《我嘅中學生涯竟然係同兩個女仔探討夢想》: CHAPTER「52」

https://youtu.be/Xus3Gy9_nHA

「呢對鞋...」

「係上次睇完戲經過..我話鍾意嘅鞋。」

允晴嘆一嘆氣，便掩著臉坐在沙發上。

我呆呆地拿起球鞋，發現上面有幾個字。 





「Y。US....？」

是什麼意思。

Yin....Yi？

難道，是我和曉兒的名字...？

那時候的我，只猜到這個意思。





想不到長大後，才明白另一個意思。

「曉兒.....」我顫抖地打開信封。

裡面是寫著滿滿的字。


 致 我的最愛 言仔

言仔：

當你睇到呢封信嘅時候，我已經離開左香港喇。

冇錯，我同媽媽去左美國喇。

當初識你，你就知媽媽有移民嘅打算，只係爸爸因為意外入左醫院，所以先擱置左，我爸爸，佢早兩個月已經走左，所以媽媽又再有移民嘅想法。

暪住左你，對唔住呀。

我知道我冇同你講，偷偷地粒聲唔出就走左，好不負責任，亦都好對你唔住，因為我唔敢同你坦白，我當日見到你好唔捨得飛機，就好驚，好驚你知道我要走嘅時候，你會點。

我冇同你講我會走，冇同你講我幾時飛，就係唔想你趕過黎，見到我會唔捨得，會唔比我走。

但你知唔知，最唔捨得你嗰個，最唔想走嘅嗰個，係我呀...你知唔知呀卓樂言...我唔想離開呢個地方，我好驚會掛住你，我好驚冇得再見到你，因為我，我真係好鍾意你...

但係，我已經唔可能再留喺香港喇。

記唔記得我地第一次相識係幾時？可能你覺得係中三開學嗰日，但其實唔係。

記唔記得我話過，華明停車場天台，對我地係一個好有紀念價值嘅地方？
嗰年我十歲，係你出現，拯救左我同允晴。
自從嗰日，我就對你好有興趣，哈哈。

估唔到多年之後，我會做左你女朋友。
我真係好開心好開心。
因為你，我知道被愛嘅感覺。
因為你，我學識照顧人。
因為你，我搵返當初嘅夢想。
因為你，我覺得人生充滿希望。

我地會擔遮一齊返學，明明冇咩好行，但我地會去上水行街，明明天時暑熱，但我會睇你踢波，第一次食你親手整嘅野，第一次同你過生日，第一次同你去梅窩，第一次同男仔接吻，第一次同你過聖誕，同你喺除夕倒數。

我地又會影貼紙相，但你連鏡頭都未知喺邊，我地會去鋸扒，我知你怕肚痛會比唔到賽，特登幫你叫全熟，我會因為你同第二個女仔太親密而喊，但你都會氹返我。

第一次睇戲，我其實唔鍾意睇警匪片，只係我見到你屋企啲影碟全部係警匪片同動作片，我先呃你話我鍾意睇，哈哈。

我最鍾意食板燒雞腿包，次次都食，但你從來唔嫌棄我，仲會默默咁陪我食。

希望你每次去麥當勞都會諗起我！嘻嘻！

最青春嘅時光，都係同你一齊經歷。
我好唔捨得，好唔捨得你。

但我唔可以陪你行落去喇。
你要自己照顧自己呀！
唔好再唔帶遮返學，唔好掛住訓教唔做運動，唔好跑跑下暈低！唔係冇人會再救你架喇！
知唔知道！

最後，呢對波鞋，係我嘅禮物。

希望你會鍾意啦！
唔準唔要佢！唔係我會嬲架！

好多謝你嘅出現，卓樂言<3