《伙記唔該落單》: 第二十章「疑慮」

早兩日沛霖上嚟之後，好似有少少放低咗對女仔嘅戒心，可能係見到佢同婆婆有講有笑，又幫我做assignment，覺得始終有個女人喺屋企好啲。

不過，我都係未準備好脫離單身。

「喂，你見點呀。」

「喺屋企抖咗兩日，好返好多。」

子彈話佢個傷已經冇咩事，我都放心啲。





但係我都想知道究竟嗰個龍哥有咩目的，所以諗住一陣出去食煙嘅時候，同子彈斟斟。

「唔該！有冇三位呀！」

「入嚟啦。」

沛霖佢哋依舊係坐喺張收銀隔離張圓枱。

而加見到沛霖，有種莫名奇妙嘅感覺，好似一個識咗好耐嘅老友咁，大家都冇特別打招呼。





「唔該寫嘢！」敏怡揮揮手叫我。

「點呀，三位今日想食咩。」

「喂喂喂，做咩佢好似唔同咗咁嘅？」敏怡伸咗個頭埋去沛霖耳邊。

「係囉我都覺...你做咗啲咩嚟...」嘉瑩偷望咗我一眼。

「哎..冇呀冇呀你哋諗多咗喇！」沛霖笑住話。





我唯有扮睇唔到，哈哈。

「落單未呀靚女們。」我叉住腰講。

「呀唔好意思...我哋要三個A餐！飲..咦？凍飲加咗價嘅？」敏怡望住menu咁問。

最近跟餐凍飲由三蚊加到五蚊，嫻姐話租金又加咗，生意難做喎，又唔想扣我哋人工，唯有喺嘢飲到加價。

「咁呀..我哋唔洗飲嘢喇！」敏怡搖搖頭。

「唉得啦，我請你哋飲，飲咩呀。」

見佢哋都算熟客，一次半次冇所謂啦。

「真架？！喂你轉死性呀？」敏怡拍一拍我。





我就望住沛霖，沛霖都望住咗我。

「嗯...？你哋有古惑喎....」嘉瑩托住頭話。

「我哋要三杯凍檸水！」沛霖話。

我笑咗笑就冇理到佢哋，繼續做嘢。

呢種感覺，好似好耐都冇試過出現。

「你哋有啲嘢咁喎...」子彈搭住我講。

「你有傷就慳返啖氣暖肚啦。」





「頂你個衰仔。」

過咗陣冇咁多嘢做，我又去咗收銀挨下，順便聽下班女講乜。

「頭先嗰個師姐都講得幾好呀可？」沛霖問。

「嗯...我聽到有少少想喊...」

「係有啲可惜囉！」

佢哋講緊咩，點解我聽唔明。

「埋單！」佢哋食到咁上下就起身走人。

「一百二十。」





「唔洗同人哋goodbye kiss？」敏怡奸笑住問沛霖。

搞到沛霖有啲面紅，然後佢哋望咗我一眼就走咗，真係奇奇怪怪。

「唔該，有冇一位呀？」

門口企咗個好生面口嘅女人，未見過佢。

「有，嗰度坐呀。」我指咗張枱俾佢。

佢坐低咗一陣，就叫嘢食。

「唔該，寫嘢。」





「食啲咩。」

「我要...呀唔好意思....」

「喂？洛仔？食咗飯未呀？哦...媽咪而加喺樓下食緊嘢呀，一陣買麥當勞俾你食好唔好？嗯咁好啦！」

「唔好意思呀，我要個A餐飲可樂。」

「好。」

做到五點幾，我就同子彈出咗去食煙。

「喂話時話。」

「嗯？」

「究竟嗰個龍哥為乜要跣我哋，你又話佢對你好好，又救咗你一命。」

子彈靜咗幾秒，之後就話。

「我都唔知。」

「佢一日唔再蒲頭，我哋一日都唔會知佢有咩意圖，我都冇咩頭緒。」

突然，我又諗到啲嘢。

「可唔可以講下以前你同龍哥啲事？」

「嗯...都好多年前。」

「有次我同幫龍哥帶美金，一落樓就撞到兩個差佬，但係我拎住成袋美金，冇可能俾啲龜逗。」

「所以我即刻掉頭走，但嗰兩條差佬即刻發現我有唔妥，就追咗過嚟。」

「好彩龍哥打電話俾我，叫我即刻掉咗袋美金去附近垃圾桶，我先走得甩。」

「但之後我哋再去搵，就搵唔到。」

「嗰度值幾多錢？」

「五十個。」

嘩，都幾多。

「唔係龍哥及時打電話嚟，我諗我坐緊赤柱。」

「原來係咁...」

「唉唔理咁多啦，總之而加冇事就得。」子彈拍一拍我。

「都係嘅。」