[喪屍][人性?][政治?]在喪屍橫行的年代裏，我只想做一個人: 40 密碼 (一)
大約十二小時後。
「呀嵐，你感覺有冇好啲？」
「咳咳......嗯......」她的聲音小得就似夢囈。把手背輕輕貼在她前額，只感到一陣灼熱。
昨夜，女孩與杜嵐達成協議，只要我們解開文件密碼，破譯文件上有關如何讓受感染者回復原狀的內容，她就會放了我們。杜嵐回來，向我們交代她和女孩交易的內容後，在窗邊一直默默研究，連衣服濕透也不肯換。
我低聲道：「......佢發緊高燒。」
「係呀？」權叔嘆了口氣，踱步到窗旁，望向窗外，以及屋外狹窄道路上塞得水洩不通喪屍，沉默不語。
不幸中之大幸是，白詩婷在神父的照料下已經康復了，雖然在村中廣場受了傷，但只要休息一下就不會有大礙。
「喂，我拎咗水嚟喇。」
呀禮大腿上的傷已經復原八九成，基本上只要不去碰傷口的話，傷口不會再撕裂，他亦可正常活動。此時他把放在屋頂，用以收集雨水的水筒搬進二樓客廳。
「嗯......飲落酸酸哋。」
呀禮飲了一口，「係喎。我諗應該冇咩問題掛。」
「點都好啦，就算明知有害都要照飲，鬼叫冇自來水咩。」我把水一口喝完，又盛了一杯，「......水都唔係最大問題，問題係估唔到呢到咁大間屋，竟然冇咩糧食，剩係得返幾包餅乾，尋晚我哋又太肚餓，一下子就食哂......」
「因為神父佢係喪屍，自然冇必要囤積糧食。」權叔喃喃自語，「況且，之前聽小剛講，話村入面嘅糧食集中儲存喺倉庫，每日限量配給......而家咁嘅情況，冇可能去到倉庫。」
我答道：「唯有睇下我哋可唔可以盡快解開文件嘅密碼啦。」
權叔嘆道：「其實我真係信唔過個女仔。話只要將份文件解碼，再交比佢就得？雖佢讓步肯比我哋去到安全地方先交份嘢比佢，但總係覺得唔太可靠。」
我搖頭，「但當時嘅情況，呀嵐冇辦法唔答應佢。雖則佢一時唔攻入嚟，但長期落去我哋斷水斷糧都係死路一條。」
杜嵐蓋著毛毯，臉色蒼白，虛弱的笑著：「放心啦，只要解開密碼嘅話......咳咳......」
「你咪咁多口水喇，病就訓多陣啦。」
「唔得，我仲有重要事要做......小剛同誠哥用性命換取嘅機會，一定要好好把握。」
杜嵐緩緩的在沙發邊拿起文件，拖著疲軟的步伐走到桌旁放下，倒了一杯水，喝了一口，「我一直諗緊，上面密密麻麻嘅英文字母到底代表啲咩。成份文件只有一連串英文大階字母，字母之間冇任何間隔......我之前做過小小統計，發現E，J，H，K呢四個字母出現嘅頻律最多，所以可以肯定份文件係用替換嘅方式加密。」
......她沒有發現嗎？
「如果佢係用caesar cipher嘅話......」她喃喃自語，忽然又抬起頭來
，「做咩粒聲唔出咁望住我......乞嚏！」她隨手拈來一張紙巾抹著鼻子，原本有點嘶啞的聲音更模糊了，「你哋係咪想幫手？嗯，咁我教你哋要點樣做。」
見我們只是在瞧著她，沉默不語。她說完該怎樣做後，再說：「做咩眼甘甘望住我？我雖然病......咳......但係做啲咁簡單嘅嘢唔會有問題......」
我和權叔面面相覷。
她走到沙發前，「叫醒sam同白詩婷先，人多好辦事。」
「喂，你睇吓。」我指著她下身，那條米黃色的短褲上有一片血紅色。
「......」原本蒼白的臉上泛起一陣薄薄的紅暈。
權叔搔搔後腦，「你冇感覺架咩？」
她的下巴幾乎貼著胸口，使勁的搖頭，然後轉身小步奔向樓梯口。
呀禮冷冷說道：「喂，衣櫃喺我哋呢層呀。」
原本在上樓的杜嵐陡然止步，捏緊拳頭，低著頭的快步下來，在衣櫃抱了一堆衣服後又飛奔上樓，手中衣服有好幾件掉了也沒有理會。
權叔低聲道：「點講呢......𡃁妹佢，有啲遲鈍。」
呀禮淡淡一笑：「駱輝真係殘忍，竟然眾目睽睽之下就咁指住。」
「唔通有得佢咩。你兩個又唔出聲。」
「對唔住......咳，頭先真係失禮。」大約十多分鐘後杜嵐換上另一條褲回來，劈頭就是一句道歉。
我搖一搖頭：「你都係繼續休息啦，呢啲咁簡單嘅嘢我哋可以搞掂。」
「但係......」
「我哋好需要你。如果你夾硬嚟，搞壞身體，我哋就冇辦法解開密碼。」
