[喪屍][人性?][政治?]在喪屍橫行的年代裏，我只想做一個人: 43 運氣 上

「……我唔信！我唔信！有咩可能冇方法呀！」

「但係段錄音的確係咁講，我冇呃你呀……」

「你口口聲聲話有咩錄音，咁嗰段錄音到底喺邊到呀？快啲拎嚟畀我聽下！」

「都話咗，因為部電腦冇電，所以……」

「你講得真係輕鬆，我響呢度等咗半個月有多，唔係為咗聽你一句『冇辦法』呀！況且你根本冇任何證據證明你講嘅嘢係啱！我點知道係咪你哋走投無路先老作話冇方法呀？」





「錄音上面只有提到嗰種病毒嘅本質係咩，但冇提到點樣製作疫苗，同嗰班人身處嘅地方…...入面已經講得好清楚，目前冇任何解藥。」

「夠喇！我唔理你哋咁多，總之我只係想知道點先可以令我個妹回復原狀！你哋一日畀唔到答案畀我，一日都唔好諗住走！」

我們聚在二樓窗前，聽著杜嵐和女孩之間的對話。雖然我們沒有把錄音抄下，但憑各人的記憶也能勉強覆述七八成內容，但當中沒有女孩最想知道的疫苗的製作方法之餘，更明明白白的說變成喪屍的人已經沒救……於是演變成這種狀況。

「我哋早就講過，文件上面唔會講邊到有解藥，點解你就係唔肯面對現實？」

「冇可能！你哋一係同我搵到疫苗嘅製作方法，一係就同我死喺呢度！」





「你……你都曾經係人類，點解可以咁殘忍，見住我哋就死都唔理……？」

女孩咬牙說道，「人類？你會當我哋係人類咩？你哋呀……如果當我係人類嘅話，就唔會對我做啲咁嘅事！……」

「……吓？」

「總之，」女孩甩一甩頭，轉身走回屍群，「你哋渴死係你哋嘅事，我唔會理。」

「我忍夠喇。」sam低聲說了這樣一句，抄起武器，衝到樓下，我們阻止也阻止不了。只見他衝出大門，一手推開杜嵐，下一秒手中鐵筆就快要落到女孩的後腦上——





「嗚呀......」女孩突然彎身避過他的攻擊，然後道上的喪屍上前向sam一抓，sam後退一步，然後喪屍繼續前進。

「你知道嗎，你哋喺樓上講緊嘅嘢，我全部都聽到，所以唔好諗住偷襲我。」

sam一邊抵禦喪屍，一邊後退，我們連忙下去把他拉回屋子，再上鎖。

「屌你老母！放我哋.....放我哋走呀！」

權叔輕拍sam：「慳返啖氣好過啦。」

「我殺出去啦！留喺到只有等死架咋！」

權叔默默地看著他，再緩緩道：「你之前對付一兩隻喪屍應該冇問題，點解頭先要係咁縮？隻手會係咁震？」

Sam沉默不語。權叔黯淡道：「我哋差唔多兩個星期冇食過嘢，餓到連企都企唔穩，衝出去同自殺有咩分別？」





sam深陷眼窩，佈滿血絲的眼睛盯著杜嵐：「如果......如果我哋一早就衝出去，而唔係同佢玩偵探遊戲嘅話......」

「如果唔係佢，我哋早就死咗喇。」我冷冷回道。

「而家咁嘅情況，死又唔係，唔死又唔係，咁算點？」他看了我一眼，又看著權叔，「有咩意義？你話嘞？」

我們默然無語。sam擺一擺手，冷笑一聲，回到樓上。

白詩婷自從當日企圖自殺後，每天也是迷迷糊糊，半睡半醒。這種缺水缺糧的情況，對於她這種年紀，之前又未嘗過饑餓之苦的孩子而言還是太嚴苛了。

其他人的情況亦不好得那裡，呀禮和權叔整天躺著，原本很多話說的兩人，現在如非必要，一整天也不說話，也不起來。杜嵐原本全心全意在解碼上，事情一結束，她睡得比呀禮和權叔更久更酣，好幾次我以為她抵受不住，在睡夢中香消玉殞，直到我戰戰兢兢的探出她尚有微弱的呼吸，才如釋重負的鬆一口氣。

