[喪屍][人性?][政治?]在喪屍橫行的年代裏，我只想做一個人: 39 對流
女孩冷冷的盯著杜嵐，「就算你燒咗佢，對成件事都冇幫助。」
「......冇錯。如果我真係燒咗呢份文件，你一定唔會放過我哋......但亦唔代表，我交出呢份文件，你就唔會下殺手。」
「你點解會咁諗呢？」女孩微微一笑。
「嗰班村民——」
女孩攤開雙手，打斷杜嵐話柄，「我咁樣係為咗救你咋。」
「......我唔需要你救。就算係為咗救我，都唔需要殺哂班村民呀。」
女孩「咯咯」的笑著：「佢哋自相殘殺都入我數？如果班人可以合作，一齊攻擊我嘅話，死傷慘重係必然，但起碼有機會逃出生天。最後搞到咁，係佢哋自己攞嚟。我不過係講兩句野煽動下，佢哋就即刻反面內訌......我親手殺嘅人都只不過係區區幾個，啱啱佢哋雙方殺嘅人遠遠多過呢個數目呀。」
女孩想一想，踏前一步，續道：「......況且，如果我唔咁做嘅話，你可以脫險咩？頭先如果我遲嚟幾分鐘嘅話，你可能已經畀人燒死咗。即使走得甩，下面仲有成班村民，你可以安然無恙咩？」
杜嵐捏緊那份文件，沉聲道：「即使......即使係咁都唔洗殺哂佢哋呀......大家唔通就唔可以好好傾下？根本冇必要咁樣打打殺殺......」
「所以我就話，如果你肯交份文件畀我，我就會放你哋走。呢個唔係一開始講好咗嘅條件咩？」
「我都話咗，我信唔過你......況且......」
「嗯？」
「況且，即使文件嘅內容已經加密，你就算拎到都冇用。」
「之後再解碼都未遲。嚟啦，交份野畀我。」
「......」
背後倒塌了的高台在熊熊燃燒著，我凝視著如同毒蛇般扭動圈曲的火舌，想尋找隱身其中的白詠欣的身影。
「呀！」杜嵐的驚呼使我回過神來，只見杜嵐神色驚恐的退後了數步，而權叔擋在杜嵐面前。
他凜然道：「唔好諗住搞咩花樣呀。」
「哼。」面對著殺氣騰騰的權叔，女孩面無懼色，冷笑道：「做咩唔殺我？」
「殺咗你，邊個控制班喪屍？」
要是幹掉她，失去控制的喪屍毫無疑問會向我們大舉進攻。
女孩擺一擺手，回到屍群中。
雙方誰也不向對方攻擊，情況又陷入膠著。
背後火堆仍然燃燒著，不時發出劈啪聲響，白詩婷跪在火堆前，神色呆滯，淚水已經流乾，雙眼紅腫。閃爍不定的火光在她臉上照耀著，但她原本靈動的雙眼已經變得了無生氣。
雙方默然對峙。不知過了多久，火勢終於漸漸減弱——不，不是燃料耗盡了或是甚麼的，而是......
「落雨喇。」
原本的微微細雨很快轉為滂沱大雨，女孩臉上的笑意亦愈來愈濃。
「我記得，以前讀書講過，」女孩由屍群中步出，「以前啲人求雨，會燃起一個好大嘅火堆。咁樣做係有科學根據，因為火會促進一種物理現象，最後喺天上面形成厚雲。」她歪著腦袋，苦苦思索，「哎，嗰個物理現象叫咩名呢......」
「......對流。」
女孩讚賞似的對杜嵐點點頭，「係喇，就係對流！」
杜嵐身旁的火堆早已熄滅，她把文件緊緊的抱在胸前防止被弄濕。女孩伸著手，緩緩的向杜嵐前進，而她每行一步，杜嵐便退後一步，眼看快要退到喪屍群的面前。
sam原本的武器被沒收，此時他手上的鐵棒是隨手在地上撿來的。他向著女孩用力的掃過去，女孩及時的避開了。
「我幫你同神父洗脫污名，你而家反而想殺我？」
sam啐了一口，「放屁。反正最後你都只會殺死我哋。」然後他回頭道：「郁手啦，仲等咩呀？」
「吓......？」
「突圍呀！我唔撚想死喺呢度呀！」
「呀禮！」小剛不知何時走到呀禮身旁，把一支鐵筆交到他手上，「......死咗嘅人唔可返生。要生存落去嘅話，就要奮戰！」
......沒錯。即使希望是多麼渺茫，只要我們同心協力的話，一定可以逃出困境。
呀禮向小剛微微一笑，「我個樣睇落好消沉咩？」
「何只消沉，你個樣直頭灰哂。」小剛用力的拍了他肩膀數下，轉頭向我喊道：「駱輝，你準備好未？」
我點點頭，他再道：「ok！我同誠哥負責開路，你哋響後面跟住啦！」
