[喪屍][人性?][政治?]在喪屍橫行的年代裏，我只想做一個人: 26 探病時間外禁止進入 (四)
眾人沉默不語。即使剛才所作所為只不過是私刑，但他的確令情況穩定下來。各人鴉雀無聲的井底，只有喪屍在外拍門的聲響，放在地上的手電筒，由上而下的光線令每個人的表情變得更陰沉。漸漸拍門聲退去，取而代之的是一陣陣低沉的槍聲，接著則是混成一團的叫喊聲。
『全部人準備，我們一會就殺出去，與他們會合。』待到槍聲愈來愈接近，allan命令全隊準備，然後打開電梯門——
「嗄！」
當電梯門被打開的瞬間，一隻站在門邊的喪屍撲向allan，allan被順勢撲倒，跌入井中。電梯之外火光不絕，隱約可見喪屍如潮水湧向左邊。到allan把撲到自己的喪屍解決之後，井底已經一片混亂。士兵在電梯門打開後隨即對喪屍展開掃射，而門外的喪屍亦開始進入井中。腦部被破壞的喪屍和只有一部分身體被破壞的喪屍，一同跌入井中，佔據原本已經極度擠擁的空間，一片黑暗和血腥之中，有人發出慘叫，電筒一照才發覺小腿已經被喪屍緊緊咬住，而頭頂還有數不清的喪屍準備入侵......
苦苦支持之下，終於把外頭的喪屍清掃乾淨，與另一小隊會合。各人爬出井底，清點人數之後，才發現在allan的小隊中，原本有十四人，現在只剩下六人，研究人員則由五人降至三人。
『這兩個傢伙竟然沒死。』清點人數後，我和權叔既不是士兵也不是研究人員，自然被突兀的排除在外。
『我們還有兩個同伴。』我回道，『你們......你們有見過她們嗎？』
另一小隊的隊長上下打量著我，『......你指那兩個女的？應該在第三隊那兒。』
allan插口道：『我們稍事整備之後就會去找第三小隊。你們要跟過來？』
我斬釘截鐵：『當然！』
allan滿不在乎的擺擺手，『那就自己照顧自己吧。』
『隊長，被喪屍咬中的人要如何處置？』
allan臉色一沉，『按照本身的程序去處理。』
接著就聽到一連串的慘叫聲，最後以槍聲結束。
我向allan問道：「你哋......殺咗受感染嘅人？」
「呢個係唯一辦法。」一名研究人員回道，看他樣子，似乎是本地人，「受到第三期患者體液嘅直接感染，百分之百會變成第三期嘅患者，之不過係或遲或早嘅問題......早嘅可以一日，甚至幾個鐘之內就會出現徵狀，遲嘅可以潛伏一個星期以上，」他頓一頓，「但最後無一倖免，全部會變成你哋所講嘅喪屍，無數嘅數據已經證明呢一點。」
權叔冷冷道：「但係你哋咁做唔會太過殘忍咩？佢哋係你哋嘅同事同埋戰友，就係因為畀喪屍咬咗一下就要拋棄佢哋？」
「哈，你想企喺道德高地上面審判我哋？」那名研究人員不怒反笑，「你嘅所謂憐憫真係廉價。我哋每個人都知道被咬中就只有死路一條......唔通你又忍心見住你嘅親人朋友變成喪屍？我哋每個人都清楚知道，感染病毒就會被馬上射殺，防止病毒進一步傳播。」
「但係咁樣實在係太過—— 」
「不近人情？殘忍？」研究員打斷權叔，「頭先被處決嘅人入面，有我認識咗十年嘅朋友......冇人希望被殺，正如冇人希望被感染一樣。你所謂嘅憐憫係點樣呢？將被感染者鎖喺地牢，期待佢哋會變回原狀？期待有疫苗面世？咁要等到幾時？定一話你希望，你嘅朋友親人一步步承受痛苦，變成你唔再熟悉嘅樣，喺門嘅一邊求你殺死佢，然後你只可以喺門嘅另一邊無能為力？咁就係你嘅所謂憐憫？」
研究員愈說愈激動，allan拍一拍他，「夠喇。」然後轉向權叔：「......我諗，你哋應該未經歷過同伴受感染嘅情況。頭先佢都講咗，我哋所有人喺加入之前已經知道被感染會有咩下場......長痛不如短痛，呢個就係我哋嘅做法。」
「你哋......有好多同伴受感染咩？」
「......唔係你以為佢頭先所講嘅『數據』喺邊到得返嚟？」
