師生禁地: 第十三章：交換秘密

/
「做咩咁急住行呀，你個樣仲好不安咁，發生左咩事？」上左巴士之後，阿晴問我。「真係天氣熱吖嘛，你睇下我，頭先一行出課室就出晒汗。」我舉起手扭開個冷氣。我同阿晴冇傾計，佢有佢係度睇手機小說，我有我係度睇窗外既風景，好快就到站了「唔想講唔緊要，我地咁多年好姊妹，你有咩需要一定幫手既，唔迫你喇，等你想講再講啦。」阿晴平心靜氣咁講。「嗯，我會架。」我同阿晴慢慢行去圖書館，開始傾下啲鎖碎事，氣氛輕鬆左，比起頭先好好多。阿晴係我中一第一個識既朋友，因為中一已經同阿光分開去唔同班，其他小學同學又係唔同學校，自己少怕羞，變相果陣好難適應新既校園生活，就係依個時候，同桌阿晴好主動咁同我打開話題，大家既興趣相似，佢性格又幾好，好快就已經傾得投契，佢細心、成熟，觀察力強，又會顧慮人感受，基本上識佢既人都好尊重佢，亦有唔少追求者。

我地去到圖書館一個無人既角落坐低，係書包度拎起筆記薄，諗住真係歇開溫書，但係見到阿晴書包都未除底，仲沉迷緊佢睇緊既校園小說，就忍唔住笑左。「笑笑笑，咁真係好睇吖嘛。」阿晴對我反白眼，除底書包。「阿晴認真個樣好吸引人。」我側望住佢。「有男朋友仲未夠，想要多個女朋友添，係咪？」阿晴撩我條腰。「哈哈，停呀好痕，認真，有冇邊個啱心水呀你依家？」我撳停左阿晴，佢搖頭。「之前有個F4既男仔咁勇敢，直接過黎識你了解你，仲有冇聯絡啊？」我問。「有就有既，不過我當佢普通朋友啫，冇咩感覺。」阿晴平淡咁答。「原來係咁，不過比著我都唔太想姊弟戀。」我講完依句，做左話題終結者，大家都好平靜咁溫左陣書。

「不如大家交換一個秘密，好冇？」「吓？」聽到阿晴咁講我有啲突然。「阿婷，我同你識左幾年，唔算識得最耐，但最熟果個一定係你，所以我想毫無保留咁講我既野你聽，不過你會唔會唔想？」阿晴收返本書入書包。「其實我都當你係最好既fd，好多心事都同你講，但冇同阿敏講，因為我知你一定唔會講出去，同埋一定撐我。」我講完依番說話之後，阿晴睇落有啲感動。「咁好，我講秘密先，上年我同果個人和平分手，你仲記唔記得件事？」「記得，佢係因為去英國讀書，你地唔想long d所以唔繼續一齊，跟住斷晒contact...仲係咪唔捨得佢？」我有啲疑惑。「唔係唔捨得，其實我出街見過佢拖住另一個人，我問返佢啲同學，先知道佢根本冇去英國，係返依度讀u...」我聽到有啲嬲。「佢只係講唔出鍾意第二個，先會呃我啫。」阿晴安慰自己。旁觀者清，一向成熟既阿晴，面對感情始終冇辦法成日保持理性，擺明係人地錯仲表現出同理心。

「我同阿光去過更衣室扑野。」我細細聲係阿晴耳邊講。