[喪屍][人性?][政治?]在喪屍橫行的年代裏，我只想做一個人: 44 運氣 下
「……權叔……你嘅意見係？」一陣沉默後，呀禮首先發言。這情景有點像中文口試的小組討論……這種想法實在滑稽，但我可是半點也笑不出來。
「其實……」權叔搔一搔頭，乾燥的頭髮看來就似一根根鐵線，「我係認同喺迫不得已嘅情況下，食人都係可以理解……但我要強調嘅係，真係迫不得已嘅情況之下先可以咁做……但喺我角度，我哋並未去到咁樣嘅絕境，我認為我哋仲有其他方法。」
「吓……」sam不解的搖搖頭，「而家都未算係絕境？」
「我哋而家仲有氣有力討論殺人嘅事，都已經證明到我哋並未虛弱到瀕死嘅邊緣……我哋仲有大把方法喎，例如用無線電求救，等多幾日，甚至食自己嘅肉，再去同個女仔求情等等。根本仲有好多方法，唔洗去到食人呢個地步。」
「呼……」sam換了坐姿，仰天長長吐了口氣，才道：「你以為……你以為我提出食人之前，冇考慮過其他方法咩？……用無線電求救，要等幾多日先有人嚟都未知，而且出面咁多喪屍，要幾多人先救到我哋？起碼成隊軍隊嚟先有可能……仲有，我冇講到比你哋知，其實之前我已經用無線電發放咗我哋受困嘅消息，要求用直昇機接我哋走……但直到而家仍然係咩聲氣都冇。仲有，你話食自己嘅肉，你覺得咁樣真係可行咩？」
「唔試下又點知唔得？」
「好，咁具體而言，要食幾多，食邊個部位？」
「呃……係咁咦食啲手指腳指，應該夠喇掛？」
Sam冷冷一笑，「你哋伸自己隻手出嚟望下。」
「做咩……」
「望下你就知。」
我不禁鼻頭一酸。雙手不知何時變得如此纖幼，膚色焦黃，皮膚微微起皺——那是因為肌肉分解，皮膚失去彈性所至——十根手指宛如髏骨，指節分明，輕輕接壓，只有骨頭的觸感，沒有半分柔軟。
「只有骨頭。如果你想捱到獲救嗰一日，起碼要食成隻手臂。但，我哋已經嚴重缺水，咁做會大量失血，而且冇麻醉嘅情況之下幾乎一定會暈……你仲想咁做嘅，我唔介意做操刀嗰個。」
權叔沉默。sam淡然道:「嘅然冇其他方法，咁就真係得返食人呢個方法……」
「真係唔等多幾日先？呢幾日天氣好悶氣，分明就係要打風嘅徵兆，到時就會有雨。」
「算啦權叔…… 」sam嘆氣，「再等落去都唔會有咩轉機……就算落雨，咁又點？冇食物遲早都係死。」
「……唔等吓，你又知未來發生嘅事係點？」
「屌，咁如果真係等到就嚟死都未等到咁點呀？」
「咁咪到時先決定係咪真係食人囉！」
「到時？到時我哋都已經虛弱到，想行都行唔到啦。唔好講咩食人，就連可能好似我哋咁樣討論都做唔到呀……仲有，頭先都講過啦，等多幾日，最先頂唔順嘅好可能係白詩婷……咁樣係對佢唔公平呀。」
「……」
「嚟投票啦，」sam深呼吸一下，「……如果贊成食人嘅話，就舉手。」
Sam舉著手這樣說，呀禮低頭思索了一會，也緩緩舉起了手……最後是我。畢竟這也是無可奈何的事啊，如果有其他辦法的話，我也不想這樣……
「權叔？呀嵐？……白詩婷？」我們三人舉著手，像個笨蛋似的，目光在另外三人的臉上來回移動，渴求著他們的和應。但見三人低著頭，恍似對我們的投票不理不睬。
「屌，咁即係點呀！」sam重重放下了手，低聲咒罵著，「你哋都好清楚啦，除咗食人之外已經冇哂任何方法喇，可唔可以合作少少呀？」
權叔沉聲反駁：「嗰個只係你嘅個人想法……唔好迫人認同你嗰套呀。」
「我屌！」sam扔掉不知何時找到的，藏在手上的骰子，怒吼道：「事實擺撚明響面前，而家係冇任何退路呀！你哋要餓死唔關我事，但唔該唔好拉埋我落水！」
「你哋同意嘅……可以自己圍內決定要食邊個呀，使乜理我哋點諗？」
Sam反倒是無話可說。
這也正常。假如只有我們三人參加，那麼每人被抽中的機會便上升至33.3%，實在不「划算」。即使把白詩婷計算在內，被抽中的機率也達25%。況且，雖然白詩婷說由我們決定，但我們可不知道在這種雙方相持不下的情況下，她的意見是怎樣……如果執意要她加入我們的抽籤，看來權叔和杜嵐也不會贊成。
「…….駱輝。」
「嗯？」