「......嗯。」
不久sam和白詩婷也醒了，參與解碼的工作，但依然未見成效。我們嘗試只取相隔某特定數字的字母來組成句子，亦未有收穫。
「諗諗下，其實加密嘅方法真係好多呀......」經過三個多小時的奮戰，我坐在沙發上，手中揚著一疊紙，「剩係寫低用咩方程，都已經寫滿咗成疊紙。」
杜嵐躺在旁邊的沙發：「所以電腦先咁重要。我哋計咗成日嘅嘢，電腦唔使一分鐘就計完。」
「......我落去同sam交更。」呀禮拋下鉛筆，拋下這樣一句便走了。
為防喪屍突然入侵，地下長期有人看守，一有異樣便會立即通知我們。另外為防守衛打嗑睡，每隔四小時便會換更。
一天下來，毫無收穫。
屋內只有之前下雨剩下的水，數量不多，食物則早已經吃光。不趕緊的話，我們全都會餓死或渴死在這裡。
這晚我負責守夜。雜物依舊亂七八糟的堆在大門前，地下僅有的兩道窗用木條封著，但不是完全封死，這是為了通風，透光和觀察出面的情況。
守夜非常無聊，但這是不可逃避的責任。我半睡半醒的坐在木椅上，下巴托在鐵棒上，微張的眼睛因窗外千篇一律的風景而更感疲勞，兩塊眼皮像灌了鉛似的沉重不堪。為令自己清醒一點，我調整一下坐姿，觸到在村中廣場被打而留下的痛處，頓時清醒過來。我聽見樓梯傳出「咿啞」的木板響聲，本能地望過去，只見杜嵐站在那裡。
「我......咳，我想去廁所。」
淡黃的月光穿過窗上木板的間隙，在杜嵐臉上形成宛如光柵的條紋。她輕按著腹部，臉上掛著一個分明是強裝出來的笑容。
「嗯。」
她由廁所出來，準備上樓梯時，我低聲道：「......你呀，可以隨便發脾氣，唔洗咁顧慮我哋架喎。」
杜嵐回過頭來，沉默不語。
「我嘅意思係......」我摸摸後腦，「你病咗，又咁啱姨媽到，仲要幫手解碼，無論係身體定精神上負擔都好重。你又好似平時咁，對人客客氣氣，咩都攬上身，到而家都唔肯休息吓......你可以好似一般女仔咁，發下脾氣，鬧下人呀，我哋會體諒你架，唔洗咁顧慮我哋感受。」
「咩叫姨媽到？」
「......period。」
她一副恍然大悟的樣子，然後低頭不知在盤算甚麼，冷冷說道：
「你收皮啦，講到好似好撚關心我咁，識咗你三個月咋，同你好熟呀？定一話你想溝我呀，柒頭？」
「......」
杜嵐眺望著窗外的景色，不發一語。我呆若木雞的看著她冷若冰霜的側面，直到她帶著笑意緩緩的別過頭來，我才意會地和她相視大笑。
「差啲比你呃到，個表情同語氣似到十足十。」
她眼眸中閃過一絲狡黠，笑道：「咩差啲，你一聽到完全呆咗，咩反應冇呀。」
「我睇下你係咪認真咋。」我輕輕咳嗽一下，正色道：「不過，我真係唔明，點解你好似冇咩脾氣咁。」
她只是淺淺一笑，轉而望向窗外，良久才輕聲說道：「發洩完之後，應該做嘅嘢唔會少咗。與其花時間發洩情緒，倒不如認真諗下點樣解決問題仲好。」她頓一頓，「冇事嘅話，我返上去喇——」
「咯咯！」
我和杜嵐望向大門，對望一眼，沉默不語。
「喂！係我呀！開門呀！」
隱約聽見是女孩的聲音，杜嵐望著我，似乎在問該如何是好。
我走到窗前，木條的間隙後，隱約可見有個瘦削的人影站在門口。我試探性的問道：「你嚟做咩？」
「尋晚呀嵐同我講有電腦會解密會快好多，所以我就拎咗嚟喇。」
我回頭一瞥，杜嵐點一點頭。我和杜嵐搬開門的雜物，女孩不停在門外焦躁地拍門：「喂！快啲啦！本小姐啲時間好寶貴架！」
搬動雜物的噪音和女孩的叫聲驚動了其他人，他們紛紛下樓察覺究竟。他們見到我們的舉動均吃了一驚，經過杜嵐解釋後才安定下來。
我們所有人都帶上武器，我和權叔守在大門兩旁，杜嵐戰戰兢兢的打開了門。
「點解要我等咁耐？」
「因......因為......」杜嵐搔搔頭，說不下去。
大概是看到屋內的sam手持武器，她已經猜到幾分：「驚我有陰謀，要嚟殺你哋？......白癡，我要殺你哋就一早郁咗手，使等到而家？」她頓一頓，「喂，你要嘅嘢。」
只見一雙瘦削的手將手提電腦推到杜嵐胸前，杜嵐伸手接過，隨口問道：「係呢，你喺邊到拎部電腦返嚟？」
