《伙記唔該落單》: 第十章「紙條」

龍哥張紙仔我唔得閒睇住，因為要準備開始午市，所以就擺咗喺褲袋先。

「頭先龍哥同你講咩？」子彈問。

「冇呀佢問我係咪杰少，我咪話係。」

子彈點點頭，就繼續做嘢。

至於張紙仔寫咩，都係一陣出去食煙再睇，龍哥選擇俾我而唔係俾子彈，證明張紙嘅內容應該唔係咁簡單。





「三位呀唔該。」又係呢把聲？

「入嚟坐啦。」係沛霖佢哋。

「杰仔。」沛霖笑一笑咁望住我講。

「大姐，我叫杰少。」

「都係一聲啫～」





跟住佢哋就坐咗喺收銀隔離張圓枱。

我就行開咗。

「又係佢哋喎。」子彈過嚟搭住我講。

「關我叉事。」我望一望沛霖。

「人哋擺明對你有意思啦。」





「你係咪睇電視劇睇壞腦，想像力咁豐富。」

「唉你話係就係～」子彈真係痴線。

呢度附近嚟嚟去去都係嗰幾間食肆，唔係食老麥就係食呢度架啦，諗咁多做乜春。

「杰仔！我哋要寫嘢！」沛霖揮揮手話。

我反咗下白眼，因為佢又叫我杰仔。

「點呀，食咩呀今日。」

「嗯...三個D餐！三杯熱檸水！」

幫佢哋落完單，我就行咗去收銀。





「八十九。」

收完錢之後，見啲客都嗌曬嘢，又未有餐要捧，我就挨喺收銀抖抖。

「杰仔～」沛霖托著下巴，眼甘甘咁望實我。

「咩料呀又。」

「做咩咁惡啫...」佢擺出一副無辜嘅樣話。

我好惡咩？

「佢都係想同你傾下偈啫！」敏怡話。





「唔好咁冷淡啦！」嘉瑩都出聲。

頭先又好似真係惡得濟。

「咁...對..對唔住...」我望住電視講。

我道咗歉，始終佢哋都係女仔。

何況而加沛霖都冇咩特別，我都無謂咁串。

「算你啦！」沛霖笑笑口咁話。

做咩搞到我好似我係佢條仔咁樣。

真係痴撚線。





半個鐘之後，佢哋就埋單。

「我走喇！」沛霖同我講。

我點點頭，就冇理到佢，然而我再睇一睇佢哋張單，發現咗背面有啲數字。

呢個時候子彈行咗埋嚟，問我做咩。

「你自己睇。」我反咗下白眼。

「93...唔係電話號碼嚟掛？」

「屌你話呢，唔通係銀行戶口密碼呀？」





「你個衰仔，執到啦，我都想有女主動寫電話俾我呀........嚟！」

我冇記低佢個號碼，就咁擺咗張單喺櫃桶。

之後都繼續做嘢。

做到五點幾冇咁忙，我就出咗去食煙。

「嘶.......呼.......」

呀係，差啲唔記得咗龍哥張紙仔。

睇下佢寫乜先。

三日後
晚上八時
華明球場
杰和進
幫忙

「乜鳩...」

「喂！食煙又唔叫我！」

我俾子彈嚇咗嚇，搞到跌咗張紙仔。

「咩嚟架。」子彈執咗嚟睇。

子彈睇完之後，呆咗。

「龍哥佢...唔通想叫..我哋做嘢？」

「唔撚係掛，我唔識佢喎，如果真係叫嘅點解要叫埋我。」我望住子彈講。

「唔理喇，照去。」子彈好堅定咁話。

「你...認真？」

冇撈偏咁耐，而加出返去做嘢？

唔係玩鳩呀叔掛。

「我要報答返龍哥嘅救命之恩。」

「你鍾意啦，但係我唔去。」

「下？你唔係賣甩我咁衰仔呀嘛，張紙都有你名架喎。」

「有寫就要去咩...」

「就當係幫下你兄弟我。」子彈搭住我講。

屌，你都講到咁，仲有得托手㬹咩。

「唉是但，總之我唔做犯法嘢。」

「得啦你見唔對路就走，咁好未。」

我聳一聳膊頭，就入返去做嘢。