女孩冷冷看著我們：「明知死路一條都要反抗，我真係唔知你哋個心諗緊咩。」
權叔手上的開山刀抵著女孩的頭顱，刃上原本沾滿村民們血液，現已被雨水沖去，「第一，我信唔過你。第二，只要份文件一日仲響我哋手上，我哋就仲有同你交易嘅餘地。」
「喂權叔駱輝！仲響度做咩呀！快啲走啦！」不遠處傳來呀禮的叫聲。由喪屍形成的圓逐漸收窄，我和權叔合力除去路途上的幾隻喪屍，三步併作兩步的回到隊列中。
在鳥瞰下可見整隊呈六角型。小剛和誠哥在前方開路，手抱著文件的杜嵐和精神渙散的白詩婷位於隊伍中心，呀禮和sam分別位於杜嵐兩邊，而我和權叔負責殿後。
戰力較強的誠哥和小剛不斷掃蕩著前方的喪屍，加快行進的速度，防止隊伍被完全包圍，而且隊中他們最熟村內地形。呀禮和sam對付兩翼的敵人，情況許可下，位處中心的杜嵐會給予有限度的支援。我和權叔擊退後方的喪屍之餘，還要照顧杜嵐和白詩婷，支援呀禮和sam，調整前進步伐，因此由戰力最強的權叔負責，我則要從旁輔助。
這大概是目前為此遇到最驚險的一戰。首先最大問題是視野，四周根本黑漆漆的甚麼也看不到，甚至月亮也被烏雲掩蓋，雖然可以憑喪屍特有血紅的雙眼看到他們，但已方的存在和方位只可用聲音來辨別，但礙於雨聲和喪屍的鳴叫，伴隨著轟隆的雷聲，要做到這一點也不容易。
另一樣難題是體力。隊中除了呀禮，sam和白詩婷之外，每人都己經不眠不休達三十小時以上，面對這麼凶險的戰鬥，體力隨時耗盡，另外天雨引致的地面泥濘，濕滑，以及喪屍在夜間體力較好等因素亦令情況更為惡劣。
和喪屍實際交戰的時間不算長，頂多只有十五分鐘，但感覺就似過了十五小時般漫長。
「我屌你老母呀！」
我們逃到秘道所在的廢屋，打算由秘道逃走，但沒想到秘道已經被人炸毀。
「嗄......點會咁架，明明頭先......頭先都冇事架......」杜嵐倚在牆壁旁，小口小口的喘著氣。
「肯定係劉居派人做架喇。咁冇辦法喇，要由村口......或者之前炸開咗嘅缺口逃......」
「轟隆！」
一道閃電劃破長空，瞬間照亮了四周的環境。我們看到的情況大為震驚，連小剛下一句在說甚麼也沒聽入耳。
「你......」因為四周黑壓壓的，而且剛由喪屍口中脫出，以致所有人都沒有注意到。杜嵐顫聲道：「你隻手......」
小剛上臂一大片的肌肉被撕下，露出白慘慘的骨頭，鮮血正汨汨流出。
「頭先一個唔小心，被班怪物扯走咗忽肉......哈，真係唔小心。」
「唔好......唔好講呢啲住喇，要快啲搵嘢同你止血先得......」杜嵐急道，隱約可見黑暗中有個瘦削人影在四處晃動。
「唔洗喇，我知我唔支持得好耐。」小剛淡然的說道，恍若受傷的人不是自己而是別人似的。
「點解你仲可以咁鎮定架！」杜嵐語氣中帶點急躁，「......唔理嘅話你會死架！」
「傷口一早已經受到感染，就算真係保得住條命，之後小剛都會變成嗰班怪物。」誠哥沉聲的說道。
「呢到離北邊圍牆嘅缺口最近......白粉誠，你仲行得郁吓話？」
杜嵐擔憂的問道，「喂......小剛，你仲打算繼續行？」
「仆你個街，我冇食白粉好耐喇......大家一場兄弟，只要你想繼續，我會一直陪住你。」
杜嵐低聲道：「誠哥......你唔打算阻止佢咩？」
「咁就好。我而家已經冇咩後顧之憂。一陣殺出去嘅時候，後面由交畀權叔你哋喇。」
權叔不發一語，脫去上衣，包裹著小剛上臂的傷口，「我呢挺粗人唔識點包紮......但咁樣起碼可以令你暫時止血。」
「哦，有勞。」
「權叔！你仲咩唔阻止佢呀！」
「呀嵐，」權叔緩緩的站起來，「有時男人決定咗嘅嘢，就冇人可以動搖到......旁人需要做嘅就只係支持佢。」
「就算明知死路一條都要支持？」
「唔通你有更好嘅辦法？」權叔冷冷的說道。此話一出，四周只有令人難堪的沉默。
「小剛，一定仲有其他辦法架。」
小剛淒然一笑 ，「呀嵐，你知架，一旦感染咗，就冇可能無事。」
「唔係呀！我手上呢份文件，上面就有關於點樣去除呢啲病毒嘅方法！」
