望住我部電話。
「係呀，不過諗返起都覺得嗰陣好柒。」
「原來你以前就咁mk。」沛霖笑一笑咁話。
「邊個人中學未mk過。」我摸住佢頭，摷一摷佢啲頭髮。
「喂呀！我個頭亂曬喇！」
沛霖細細粒，矮我一個頭有多，摸起上嚟真係好鬼死得意，哈哈。
傾下傾下就去到大尾篤，我俾咗一百蚊租咗兩部單車，我哋就沿住Edu嗰條路開始踩。
「那些年錯過的大雨！！那些年錯過的愛情！！」
「好想擁抱你！！擁抱錯過的勇氣！！」
踩到一半忍唔住唱咗兩嘴。
「你有咩愛情錯過咗呀？」沛霖笑笑口咁問。
「挑，唱下歌啫。」
「你唱歌，都幾好聽呀。」呢條女成撚日讚我，搞到有少少自high。
好似未聽過沛霖唱歌，唔知佢唱歌好唔好聽。
「你又唱下囉。」
「嗯？想聽呀你？」沛霖本來望住前面，點知突然對住我回眸一笑，忍耐力差少少都真係俾佢電撚死。
「未聽過你唱歌嘛。」
「好呀。」
「你同我去唱k，我就唱俾你聽。」
「......」屌你老味。
踩到六點幾，本來準備調頭返去還車，點知。
「喂...條鍊...鬆咗嘅..？」沛霖踩踩下停低咗，然後我同佢就一齊落車，檢查下佢架單車有咩問題。
搞完一輪，佢架車都係踩唔到。
「仆街，睇嚟你要推住架車行返去。」
誰不知沛霖用一個無辜嘅眼神望住我。
屌，佢未出聲已經知佢想點。
「好好好！我載你返去，咁得未？」真係冇佢辦法。
「yeah！但係..架車點算呀？」沛霖問。
「呃...返到去同租車啲人講聲應該得掛。」
「嗯！都得！」
於是沛霖就坐咗上嚟，然後垂低雙腳，將塊面貼住我背脊咁樣攬住我。
唔知係咪太耐冇試過車女女，個心突然跳得好快。
好耐都未試過有呢種感覺。
好簡單嘅快樂。
好青春。
或者人大咗，就算再去模仿其他人，都搵唔返嗰種著住中學校服，同一個女仔開開心心咁笑嘅感覺。
「唉！」我對住個天嘆咗口氣。
「做咩嘆氣呀你。」沛霖喺後面問。
「冇呀，覺得而加咁樣，好青春。」
「超，明明你都係廿一歲，扮咩老。」
「你唔明架喇。」
有啲嘢，原來真係返唔到轉頭。
還完車，我哋就返粉嶺食飯。
「對唔住呀嘻嘻，搞到你要俾多五百蚊。」
「算啦，五舊水當豪俾佢。」
如果係第二個女仔，我諗我會叫佢行去拎部車返嚟。
「想食咩呀。」我問沛霖。
「我要食壽司！好耐冇食喇...」
「好呀，元氣定爭鮮？」
「爭鮮，不過係買上去你屋企食。」
沛霖究竟係咪對我屋企有咩情意結，成日都想上嚟。
我哋買咗一盒三文魚壽司，同埋幾盒嗰啲乜卷物卷，之後就返咗華心。
「點解你咁鍾意上嚟我屋企。」我一路食一路問沛霖。
「嗯...可能有少少掛住婆婆。」
佢咁樣講一講，搞到我又諗返起。
沛霖見我個樣怪怪地，就望住我話。
「對唔住呀..係咪搞到你唔開心呀...」
「哦唔係，冇事。」我搖搖頭。
其實就算沛霖唔講，我每晚一個人喺屋企對住四面牆，都會諗起婆婆。
食完嘢，我又去咗廁所食煙。
「咳..咳...喂呀你又食煙！」沛霖喺廳大叫。
隔住道門都聞到架咩，有冇咁臭。
我出返廳，見到沛霖嬲爆爆咁坐喺梳化。
「你應承過我架喎！」
「咩呀...」
「你話過我喺度嘅，你唔會食煙架。」
有咩？諗諗下又好似有咁講過。
「sorrysorry，冇下次。」
沛霖嘆咗口氣，之後突然捉住咗我隻手。
「杰仔呀，其實你有冇諗過戒煙。」沛霖好認真咁望住我，搞到我有少少唔好意思。
「呃..唔係冇嘅..不過食咗咁多年...」
「好難話戒就戒..」我擰轉面，唔敢同沛霖有眼神接觸。
沛霖靜咗幾秒。
「咁，就當係你為咗我戒，得唔得。」沛霖皺起眉頭，眼仔碌碌咁望住我。
「試下..試下。」
其實我知唔得，不過費事佢傷心就敷衍住先。
「嗯，咁就乖喇。」
我哋睇咗陣電視，沛霖就話差唔多要返屋企。
「咳..真係好大浸煙味...我要走喇！上次同敏怡佢哋飲完酒，俾我爸爸鬧咗成晚，而加唔可以太夜返屋企。」
「哦...好。」
於是我就送咗佢落樓。
「你記得聽晚約咗我架可！」沛霖微微笑住問。
「記得，梗係記得。」
「咁你收工我就嚟搵你啦！」
「拜拜！」講完拜拜沛霖就轉身準備走。
「喂..！」
「嗯？」
「你..你返去..小心啲...」
「放心啦！我咁大個女，會睇住自己。」沛霖對我笑咗笑。
之後沛霖就走咗。
我返到上去，坐咗喺梳化。
「仆街喇今次。」
「唔係沉船掛。」