《伙記唔該落單》: 第三十章「心跳回憶」
食完早餐之後，沛霖去咗洗碗，我就坐咗喺廁所一路爆石一路食煙。
「嘶........啊......好爽。」
而加呢種感覺，就好似啲老夫老妻嘅生活咁，原來都幾過癮。
「咳咳！咁臭嘅喂！」沛霖喺廁所門口大叫。
「我食緊煙呀𡃁妹。」
「真係激死人！」食枝煙啫，洗唔洗咁呀。
我出返去之後，就見到沛霖扁曬嘴咁坐喺梳化，於是我就過去撩下佢。
「做咩呀你。」我坐咗喺佢隔離。
「你呀，平時都喺屋企食煙架？」沛霖塊面脹卜卜咁望住我問。
「以前唔會嘅，不過而加得返我一條友住，咪喺屋企食囉。」
「咩一條友呀，而加我唔係人呀？」沛霖突然捉住我條頸猛咁搖。
「得得得！你係人！你係人！」我即刻舉手投降，沛霖先鬆開手。
「哼，我唔理呀，總之以後我喺度嘅話，你唔準食煙呀，知唔知道。」
講到自己會成日上嚟咁，睇下點。
「你話事囉。」我聳聳膊頭，就攤住咗。
「喂你做咩呀。」因為沛霖坐咗喺梳化，所以我對腳擺咗上沛霖大脾。
「瞓教囉.......」
「你又話陪我...」沛霖即係扯咗我起身。
「okok！！陪你陪你。」
真係冇佢乎，就睇下佢想去邊。
「咁你而加想做咩呀。」我望一望個鐘，而加先十點幾，我諗呢條女冇八、九點都唔會肯走。
「嗯...去睇戲！」而加啲後生有冇咁鍾意睇戲。
搞到我又諗返起學校個肥婆，真係弱智。
「都得，睇咩？」
「呃..我未諗喎...嘻嘻...」
屌，未諗又叫我去睇戲。
於是我就提議咗套戲。
「睇嗰套咩一吻定情囉。」
「下？你鍾意睇呢啲戲架？」
戇鳩，我係喺巴士見到呢套嘢嘅廣告，好似幾啱啲妹妹仔睇咁啫。
「唔係，不過可能你會鍾意睇。」
於是我就帶咗沛霖去粉嶺嘉禾戲院。
「坐呢度？」我指住個mon問。
「唔制，坐嗰行。」
好，你話事。
「食爆谷？」我拎咗張五十蚊出嚟。
「唔制，食熱狗。」
好，你係大佬嚟。
「嗚..嗚...好慘呀....」沛霖睇到個女主搬屋之後，挨咗落我個膊頭喊。
「以後唔知仲有冇得見...嗚嗚...」
拍戲啫，現實會唔會有咁多情侶真係要成日分隔兩地呀。
我遞咗張紙巾俾沛霖，點知佢唔拎。
「做咩唔拎。」
沛霖突然扁嘴，然後望住我。
「你幫我抹。」
我真係屌出聲，仲多要求過鋪頭啲客。
不過佢鍾意嘅，就滿足下佢啦。
我唯有死死地氣幫佢擦眼淚，唔知係咩原因，突然想整蠱下沛霖，於是我就用張紙巾係咁捽佢隻耳。
「舒服嗎小姐。」
「喂呀！！哈哈！好痕呀！！」
「收聲啦，仲細咩。」點知隔離條肥婆睥撚住咗我哋。
「....」我同沛霖互相望住對方，笑咗一笑。
睇完戲，沛霖話想食下午茶，我就帶咗佢去上水嗰間潮興旺。
「呢間好好食架？我未食過...」
「幾好食嘅，我以前出嚟...」等等。
雖然沛霖琴晚都聽到我同銘仔啲對話，但都係唔係咁適合兜口兜面講。
「你以前咩呀？」沛霖一臉天真咁望住我。
「我話...以前讀中學，放lunch嗰陣成日出嚟呢間嘢食。」
呼，好彩。
「哦...你以前喺上水讀中學架？」
「唔係..唔係呀...我讀馬耀才..」
「哦，即係我學校隔離....」
「下！但..你lunchtime夠時間出嚟食？」
「........」好似有啲誇張。
「夠！梗係夠啦！哈哈..」
仆街，點解我要講大話，越講越離譜。
食完下午茶，沛霖又話想去上水廣場行街。
不過而加上水冇五六年前咁靜，大陸人多撚到仆街，隔幾步就俾個喼碌一碌隻腳。
有個大陸佬仲戇鳩，㩒住部土豪金iphone唔睇路，兜嘢撞咗落沛霖度。
「呀！」
「堆bu恥！堆bu恥！」
「我屌你老味，睇路啦仆街。」我嬲嬲地，唔小心屌咗個大陸佬一鑊。
「喂...算啦....」沛霖拉住咗我，叫我唔好嬲。
「咁係呀嘛，唔撚睇路嘅屌...」
沛霖突然笑咗笑，我就問佢笑咩。
「你笑咩。」
「冇喎～」
冇？你當呀叔眼殘定弱智。
「頭先你鬧個大陸人個樣都幾型仔，嘻嘻。」
「......」搞到我打咗下冷震。
沛霖話想睇電腦，想買一部準備入u用，於是我就同佢去咗百老匯。
「呢部靚唔靚？」沛霖指住一部黑蚊蚊嘅notebook問我。
「幾靚呀。」起碼好睇過我嗰部老爺機先。
「咁嗰部呢？」沛霖又指住另一部。
「幾靚呀。」其實我唔係好識睇。
「你有冇認真睇架！」沛霖雙手抱胸，嬲爆爆咁望住我。
「有...！梗係有啦...！」
我好似激嬲咗佢，不過我真係唔識分邊部靚。
「.......」
「你嬲呀？」我問沛霖。
「冇喎。」沛霖擰轉面，然後翹住手。
我笑咗笑，然後喺褲袋拎咗包紙巾出嚟。
我拎咗一張紙巾出嚟，叫沛霖望住我。
「你睇下。」
「咩呀。」
「我變朵花俾你睇。」
果然，沛霖個樣變返正常，仲有啲期待。
我用手係咁鍊張紙巾，然後即刻學歐陽震華咁，擺咗兩隻手喺塊面隔離。
「登櫈！」
「.....噗。」
「笑返咪好囉。」
「咁幼稚架你....」
「橋唔怕舊，你笑返就夠。」
點解我識呢招？因為以前同雪寧一齊嗰陣，佢唔開心嘅時候，我都係咁氹佢，萬試萬靈。