我一直無事可幹，就靠讀神父遺留下來的聖經打發時間。這是史上最偉大的小說，要是你問我有甚麼感想的話。





第十三日。天氣依舊悶熱。

「喀滋……喀滋……喀滋……」

不知是早上或是下午，我被一陣怪聲弄醒。我首先留意的是地板上拉得長長的，窗花的影子，想到面向窗的一旁是西面，才發覺現在是下午，而且是快將黃昏的下午，然後我才想起甚麼的緩緩轉頭。

「喀……」這是我喉嚨發出的聲音。原本我想說：「你哋喺度做乜嘢？」，但乾涸的喉嚨只容許我發出像沙紙磨擦的聲音。

呀禮和sam在跪著，正把木頭和沙發外皮塞到口裡。不知怎的，我竟然覺得口中開始有唾液分泌。

「你哋……做乜嘢？」唾液濕潤口腔，我艱難地說出這句。

「……食嘢。」

「我係話……你哋……食木頭，同梳發？」不知怎的，看到他們吃的津津有味，口中愈來愈多唾液分泌出來。





呀禮回應：「……試下，你就……知。」

我心中的理智告訴我吃這些東西對身體毫無好處……但理智在五秒鐘後崩潰。既然大家最後都會因營養不良，缺水而死，那麼現在吃甚麼也沒關係吧？我的意思是，與其空肚餓死，倒不如飽肚營養不良而死。

我蹣跚爬向呀禮他們，抓了一把木條——呀禮用刀把桌腳一片片的削下來——塞入口中，咬了幾下便和著唾液吞了。

「……這種垃圾吃多少也沒用。」我是這樣想的，但把垃圾塞入口裡的動作卻未能停止。

木條和沙發皮味道難以形容，我本能的想把異物吐出，但更深一層的本能卻教我吞下這些雜物。木條把口腔和喉嚨割傷，沙發皮經常卡在喉嚨，不用力也不能嚥下，儘管如此，我完全停不下來。

三條已經餓極的野狼，吃光地上的垃圾，把饑渴的目光轉向其他雜物。sam指著沙發中溢出的棕黃色填充物，我與呀禮對望一眼，三人像看到甚麼寶物似的瞬間爬到沙發旁，不假思索的大把大把將填充物往嘴裡猛塞。

一大股漂白水，混合消毒藥水的味道直衝入鼻裡，我大感嘔心，但還是勉強吞下。不料，一陣更強烈的嘔心感覺湧至，我抵受不住，終於吐出剛吞下的填充物。這下動作像洪水缺堤，吐光填充物後，我把沙發皮一塊塊的嘔出，然後是一片片的木條，最後是一滴滴濃稠如痰，暗黃帶血的胃酸，胃酸經過木條割傷食道和口腔的傷口，只感到一陣劇痛。我把胃中一切吐出，看著木條，沙發皮和胃酸的混合物，突然清醒過來，心想：我到底在做甚麼蠢事？





旁邊兩人對我置若罔聞，繼續吃著填充物。大概是聽到客廳中的怪聲，白詩婷由房間蹣跚步出，看到我們所作所為，微微一怔。她微微皺眉，望向sam和呀禮，原本睡眼惺忪的她頓時把眼睛張得大大的，輕咳一聲，又望回我，疑惑的眼神在問到底發生何事。

「佢哋……」我只是輕輕說了這麼一句，她隨即像隻小貓快步走到兩人面前，問吃得起勁的兩人：「可……可以……食……？」

笨蛋也知道不可以吃，但白詩婷就像剛才的我，實在饑餓得受不了，見兩人吃得起勁，也不顧我的勸阻，三人跪在地板，七手八腳的把沙發解體，拆出的沙發外皮和填充物全進了三人的肚裡。

「你哋……你咪傻咗呀，竟然食……」

杜嵐站在樓梯，盯大眼睛，看見如此情況一時氣得說不出話。她消瘦的雙手推著三人瘦弱的身體，口中一直勸說著，但三人像看不見杜嵐似的，依然把垃圾塞入胃裡，杜嵐嘗試搶去三人手上的垃圾，但他們竟然不知在那生出一股氣力推開杜嵐。

她凝視著我，似是責怪為什麼不幫她。

——不要這樣盯著我嘛，就讓他們去吧，這又有何打緊呢？

她注意到我旁邊那攤嘔吐物，意會的輕輕搖頭，轉身走到樓下。不久，她提著一筒漂白水上來，整筒倒在那堆剛才還勉強看得出是沙發的物體上，三人的動作頓時停下，呆呆的瞧著杜嵐。