一行二十多人在這伸手不見五指的醫院行走，搜索失蹤的第三小隊。和我們會合的第二小隊沒有降落到井底，而是落到升降機頂部，打開了頂部的通風口，從中打闔了升降機門。他們走出的升降機位於七樓，走出之後就直接來到樓下，途中沒有遇到第三小隊。
因為二至六樓都被鎖上，我們的搜索范圍被局限七樓以上。不知是否入侵的喪屍已經完全被消滅，途徑之處幾乎看不見任何喪屍，直到我們回到頂層，allan等人本身駐紮的場所，除了遍地屍骸之外，亦不見任何活人的蹤影。
『如果這樣都找不到的話，就代表第三小隊可能被困在二至六樓的其中一層。』
另一小隊的隊長回道：『......你知道那幾層有甚麼東西，對吧？』
『假如第三小隊真的在那邊，我們一定要去救。』
『困在那邊的變種，根本沒有辦法殺死。』
allan臉上像是蒙上一陣寒霜，『你意思是別救他們？別忘記我們的研究資料在他們手上。』
『可能他們已經離開，在我們清空地下那層之後。』另一小隊的隊長，想了想，「我們先回地下那層看一眼吧。」
回到地下，找不到任何人的蹤跡。無可奈何之下，只好搜索二至六樓。士兵用小型炸彈炸開門鎖，一股塵封而久的霉味混雜火藥味撲面而來，眾人屏息靜氣，士兵緊握步槍，似乎隨時會有喪屍在暗處突襲。我們走出樓梯間，來到電梯大堂前，士兵用他們不同部隊間溝通的暗號，嘗試找出困在電梯中的第三小隊，但徒勞無功。區隔南北翼病房的大門不知是緊閉或是虛掩，士兵全神貫注地戒備著，暫時沒出甚麼意外。
途中想問一下關於變種的情報，但擔心耽誤目前的行動，所以一直沒問。輾轉來到四樓，士兵敲打電梯門，再低聲說道：『有人嗎？』
『有呀！我們在這裡呀！』
電梯內的人打開電梯門，像是看見救世主一樣，臉上流露欣喜的笑容。
「allan！」serena在人群瞧見他，立即迎了過去，「好彩你冇事！」
「我就梗係冇事啦，有事仲點去救你呀。」他頓一頓，「啲研究文件你有冇帶齊到？」
serena揚一揚手上的文件夾，「呢啲係我哋用無數人命換返嚟嘅成果，我點會唔記得拎。只不過我只係帶咗最重要同最新嘅文件，比較舊嘅，同埋Dr. ray嗰陣留低嘅文件就帶唔切......」
電梯內幾乎只有研究人員，士兵則只有三人。
人群之中看見一個熟悉的背影在四處張望，我上前拍一拍她肩膀，「呀嵐。」
「駱輝？」
她轉過頭來，看見我的瞬間呆住了，然後疲憊的臉上擠出一絲笑容，「原來你冇事......」
「我同權叔都冇事，你哋呢？」
她望向一旁，順著她的眼神看見mk妹的身影，只見mk妹嘴巴被布條縛住，兩名士兵一左一右站在她兩旁，在和allan說話。
我指著mk妹，問杜嵐：「呀穎佢到底——」
「轟！」
大概是剛才我們的聲音驚動了喪屍，幾隻喪屍衝出，跑到最接近他們的士兵旁，一口咬住了他們的肌膚，再猛然撕下——
「呀呀呀——」
前面傳出震耳欲聾的慘叫，allan下命令道：『全部人撤退！士兵守在外圍，其餘人企內圍，第二小隊帶頭，第一小隊殿後！』
被咬中的士兵，發了狂似的把子彈全都打進喪屍的大腦，而那些喪屍即使已經臉目全非，腦漿混和血液在創口流出，喪屍們仍然著魔似的不斷發動攻擊。
『射腳！射頭是殺不死他們的！』
喪屍的數量不多，但因為殺不死，而且行動十分迅速，這些喪屍變得十分難纏。與此同時，似乎有更多喪屍因為槍聲而衝出來。慌亂之下，我抓著杜嵐，跟隨著前方的士兵，沒命的逃跑......當我們跑出四樓，變種喪屍仍然緊隨其後，士兵們且戰且退，最後退到大街之上。士兵們用步槍掃射喪屍的腿部，終於把所有喪屍的行動能力解除，讓他們只可以在地上匍匐嚎叫。
『已淨空！』
儘管喪屍已經失去行動能力，但只要他們一日未死，危機也不算是解除。allan向權叔說道：「我哋嘅車泊咗喺醫院嘅另一邊，為咗安全起見，我哋會行另一邊兜過去。我諗我哋就喺呢到分道揚鑣啦。」
