[喪屍][人性?][政治?]在喪屍橫行的年代裏，我只想做一個人: 27 星之穹頂 上
石屋中心，一團營火正熊熊燃燒著，搖曳不定火光映照在圍著營火坐下的人臉上，似乎使眾人本來已經惴惴不安的表情更加難看。mk妹的肩上的傷口已經由白詠欣包扎好，而拿回來的藥也已經馬上給白詩婷吃下。
「點解你哋唔好好保護佢？！」
「當時情況太過混亂，我哋根本咩都做唔到。
」
杜嵐站了起來，踏前一步，「sam，呀穎受感染係因為我，根本唔關駱輝事。你要鬧就鬧我啦。」
「......你呢個人永遠都阻手阻腳！當初你根本就唔應該去！」sam惡惡的瞪了她一眼，然後徑自走到mk妹身旁，「呀穎，你被感染之後，有冇覺得有任何唔妥？」
mk妹沉默的搖一搖頭，sam想了想，「......其實我哋根本就唔清楚，到底俾喪屍咬中，係咪就真係會變成喪屍。你哋會覺得係咁，只不過係因為政府同嗰班士兵係咁樣講，但我哋根本冇人真係見過，被咬嘅人會變成喪屍。」
呀禮沉聲回道：「我明白呀穎受感染，你一時間好難接受......但你咁樣，同自欺欺人有咩分別？」
「但係......但係，我唔想......」sam怒道，「明明今朝仲好哋哋，點解一返嚟就......」
「sam，你要接受事實，我哋冇人希望發生咁嘅事，但發生咗就係發生咗。」
「我知道，我知道！」sam大叫，「如果我可以選擇，我寧願變成喪屍嘅人係我！......」
權叔搖搖頭，「......我諗我都係講吓到底要處理呢件事啦，好冇？」
至此，一直默不作聲的mk妹霍地站起，嚇了眾人一大跳。她緩緩說道：「我自己嘅命運，由我自己決定。」
「你嘅意思係.....」
「......」她深呼吸一下，眼眶通紅，強忍著將要掉下來的淚水，哽咽道：「我唔想變成喪屍，我唔想變成佢哋咁樣......所以，我希望我死嘅時候，係以人類嘅身份咁樣死......」
她意思就是......趁在未變成喪屍之前，了結生命。
「我唔會要你哋郁手，我會自己嚟。呀嵐，你嗰把手槍，可唔可以借畀我？」
杜嵐一呆，看一看我，又看一看權叔，「呀穎，你講乜嘢呀？」
sam喃喃說道：「喂，你......你係咪講緊笑？」
白詠欣低聲說：「呀穎，你根本唔需要咁做......」
mk妹環視眾人，最後目光駐足在杜嵐上。杜嵐手足無措，急得幾乎哭了出來，「我......」同時眼睛熱切地在眾人身上尋找該如何是好的建議。
mk妹已經淚流滿臉：「......係咪而家連我自己了斷都唔得？」
權叔搖搖頭，「我哋唔會畀你咁做。」
「點解？」mk妹頓一頓，「係咪怕我拎咗槍，會做出啲對你哋不利嘅事？開槍殺人之類？」
權叔長嘆一聲：「你點解會咁樣諗架？我哋只係覺得，一定有更好嘅解決方法。」
sam連忙安慰mk妹：「呀穎，你唔好咁啦，我哋一定可以搵到辦法架......」
最後在眾人的安慰下，mk妹的情緒慢慢安定下來。夜色已深，目前情況下再討論下去只怕會再挑動mk妹和sam的情緒，只好作罷。因為mk妹有變成喪屍的風險，只好讓她睡在底層一個小小的房間，這樣可以讓底層負責守夜的人，同時看顧她。
「呀禮，你去訓啦，呢到有我睇住得喇。」
「駱輝？......你今日全日都冇休息過，你先係快啲去訓啦。」
我搖搖頭，「我擔心呀穎，我驚佢唔知會做出咩事。有起事上嚟，我應對得會好過你呢個跛佬。」
「而家即係玩歧視啦？」他站起來，有點一瘸一拐的走到樓梯，「好啦，你自己小心啲啦。」
我獨自坐了一會，昏昏欲睡之際，突然聽到耳邊一道聲音。