「……我屌你老母，你係咪傻撚咗呀！」sam怒吼道，憤而撲倒杜嵐，我和呀禮想拉開他，「我同你係咪有仇呀！我再唔食嘢就會死架喇！」
「屌……你冷靜啲啦！」

「唔好內訌呀……」

「冷靜？內訌？」sam此時的力氣大得驚人，他把杜嵐按在地上，斜目向想拉開他的我和呀禮道：「一切……一切都係佢搞出嚟！唔係佢，我哋唔會搞到而家咁！」

「你餓到傻咗呀？唔係呀嵐，我哋仲望住張爛鬼紙發呆咋！」

「屌你老母！」sam一記肘擊，打在呀禮胸口，「唔係佢，我哋就唔撚洗解啲咩濕鳩密碼！解到最後原來得個桔！唔係佢話有信心解開密碼，又拖到而家先搞得掂，我哋就一早突圍而出喇！」

「你傻撚咗呀？」我強行板開他在杜嵐項頸上像鐵鉗的雙手，「你見唔撚到出面有幾多喪屍呀？直到今日包圍我哋嘅喪屍數量都冇減少過呀！突咩圍呀！」

「總之，一切都係佢……」

「夠喇。」

不知甚麼時候出現的權叔一下拉開sam，撿回性命的杜嵐大口大口的喘息。

「……你，你咁鐘意食，可以照食呀，我唔會再阻你，」我冷冷說道，「仲幫你加咗少少水，等你好入口啲。」

「屌你老母，加撚咗漂白水，想食撚死人呀？」

「咁你食木頭，食海綿就唔會死？一樣加咗漂白劑喎！」

他一時無語，我嘆了口氣，語氣放緩，「食啲咁嘅嘢落肚，只係呃到你身體有飽肚感，但事實上對你有害無益呀。」

「……大家唔想咁做呀。餓起上嚟，咩都要食……就算明知食咗落肚對對身體有害都好。飲鴆止渴嘅道理人人都明，但……我哋有咩辦法？」呀禮跌坐在地，頹喪的說道。危機一過馬上感到渾身乏力，我一個失神險些倒下，幸好扶著牆壁。

「我……我唔想再捱餓喇……」白詩婷語帶哭音的說著，但因缺水，連半滴淚水也流不出來。

躺在地上的sam冷冷說道：「......我哋只剩低一個方法。」

「嗯？」

「你哋一定有諗過……只係冇講出嚟啫。」

背部一陣寒意，我知道sam想說甚麼……是的，大家一定也想過，只是沒說而已。

「只要犧牲我哋當中一個人嘅話……」

……為了生存，終於要走到這一步嗎？

在這約十五平方米的斗室中沒有法律。沒有法律……是否意味著一切行為都是被容許的？

「我哋……我哋……我哋唔通就……冇其他方法？」杜嵐也覺得不可以再這樣下去，但又想不到更好的方法，她結結巴巴的說著，聲音漸漸轉細。
「我哋當中唔搵一個人死，最後結果就係全部人喪命。」

杜嵐搖搖頭，爭論道：「但係，即使係咁都好……都唔構成，可以殺人嘅理由呀。」她抬頭想了想，續道：「就好似……就好似，無論你幾肚餓都好，都唔應該去偷嘢食……偷竊尚且唔可以，更何況去殺人？」

我低聲道：「你嗰種諗法真係好迂腐——」

杜嵐打斷我的說話，「所以話，你都同意，要有人犧牲嚟令其他人生存落去？」

我嘆了口氣，「……我嘅意思係，咁嘅非常時期，我哋唔應該再以咩是是非非之類嘅嘢為考慮因素，唯一可以審判我哋嘅人就只有我哋自己……咁，喺咁嘅情況之下，我哋做咩事都係被容許……為咗生存，一切手段都被容許。」

「就連，為咗自己活命殺其他人都係應該嘅？」

「如果冇其他方法嘅話……」我知道她一定不會認同，但沒有辦法。

「……我，我唔同意！」她罕有的動怒大叫，聲音有點沙啞，「咁樣……咁樣做同動物有咩分別呀！每個人都有生存嘅權利……假如忽視咗呢一點，咁我哋同動物有咩分別……」

呀禮搖頭，「我明白你嘅意思，但係以咁嘅理由嚟反對sam嘅提議，未免太過不切實際。」

「……我所講嘅並唔係簡單呀！」杜嵐捏緊雙手，垂首吃力的叫喊著，「我要講嘅係，我哋要尊重每個人嘅意願同生存嘅權利！唔可以因為大家都就嚟餓死，所以要殺死一個人嚟延續生命……」