權叔點點頭，指著mk妹，冷冷問道：「你可唔可以解釋下，你哋點解要綁住佢？」
「關於呢一層，你哋嗰個朋友應該清楚過我。」
「呀穎佢......」杜嵐低著頭，雙手緊抓著衣角，「頭先佢喺頂樓，為咗救我，自己被嗰啲喪屍咬中咗......佢哋為咗防止呀穎變成喪屍，所以就......」
權叔跑過去為mk妹鬆綁，serena歉然道：「我......我都唔知最後會搞成咁......好對唔住......」
權叔黯然一笑：「傻啦，都唔關你事。」
走近才發現，mk妹的肩膀被鮮血染紅，透過破損的衣物可清楚看到雪白的肩上的咬痕，血跡已經乾透。解開了手上束帶和口中的布條，權叔低聲安慰道：「呀穎，有冇事呀？」
mk妹搖頭不答，咬著下唇，哇一聲的哭了出來。權叔輕拍在自己懷中的mk妹，輕聲安慰。
一直在旁看著的allan不耐煩的說：「好喇，我哋要走喇。」說罷，一眾士兵和研究人員開始前行，serena低聲說道：「駱輝，你哋......你哋如果需要幫忙嘅話，你哋可以嚟搵我哋，地點喺槍會山軍營......」
本想說我們不會去，但聽到軍營，我立即問道：「佢哋......佢哋到底係咩人？係軍人？」
她嘴唇微張，欲言又止，最後搖搖頭，神秘的說道：「佢哋係美國派嚟嘅調查團.......詳情係點我而家唔可以透露，但我可以保證，佢哋唔係壞人嚟。」
allan在前面大叫，完全沒考慮吸引喪屍的危險：「serena！我哋走喇！」
「總......總之，我同佢哋相處咗一段時間，我覺得佢哋信得過。如果你哋有需要嘅話，可以嚟搵我哋，我相信佢哋會伸出援手......」她看一看仍然在哭的mk妹，低聲道：「......再見！」
權叔輕聲道：「呀穎，我哋要返去喇。」
「返去？返去邊到？」
「返去石屋......我哋嘅屋企。」
mk妹緩緩站起，「我係咪......我係咪會變成......嗰啲怪物？」
「......我哋返到去先再講啦。」
「呀穎，如果你唔係為咗救我，你都唔會......」
mk妹慘然道:「而家再講呢啲都冇用喇。」
「但係！......我相信，我相信一會有辦法架！」
我冷冷問道：「辦法？咩辦法？」
這樣一問，杜嵐倒是呆住了，然後才嚅嚅囁囁：「或者......或者會有疫苗之類......」
「唔好俾個假希望人啦，呀嵐。」我沉聲道：「頭先嗰班人，佢哋係做喪屍病毒嘅研究，但當佢哋嘅同伴受感染，呀嵐，你估佢哋點做？」
「我......我唔知道......」
「佢哋毫不猶豫猶豫咁殺死自己嘅同伴，因為佢哋知道——」
權叔厲聲道：「駱輝！唔好再講喇！」
「......佢哋知道，受感染嘅話，最後只會變成喪屍。權叔，我冇講大話，係咪？」
權叔欲言又止：「你根本冇需要......」
「唔好再婦人之仁喇，唔面對現實就根本解決唔到問題。」
「但係你咁樣，除咗傷害人之外，又解決到問題？」
「我覺得駱輝你睇得太過灰暗！」杜嵐插嘴，「如果一感染就要殺死佢，咁同一開始就放棄所有希望有咩分別？」
「因為你所謂嘅希望好有可能根本就唔存——」
「駱輝。」mk妹硬生生打斷我，「你嘅意思即係，受到感染，就必定會變成喪屍？」
「......冇錯。」
「咁你覺得要點做？喺呢到殺死我，係咪你所講嘅『解決問題』？」
「我......我唔係咁嘅意思......」
「你知唔知，其實我覺得你講嘅，可能真係最好嘅做法。」她深呼吸一口氣，眼眶濕潤，「但係呢，如果受感染嘅人係你嘅話，你會唔會同意呢種做法？」
「......對唔住。」
淚水順著臉頰滑下，她笑了笑，「你唔知道，係咪？我都唔知道。」
權叔仰天長嘆，「我哋返去先講啦。」