「......咩話？」
「係嗰個女仔親口同我講架！呢個亦都係點解佢咁想拎到份文件嘅原因！你信我，只要有時間，我就可以將文件上面嘅密碼解開，到時候......到時候一切就冇問題，唔會再有人變成喪屍，所以......」
「好，咁就交畀你喇。」
杜嵐鬆了一口氣，樂道：「咁樣就首先同你好好咁止血先，剩係好似權叔包住唔得架......」
小剛轉而向我們道：「雖然大雨暫時沖走咗我哋嘅氣味，令到班怪物一時搵唔到嚟，但始終捱唔到好耐。我哋而家出發啦！」
「小剛......？」
「我等唔到嗰日架喇，呀嵐。」
「你......」杜嵐搖一搖頭，喊道：「你哋出句聲呀！呀禮！sam！」
sam沉默不語，呀禮黯然道：「算啦。如果呢個係小剛嘅決定，我哋冇人有權阻止佢。」
「......駱輝？」
「我支持小剛嘅決定。」
「連你都......」
「呀嵐，」小剛在杜嵐身旁走過，打開石屋的門，外面依然大雨不止，「人人都要死，差在時間嘅問題。最重要嘅係，死得有冇意義。」
誠哥笑道：「講得真係輕鬆，其實你根本就好撚怕死，係咪？」
「......係呀。」
我們來到北方圍牆缺口。儘管不贊同他的行為，但杜嵐臨行前仍為小剛包紮好傷口。
一道閃電劈過，一瞬間所見的是黑壓壓的盡是喪屍，由圍牆一端伸延到遠方的樹林，團團的包圍著整條村子。在廣場中心的不過僥倖的勝利......還有極大量的喪屍在等著我們，廣場中心那批只不過是前菜——不，是餐前小食而已。
這種數量，根本不是我們可以應付。
「呵，睇嚟無論走去邊都冇用。」
「唔好講喇！班喪屍行動喇！」
在這壓倒性的數量面前，任何隊形都毫無用處。
我們放棄逃出，改為向村中退走。即使如此，喪屍仍然在後面窮追不捨......正如果不引開喪屍的注意力，我們所有人都會一齊死，因為喪屍的數量實在是太多了。
「sam，我唔記得咗講......對唔住。」
sam板著臉，不發一語。小剛繼續道：「我知你唔會原諒我，我亦唔求你原諒。我只係想你知道，我好後悔我當時咁衝動。」小剛嘆了口氣，「你就當我係人之將死，其言也善啦。」
「......小剛？」
「係時候喇。」小剛向杜嵐悽然一笑，「你畀我死得有意義少少......起碼唔使變成喪屍。」
「小剛！」杜嵐大叫，但只見小剛大喝一聲，不顧身體被喪屍瘋狂噬咬，主動衝到屍群之中砍殺......誠哥先是一呆，然後學著小剛的樣子，大喝一聲，衝入屍群中。
「誠......你根本唔需要咁做呀。」
「嗰晚，我食白粉食到暈咗，係因為你，我先執返條命。而家我只不過係還返條命畀你啫。」
兩人相視一笑，一同砍殺身旁的喪屍。同時間四周的喪屍見有食物，聚到兩人前，我們眼前的道路登時開闊了許多。
兩人的身影漸漸埋在喪屍堆中......不知是因為我們跑遠了所以看不到，環境過於黑暗，或是淚水令視線模糊了。
我們沒命的一直跑，為的不止是活命，也是不要令他們用生命創造的機會白白浪費。最後，我們跑到一座大屋前。門牌號碼一零七，這是先前神父居住的地方。
一進屋，我們馬上把客廳中的雜物，包括床，沙發之類的堵住大門，先擋住喪屍進來再說。
「駱輝，嗰兩道窗點算呀？啲傢私唔夠高擋住道窗！」杜嵐指著大屋地下客廳中的窗戶，焦急的問道。
「權叔，呀禮，你哋一人守喺一道窗隔離.......道窗嘅大小應該剩係勉強夠一隻喪屍出入，各派一個人守住，應該應付得嚟！」
「好！包喺我身上！」
「sam，呢間屋有冇打火機之類嘅嘢？」
他點點頭，「......跟我嚟。」
沒有燈光的屋內漆黑一片，伸手不見五指，領路的sam對這裡非常熟悉，足下絲毫未停，我抓住他的衣角，杜嵐握著我的手，在這完全黑暗的環境經常碰到周圍的雜物。接著，他突然彎下身在找東西，然後把打火機交到我手上。
杜嵐歡欣道：「好，有方法隨時燒燬份文件。咁樣我哋就有足夠時間諗下一步點做。」
「喂！呀嵐！」正當我們要下樓，傳來呀禮的叫聲：「嗰個女仔有事搵你，話有嘢要同你講呀！」