「但係當時小剛要自我犧牲，你又……」sam沉聲的問道，但話未說完又被杜嵐打斷，「嗰次同呢次唔同呀！」


「小剛佢已經身受感染，冇可能再生存落去，而且嗰陣係佢嘅意願，所以我都覺得唔應該再講啲咩嘢……就算係誠哥，我事前都唔知佢哋會咁做，我阻止都嚟唔切……」杜嵐跺地，「但呢次唔同呀！你哋有邊個係自願犧牲丫？」

大家面面相覷，誰也沒有答話，連瑟縮在牆角白詩婷也只是抬頭看了我們一眼又隨即低頭。杜嵐嘆了口氣，輕聲道：「……大家…..大家都唔想死呀，我都係一樣，我都好希望可以生存落去呀。所以，要搵一個人出嚟好似祭品咁殺咗佢延續我哋嘅生命，根本就唔合理......」

大概是剛剛怒吼時體力消耗過多，她靠著牆壁坐下，口裡依然說著，「就算搵到一個好公平嘅方法決定邊個要犧牲，而大家都同意要參加……到咗最後選出嗰個人，佢內心深處都一定係唔願意死，因為呢個係人性呀…..咁樣，我哋就同謀殺冇分別。」

「咁……」sam低頭苦苦思索一會，「呃……或者唔洗去到殺人咁嚴重，或者，我哋可以再等落去，等到有人真係頂唔順死咗，我哋就唔洗殺人都得啦。」

乍看之下，這未嘗不是一個好方法。雖然始終有犧牲者，但起碼不用親手殺人。

「我哋咁多個人入面，邊個人嘅身體情況最差？」權叔突然這樣問道，我想了一想，下意識的向白詩婷一瞥，並發現其他人和我一樣望向她。

「你哋自己都好清楚……白詩婷之前就已經頂唔順暈過一次。之後就算醒返都成日迷迷糊糊咁……情況再咁落去，可能隨時一訓低就唔再醒返。你睇下，白詩婷虛弱到連參加我哋嘅討論都冇力，話等最虛弱嗰個死再食佢……跟本就係對佢唔公平。」

Sam抗議道:「但係，未來嘅事話唔埋呀。話唔定最先死嘅唔係佢？

杜嵐搖搖頭，「呢個係機會率嘅問題……各人因應身體狀態，死嘅機率唔同，本身就係唔公平呀。」

「白詩婷……」呀禮輕拍白詩婷的肩膀，柔聲問：「你……你點睇佢哋講嘅嘢？……你講兩句啦。」

白詩婷低聲嘟噥。呀禮側耳湊近想聽清楚，白詩婷又慢慢抬頭環視我們一眼，輕聲說了句：「……隨你哋鐘意啦，我咩意見都冇。」然後又埋頭在雙腿間。

「白詩婷呀，呢件事係關乎你條命架。」

「我知呀。」

白詩婷抬起頭，雙眼了無神采，死氣沉沉，不知是餓極了還是甚麼原因。她眼望前方，就似前面有著甚麼，聲線疲憊乏力：「……算啦，我已經……我已經咩都唔想理喇……求下你哋比我訓啦。就算你哋最後決定，要等我死又好，或者要抽籤又類決定邊個人死都好，我都唔會反對……我已經唔想理喇。」

「但係……」

「……點解你咁執著於生存落去？就算呀……你最後真係可以生存到落去，最後咪又係要死？可能係一個月後嘅事，又可能係一年後嘅事……但咁又點呢？最後咪又係要死？對我嚟講……生存定死亡，根本就冇所謂。」

「但係……」杜嵐的聲音顯得那麼蒼白無力，「但係你唔去爭取，最後成為我哋嘅食糧，你甘心咩？」

「所以我先話我冇所謂呀……生又好死又好……」她淺笑著，模糊的眼神游離不定，「就算可以生存落去下去，都唔一定係好事。倒不如……不如一死了之，起碼之後唔會再遇上令人傷心嘅事……總之，你哋決定啦，無論結果係點都好，我都唔會……唔會有任何意見……」