「駱輝？今晚係你守夜咩？」
「呀嵐......我因為擔心呀穎，所以代替呀禮守夜。」
杜嵐點點頭，「我......我覺得呀穎變到咁，我要負責，所以......」
我點點頭，兩人坐在劈啪作響的營火旁，杜嵐輕聲問：「你係咪仲係覺得，喺呀穎未變成喪屍之前殺死佢，係最好嘅決定？」
「......我唔知道。」
她默然無語，良久才再低聲說道：「駱輝......我覺得你同之前唔一樣。」
「吓？」
「或者只係我錯覺啦。我只係覺得，自從你喺隧道返嚟之後，成個人變到好古怪，成日唔出聲，好似好多嘢諗咁......應該點講呢，變到有啲......陰沉？」
「陰沉。」我笑了笑，「我讀中學嘅時候成日咁俾人話，搞到個個女仔都避開我。」
「我唔知呢個字原來係罵人嘅......」
我失笑道：「哈哈哈，又唔算係罵人嘅。」
「......我只係諗，你喺隧道嘅時候，可能遇到啲唔好嘅事。可能有啲嘢你唔想提起，不過......我希望你知道，如果你需要嘅話，我哋會陪住你。」
「......嗯。」
我們靜靜的坐著，過了不知多久，半睡半醒之間，似乎聽到樓上傳出騷動聲，我搖醒杜嵐，指指上方。
上方傳出白詠欣的叫聲：「sam，sam！你攞槍做咩呀？」
正當我以為sam打算傷害白詠欣，盤算如何是好時，sam衝了下來，瞥見我倆，他舉槍要脅道：「唔準郁！」
「sam，你......」
他衝入房間，mk妹正瑟縮一角，他抓著她的手腕，叫道：「呀穎，我哋走啦！」
mk妹驚愕的看著他，「你講咩呀？我哋......可以走去邊？」
權叔等人也趕到樓下：「sam！有事慢慢講，你放低槍先啦！」
眼見人愈來愈多，sam抓住驚魂未定的mk妹，強行把她拉出房間。他舉槍指嚇我們：「唔好跟過嚟呀！」然後拖著mk妹離開石屋，「砰」一聲的帶上了門。
權叔二話不說就奪門而出，我們則緊隨其後。權叔回頭一看，叫道：「白詠欣！你返去先啦！」
「但係......」
「sam佢手上有槍呀，萬一你有咩事，咁白詩婷點算呀！」
白詠欣咬牙，「......咁好啦。你哋小心啲呀！」
「呀禮，你同我去呢邊；駱輝同呀嵐，你哋去嗰邊！」權叔同時提醒：「如果搵到sam嘅話，你哋唔好刺激佢，小心佢可能會開槍。」
兵分兩路之後，我和杜嵐沿著山中的羊腸小徑找尋他們兩人的蹤影。因為跑出的時候太過倉促，連電筒也沒有帶上，只好憑著滿月穿過樹冠散落到地上的微弱月光來尋路，幸好這些日子下來，我們路也走熟了，才勉強不致於迷失方向。
杜嵐氣喘呼呼的問：「sam佢哋到底可以去邊？」
「佢哋會唔會係去咗條村嗰到？」
「吓，如果畀班村民發現呀穎已經受感染，佢哋一定唔會畀呀穎入村，甚至會殺咗佢......sam應該知道呢一點架。」
我遲疑道：「咁......佢哋到底可以去邊？」
「不如我哋去河邊，嗰邊比較空曠......」
穿梭在漆黑的樹林之中，前面開始聽到陣陣的流水聲，再往向走，來到先前抓魚的小河。
「呀穎，你冷靜少少，你......」
當我們來到河邊，赫然看到呀穎和sam正在對峙：mk妹用槍指著自己腦袋，而sam則在苦苦哀求，聲音顫抖，「你......你放底把槍先啦，有事慢慢講，好冇？」
杜嵐緩緩行向mk妹：「呀穎，你點解攞槍指住自己......？」
「唔好行過嚟呀！」
「點解你要——」
「我受夠喇！」mk妹撕心裂肺的大叫，眼淚在眼眶中打轉，「我已經......我已經唔得喇......我唔希望自己......可能下一秒就變成見人就咬嘅怪物。你哋唔係我，你唔會明白，慢慢變成怪物，但係自己根本無能為力......你根本唔會明白嗰種感覺係幾咁無助！......」