「講起我就扯火喇。你都唔知我幾難先搵到部用到嘅電腦返嚟。呢條村嘅電腦部部都冇電，我就醒起我之前去過嘅仁濟醫院，或者會有可以用到嘅電腦，一搵就果然畀我搵到。不過，畢竟dr.ray佢哋之前喺仁濟醫院做研究，所以嗰邊有仲用到嘅器材都唔奇怪！」
杜嵐一呆，喃喃道：「......仁濟醫院？dr.ray？」
女孩笑了笑，「steven james ray，呢個先係神父嘅真名。佢係美國軍隊嘅隨軍神職人員，而且係醫生......或者就係因為咁，所以就同嗰班人出現喺仁濟醫院，一齊研究喪屍病毒，點知自己都變埋喪屍，仲畀班人趕走咗，搞到我嗰陣白行一趟。」
「......白行一趟？」
女孩沒有留意杜嵐複雜的表情，自顧自的說道：「我去仁濟醫院，打算搵下有冇可以解除喪屍化嘅方法，但我最後只係喺一片狼藉之中，喺嗰個上面寫住dr.ray嘅文件夾入面，搵到你哋手上嗰疊加密文件。最初我攻入去嘅時候冇理到咁多，我仲以為dr.ray已經被我唔覺意殺咗，後尾先知原來佢一早已經變咗喪屍。因為變成喪屍後就自稱神父，搞到我都唔知——」
杜嵐吞一下口水，打斷了女孩，「你話攻入去仁濟醫院，係幾時嘅事？」
「咪就係幾日之前嘅事——」
sam怒吼一聲，衝到門前，推開杜嵐，猛然抓住女孩的衣領，「原來罪魁禍首就係你！呀穎佢，就係因為你而受感染！」
女孩冷冷的看著sam，她背後的喪屍開始接近大門，「......放手。」
我和權叔立即拉開兩人，sam跪在地上大口喘氣，女孩俯視著他，低聲道：「我唔知到底發生咩事，但如果佢因為我而受感染，我只有道歉......但只要你哋解開文件嘅密碼，搵到令喪屍變返人嘅辦法，咁就——」
「道歉？變返人？哈哈哈！」sam仰天大笑：「冇用喇！已經冇用喇！」
女孩拋下一個混合憐憫和鄙夷的眼睛，默默轉身離開，sam喝止了她。
「整走班喪屍，放我哋走！」
「只要你解密文件，搵到喪屍變返人嘅——」
「冇用架。」sam站了起來，「變成喪屍，就冇可能變返做人。」
女孩惡狠狠的盯著他，「有，一定有，一定有方法！」
杜嵐在sam背後說道：「我哋去過仁濟醫院，當你攻入去嘅時候，我哋咁啱在場。嗰到嘅醫生同我哋講，暫時未有令喪屍變成人嘅方法，所以......」
「咁佢哋有冇同你講，變成喪屍嘅人，事實上仲係生存緊？」
「但係......」
「只要仲生存緊，就一定有方法。」
「問題係，份文件上唔會有呀！」Sam大叫，「你份文件係喺嗰到拎，如果文件係講點令喪屍變返人嘅話，當初就唔會同我哋講冇辦法啦！」
「你知道嗎？你講嘅嘢，嗰晚dr.ray一早同我講過。」女孩凝視著sam，嘴唇輕顫，眼眶泛淚，血紅的眼睛變得更晶瑩，「......但我唔會信，呢個只係你哋同dr.ray嘅藉口，我唔會信架！」
我不禁嘆了口氣，「放棄啦。就算真係有方法都好，都唔會喺呢份文件上面。我明你想變返人，但係——」
「我唔係為咗我自己呀！」女孩捏緊瘦弱的拳頭，聲嘶力竭的喊道：「我變成咁唔緊要，但係......但係！」她抬頭，「對我嚟講最重要嘅人變成咁樣，我唔可以接受！總之，你哋一日解唔開密碼，就唔使旨意走！」
「......」
「喂！唔好呀！」
女孩轉身打算回去時，sam作勢前衝想殺死她，我和權叔馬上抓住他：「你殺死佢，只會令班喪屍失控，咁樣於事無補架咋！」
「就算係咁，我唔殺佢嘅話，我......」
杜嵐默默地走到女孩和sam之間，向女孩道：「我會解開密碼，證明畀你睇，文件上面嘅內容唔係你所想像嘅咁樣。到時候，你就要送走班喪屍，放我哋走。」
女孩冷冷盯著她，不發一語地離開了。杜嵐鬆了一口氣，回頭道：「只要我哋——」
「你憑咩咁講？」sam森然道：「解開密碼佢就會放人？假如佢老羞成怒點都唔肯放人呢？假如你解唔開密碼呢？」
杜嵐平靜的看著他：「......咁你有冇更好嘅辦法？」
sam不答，甩一甩手，轉身上樓。其餘人也垂著頭回去。
我搭著仍然站在門外杜嵐的肩膀：「我哋返上樓啦。」
「我只係想緊抱嗰一絲希望......我咁樣做有冇錯？」
我搖頭：「......我唔知道。」
......但如果你所緊抱的事實上是絕望，你會怎樣做？