這不是她這種年紀的女孩該說的話，但想想她發生在她身上的事，自然理解她的心情……甚至可謂感同身受。

呀禮憐愛地輕撫白詩婷的頭髮，沉默不語。過了一會，他低聲道：「老老實實，我只係純粹理性咁睇成件事。死一個人，點都比大家一齊死更好呀……用常識諗，咁樣完全冇錯。我認同生命好珍貴，但一個人嘅生命點珍貴都好，都唔會夠其餘五個人嘅生命價值更高呀。」

「根……根本唔係價值問題！」杜嵐咬牙道，「而係，我哋唔可以用『價值』嚟衡量生命呀……每個人嘅生命都係獨一無二，強行為人命定下價值，甚至比較唔同人嘅生命嘅價值，見邊個嘅生命最冇價值就捨棄佢……咁樣做我唔可以認同！」

「哈，」他淡然一笑，「你話人嘅生命唔可以用價值衡量，但唔計我哋而家身處嘅咁極端嘅環境，就算係原本嘅社會都好，生命都係用價值衡量……用錢衡量。舉個例丫，就好似醫療事故，醫生醫死咗人，醫院要賠錢，高空擲物掟死咗又要賠錢，呢個社會充滿咗呢啲例子……唔通受害者嘅家屬，會話人命唔可以用金錢衡量，所以唔接受賠償？」

呀禮想了想，續道：「舉個更具體嘅例子。交通意外日日都發生，每年嘅死亡人數都維持大約一百幾十個左右……嘅然交通意外成日發生，咁點解政府仲繼續起馬路，繼續比汽車入口？……因為喺佢哋眼中，每年死嗰百零人，佢哋生命嘅價值唔比整個香港嘅人嘅方便帶來嘅價值更高呀。否則，政府只需要見有一個人死，就會全面禁止通車，但我從未聽過世上有一個國家會咁做。」

「……佢哋咁睇，唔代表佢哋係正確呀。」

「的確，但亦唔代表你嘅睇法就係啱呀。對於科學而言，響相同條件下做相同實驗都會得出同樣結果……但唔同嘅思想，響唔同文化環境下就會有唔同解讀。即係話，你嘅睇法又好，我嘅睇法又好，都只係純粹嘅人類行為，同科學唔同，並無絕對嘅標準去分別邊個先係啱，邊個係錯。」

杜嵐點一點頭，「我明白。但係……咁講嘅話，我就更加諗唔到理由支持你。如果，真係以價值為唯一指標，咁……」杜嵐想了想，輕聲呢喃著，「咁樣你要犧牲嘅人應該係婷婷啦。就算佢得救，但又缺乏戰力，又失去哂生存意志，而且身體最虛弱，你應該一早犧牲佢至係。」

呀禮靜靜的看著杜嵐，「......我絕對唔會咁做。」

根據呀禮的說法，如果連生命也可定價，那麼世間萬物也可定價，甚至連情感也可量化。例如，他可以抗辯不犧牲白詩婷的原因是不公平，而這會導致各人內心的愧疚，反而完全隨機選出「祭品」的方式，令人心裡更易接受一點……畢竟，因為「整體利益」而犧牲白詩婷，未免太不近人情。

不過……即使有完全公平的方法，而且各人同意殺人－食人的方針也好，最後選出的人，也定必如杜嵐所言，會反悔吧？因為，當初答應參加的人(假設是自由決定參加抽籤與否)大概都認為，自己不會是犧牲者才會參加的吧？既然會這樣想，誰會被選中後會說「好啦我自殺，條屍比你哋食啦」這樣的話？

姑勿論這種「殺人契約」的合理性。假如，如此情況真的發生，應該殺，或是不殺？

這令我想起杜嵐的話。她所堅持的於我而言實在是太不切實際……畢竟，現在是生死關頭，還說甚麼人權，尊嚴，未免太過理想化，說迂腐也不過分。不過，如果是根本上否定她所說的，那麼我們在必要時會毫不猶豫地殺人，而且沒有任何罪惡感，但會這樣做的大概是只有罪犯吧。

如此看來，她的說法又增加了些說服力。或許，她只是在堅持一些，我們不知不覺一直在遵守的理念而已。

更深入一點，是誰讓我們不知不覺抱有這種觀念？僅僅是法律？要是這樣我們早就下了決定要殺人了，但我們會只因為法律失效而跑去殺人嗎？想遠一點，是教育？社教化？或是更深層的，所謂的「人性本善」？那麼該如何解釋世上千千萬萬的罪惡的發生？

不知不覺間想遠了。只見人人臉色凝重，低頭的想著自己的心事，現場彌漫一股令人難堪，坐立不安的沉默。