為左追到女神我要成為全級第一！: 第三十九章：

我地決定好大家聽日上我屋企討論下去邊到露營好，順便分埋大家要負責嘅工作。正當我訓得熟睡嘅時候，我手機鈴聲突然之間響起，將我從美夢拉返黎現實，我拎起部手機一睇係小欣佢打黎，我就即刻聽佢電話。

小欣：起身未啊你，我同啊傑啊儀佢兩個食緊早餐啊，食完早餐就會上你屋企啦！洗唔洗買埋早餐比你食啊？唔食既話因間你又話肚餓啦！
我：起左身啦！好啊我而加好肚餓啊！好想快啲食野啊！
小欣：得啦大少！係咪要食早餐C啊？
我：係啊！飲凍奶茶喎～唔該晒！
小欣：真係無你乎！

之後我就係張床跳左落黎，急急腳跑去廁所洗面刷牙順便打扮得靚靚仔仔，搞掂之後我就坐係沙發上面一路睇新聞一路等佢地嘅到來。好快我就聽到我屋企門口有幾把好熟悉嘅聲音，佢地未按門鐘我就已經開左門比佢地，由於我父母去完我家長日之後又要北上工作，所以屋企又得返我自己一個。





佢地比我突如其來嘅打開門嚇親，但好快又無事，佢地入到黎除低鞋之後，啊傑就一野跳去沙發上面坐，啊儀就好似參觀樓盤嘅人一樣係到周圍參觀下我屋企。而我同小欣就坐係飯枱
隔離，我就係到食早餐，小欣就係到玩手機。

佢地等我食完早餐之後我地就開始討論下去邊到露營比較好，啊傑就提議話不如去浪茄灣到露營啊！小欣就問佢個到有咩優勝之處先，點知啊傑接下來句話搞到我地一臉尷尬咁笑，佢話唔知啊我都係果時睇片個個露營地方黎嘅...

之後我地就上網睇下浪茄灣呢個地方，講真我都係第一次先知有呢個地方。佢兩個女仔睇完去過個到露營啲人影啲相就異口同聲話就去個到露營啦！佢地比我睇浪茄灣啲日出相，個一刻我就比日出既景色吸引左，腦海中係到幻想到時同小欣一齊睇日出係一件幾浪漫嘅事呢！

傾完去邊到露營之後就要諗去露營要準備啲乜嘢，我地都係上網搵資料，記低晒要買既野之後準備去露營前幾日先至買。見而加冇野好做我就提議不如一齊玩下紙牌棋類遊戲，不知不覺我地由早上玩到去下午，大家都開始見肚餓，小欣就突然提議不如今晚係到煮飯食啊！

小欣同啊儀襯街市仲未關門拿拿臨衝落去買餸，留低我同啊傑係到...我同佢就一邊睇電視一邊等佢兩個返黎，唔知佢兩個會煮咩餸呢。過左半個鐘左右佢兩個終於買完餸返黎啦！返到黎就入去廚房開始煮野食，佢地為左唔比啊傑係廚房到搞事，竟然唔比我地睇佢地煮野食，希望我個肚今晚會無事啦。