「你真係……你真係同意要殺人？」
聽到她忽然這樣問，我一愣，才道：「……我……我只不過係認為，呢個係冇辦法之中嘅辦法。」
「果然……」杜嵐淺淺笑著，「我同你……我同你睇法果然有好大分別呀。」
「你堅持嘅，係所謂嘅基本人權不容許喺任何情況下受到剝削，咁即係話，呢個世界上只有自己對自己嘅身體有擁有權，而呢一項擁有權，即使係全世界人都反對嘅，你擁有呢項權利嘅正當性都係無可置疑嘅，換言之冇任何人可以喺任何情況下侵犯你嘅身體……我咁解釋啱唔啱？」
杜嵐想了想，點一點頭。
「但……假如有個人，佢係自願比人殺死，同埋同意比人食嘅話……咁佢算唔算係徹頭徹尾咁實行緊你所主張嘅思想？」
「……呢個世界根本唔會有啲咁嘅人。」
「呢個世界就係有啲咁嘅人呀。我睇書見到，德國一個男人，喺網上面搵自願被食嘅人……最後真係畀佢搵到。佢哋做完愛之後，想食人嘅男人將獲邀嘅男人嘅陽具切咗落嚟，兩個人就一齊食切咗落嚟嘅陽具，之後被閹割嗰個男人吞咗好多安眠藥又飲咗好多酒，訓咗喺浴缸到失血至死。想食人嘅男人一直睇書睇咗三個鐘，之後將個男人條屍肢解，放響雪櫃……過咗十個月成件事先被揭發，最後佢被判終身監禁。」
「但係呀，無論食人嘅定係被食嘅一方都係自願，咁響你嘅角度嚟講，佢係要無罪釋放先啱呀，係咪？」我緊盯著她。她思索了一會，看了我一眼，又把頭埋進胸前。
權叔白了我一眼：「駱輝，你頭先……會唔會有啲過分？」
「根本唔係呢個問題呀。」我搖頭嘆息，「如果，呀嵐真係堅定不移咁相信佢所主張嘅思想嘅話，咁即使係咁極端嘅事例，佢都應該支持呀。」
「呀嵐，如果覺得講得太咄咄逼人令到你好難堪嘅話，我道歉。但你會覺得難堪，呢個正正係問題所在。況且，嘅然係參加得抽籤嘅話，就算冇正式講出嚟，但應該係願意承擔被食嘅風險……就參加抽籤呢件事，冇人可以迫到你參加，咁樣都係體現咗你所講嘅，自己身體只有自己有擁有權嘅思想呀。」
「……咁如果，」杜嵐低聲嘟嚷，「如果嗰個人又突然反悔，咁要點做呀？」
「就算佢突然反悔都好，契約已經成立，唔由得佢反對。」
「唔由佢反對嘅意思係……謀殺？」
我閉眼點一點頭。
這是我們應該要極力避免的情況，但似乎沒有迴避的方法。
一片沉默。
在我低頭思考時，杜嵐又突然問：「即係你認為……自己生命受到威脅嘅情況下，做咩事都係容許嘅，包括殺人同食人？」
「……冇錯。」
「但你會咁諗嘅時候，人哋都會咁諗呀，咁樣你哋利益衝突嘅時候，應該點樣處理……」
「真係咁嘅話，邊個武力較強就邊個話事。」
「咁做嘅話，成個世界都會變得混亂不堪，人人自私自利。」
「……我哋而家身處嘅世界，正正係一個咁樣嘅世界呀。」
杜嵐低頭思索一會，又道：「駱輝，如果……呢到得返我同你兩個嘅話，是但一個人要死，去令另一個人生存落去，你會點做？」
「咩話……」
我低頭苦苦思索，嘗試幻想如果這樣的情境真的發生，我的反應會是怎樣，但我愈想就愈頭痛，甚至開始懷疑她這樣說，是想報復我剛才對她的舉動。
「……」
雖然這是假設性問題，但如果這種事情真的發生，我應該……
「或者你會覺得好難選擇，但係……」
杜嵐突然無聲無息的來到我面前。
「如果真係有啲咁嘅事發生，我諗我嘅意志會比而家呢刻堅定好多。無論你嘅決定係點都好，無論我最後係餓死或者比你殺死都好，我都唔會傷害你……」她輕輕握著我的手，湊到我耳邊極輕，極輕的說了一句——
「……因為我都鐘意駱輝你呀。」
甚麼？
「對唔住呀，權叔。」
「吓？」
「我決定……決定要抽籤。」
甚麼？
「我覺得……我諗我可能真係太天真。有時為咗生存，可能真係要不擇手段。如果我再堅持我所主張嘅思想，我就好可能因此而死，但係……」她看了我一眼，垂首低聲道：「……我果然……我果然唔想死呀。」
「但係要我哋當中一個犧牲，成為食糧，呢種事實在係……」
「我都唔想面對咁嘅事呀。」杜嵐回到牆角，輕聲說著，「真係好奇怪呀……我一直以嚟，都唔希望再見到有人犧牲，但係……每一個同伴，每一個幫過我嘅人接二連三咁死，我從未試過對現實感到咁無力……甚至，去到而家呢個哋步，竟然要搵一個人嚟犧牲，我簡直覺得我呢十幾日嘅努力完全係白白浪費。」