「冇錯，我的確唔會明白。」sam咬著牙，淚流不止，「但係你咁樣做，唔係等於向命運投降咩？」
「係呀！」杜嵐叫道：「就算只係希望渺茫，都唔應該咁快放棄呀！」
mk妹搖搖頭，慘然一笑：「你嘅希望對我嚟講實在係太遙遠喇。」
「呀穎，我求吓你，唔好留底我，好冇？」
mk妹咬著下唇，力度大得出血，眼淚傾瀉而出，握著手槍的左手緩緩顫抖......最後，手槍鬆脫掉下，她跌坐在地：
「但係我......我真係唔想死呀......」
sam上前摟著mk妹，兩人哭成一團，杜嵐輕聲安慰他們。
「呀嵐......」mk妹低聲說道：「你可唔可以應承我，一件事？」
「嗯......」
「如果我真係變成喪屍，你可唔可以親手殺死我？」
杜嵐一聽到，急得不知所措，「你......點解......我唔得架......」
「呀嵐，雖然你睇落係我哋之中最柔弱嘅一個，但我知道，事實上你係我哋咁多個之中最堅強嘅。」
「點......點解？」
「因為你從來都冇放棄過希望。」
「但係我......」
「應承我，幫埋我最後呢一次，好冇？」
杜嵐雙眼通紅，深呼吸一口氣，雙手緊握成拳，緩緩點頭，「我知道喇。」
之後我們把sam和mk妹帶回石屋，權叔和呀禮在外面怎也找不到兩人才筋疲力盡的回來，那已經是兩人出走後大約一個多小時的事。為了防止sam再作甚麼傻事，權叔和呀禮換房間，親自看守著sam。mk妹在大哭一場之後，情緒似乎已經穩定下來，剛剛我偷偷瞄了一下房間，只見她好端端的在木板上熟睡。反倒是杜嵐，自她答應mk妹的要求後，就一直一副心事重重的樣子，當她回來後，也是一聲不響就回到自己的房間。
營火已經熄滅了一大半，在柴堆之中只有點點暗紅火光。我在營火中小心翼翼地添加木柴，同時要防止火苗不滅。
情況根本是陷入僵局。總不可能放著隨時會變成喪屍的mk妹不管，但我們也沒有甚麼解決方法，只可束手無策地等待那一天來臨。趁早了結可能已經是無可奈何中的唯一辦法，但這勢必引來sam的反對。
怎樣做才算是正確？
在這死寂的夜中，我選擇不再去想這個令人頭痛問題。守夜這種漫長又痛苦的工作，不適時的偷睡一下，時間會過得很慢，畢竟這工作最辛苦的不是熬夜，而是沉悶。當你沉悶又不能隨意離開時，自然會胡思亂想，不希望這樣的話，就只有打瞌睡，讓自己處於迷迷糊糊的狀態，這樣你就會甚麼也不會去想的了。
或許下次搜索時可以去找本書來消磨時間。聖經大概是不錯的選擇，因為它夠厚，十分耐看之餘，用衣服包裹一下，就可以充當枕頭了。
我任由思緒在腦海中暢遊，直至一切想法攪和成一團，我才沉沉的睡著......也不知道我睡了多久，身子好像被踢了一下，我睡眼惺忪的醒來，只見天地仍是一片漆黑，我像只昏迷了片刻，也像已剛好睡了一日一夜。我揉一揉眼睛，看到依稀是mk妹的人影站在我身旁，笑道：「呀穎？想起身屙夜尿但怕黑，想搵我陪呀？」
「嗚......」
「......呀穎？」
今夜滿月高掛，淡黃的月光穿過石屋破爛不堪的窗框，柔和的照亮石屋內部。mk妹雙目通紅，嘴角的垂涎一滴一滴的落在滿是灰塵的地板上。
「嗚......咳......」
「你......！」
動作如同喪屍般生硬，緩慢，血紅的雙眼像鬼火似的在漆黑中搖曳不定，但明顯地，伴隨著她沉重的步伐向我漸漸迫近。
誰想到這一刻來得如此快？