「我呀……」她說到此處忽然一笑，「我終於明白……過去嘅我實在太天真喇……現實真係好殘酷，我連自己條命都唔可以好好咁保住，仲講咩大道理，我覺得我自己真係好可笑……」
「我諗咗好耐……我冇死嘅勇氣，我只係想生存落去，所以……」
權叔仰天長長嘆了口氣，沈默不語。
見形勢倒向我們這邊，sam乘勝追擊，「權叔，而家連呀嵐都同意，你嘅取態係……？」
「……唔好講得咁簡單呀，參加咗，唔單止係要食人，更有可能會比人食呀。」
「如果我哋全部人都參加，咁樣每個人被抽中嘅機會率就會係大約16.7%。但你可以確保，如果你再等落去，可以走到出去嘅機會率，會起碼高過呢個數字咩？」
權叔環視我們，低頭思索了一會，又抬頭重重嘆了口氣：「……好啦，我都抽籤。」
人類是自私的。
sam高聲道：「好……大家都同意，要抽籤決定……決定邊個要犧牲，係咪？」
沒人答話，僅有一兩人微微點頭。
「呃…….如果你哋係唔同意嘅話，而家退出仲嚟得切呀。」
依舊是沒人答話，但也沒有人退出。
Sam的樣子似乎是胸有成竹，認為他不會是被抽中的一個。
「好，咁樣按照講好嘅方法咁抽籤……」
我們花了不少時間討論抽籤的公平性，如何抽籤才算公平等等。最後我們決定，首先每人擲兩次骰，共計點數最高者先抽，如此類推。然後，之前已經預備好六張啤牌，抽中小丑的人便是犧牲者。
鐵盒，骰子和啤牌事前已經被各人仔細檢查，確保上面沒有任何摺痕，缺角之類，然後放入一個鐵箱中，在眾人監視下在箱中以面向下抽出，直到所有人都已經抽牌，然後一齊翻牌——這是為了防止有人突然棄權退出。
對，一旦參加就不可退出。
經過一輪擲骰後，我是第四個抽籤的人。雖然我明知無論那個順位抽籤，機會率也是一樣，但這種情況下誰也想當先抽的。
諷刺地，先抽的是對生死也沒所謂的白詩婷，然後是呀禮，杜嵐，我，sam，最後是權叔。
抽籤的那一刻，我猶豫了很久要抽那一張，畢竟這關乎性命。反而白詩婷幾乎是想也沒想就抽了，而杜嵐緊閉雙眼，顫抖著的抽了一張。Sam和呀禮和我一樣猶豫了很久，特別是sam，盒中只有兩張牌，他掙扎了很久才決定選那一張。
權叔聳聳肩，把最後的牌拿出。
……現在每人面前都有一張啤牌。
Sam緊緊盯著眼前的牌，呀禮則不斷嘆息。白詩婷背著牆，對抽出的牌不聞不問，她身旁的杜嵐緊閉雙眼，而我身旁權叔抱著手，雖然臉上不露聲色，但喘息聲十分濃重。
雖然已經是黃昏，天氣不算太熱，但我背脊好像在不斷流汗——但隨手一掃，又沒有真的流汗，只有一種像被千萬根針刺的感覺，而這種感覺由背部漫延到胸口，然後是大腿，最後是全身。手臂在輕輕顫抖，舉手細看可以見到上面毛孔放大，雞皮疙瘩……
此刻竟然無人說話。也是，開口說翻牌，等同敲響喪鐘——可怕的是，你不知道這是自己還是別人的鐘聲。
「……揭牌啦，仲等咩呀？」白詩婷冷冷的說道。
sam結結巴巴：「呃…..呃……不如，不如……不如我哋……」
「明明係你提議先，你唔係想反悔下話？」
「我……」
Sam咬牙切齒，握著啤牌邊緣的那隻手正劇烈顫抖，「屌！揭就揭啦，我數一二三，大家一齊開牌！」
「一！」
我不想死……我當然不希望自己手上的是小丑，但這等於我希望小丑在別人手上嗎？
「二！」
我不知道……我不知道。這種時候還在想這些實在夠蠢……正如杜嵐所言，參加這次抽籤代表你有信心自己不會被犧牲！
「三！」
無論如何，我不想死……小丑在誰的手上也好，只要不在我手上就可以了！……
「開牌！」
「呼——」
我先是一呆，然後大大鬆了口氣。
是紅心三。
「怦怦……怦怦……怦怦……」
心跳聲大得好像它正在我耳邊跳動。雖然猶有餘悸，但顯然我的性命是保住了。
那麼……到底是誰要被犧牲呢？
我抬起了頭，發現眾人望向右方，順勢望去，只見那人呆滯的表情，和手上的小丑牌。
……是杜嵐。她抽中了。