為左追到女神我要成為全級第一！: 第二十四章：

話說今個月出左一套勁好笑既喜劇電影，啊明自私同女仔睇完之後同我講話套戲真係會到肚痛，強烈建議我要去睇。所以我就問下小欣佢有冇興趣去睇，佢話睇過預告都覺得幾好笑，於是我地就去左旺角戲院到睇戲。

好耐都冇同小欣一齊單獨睇戲啦，我地買左個細爆谷同兩杯可樂就入場睇戲，睇緊戲個時因爲我要食爆谷，於是就伸手落爆谷盒到，點知個時小欣佢都想食爆谷都伸左隻手落黎，就係咁我隻手掂到佢隻手，個一刻我心跳跳得異常地快，為左唔好咁尷尬，我就細細聲咁同佢講比你拎先啦，小欣都係笑住咁同我講好啊唔該....

好快我地就睇完套戲啦，果然同啊明講既一樣，我同小欣都笑到肚痛。前幾排小欣同我講過話佢出左糧想買下新衫，所以今日我就陪佢去買衫，我地去左附近啲服裝店行下，小欣見到有件衫幾靚，於是就走去試衫，佢換完出黎問我好唔好睇啊，我二話不說立刻答好睇啦！

佢聽完之後就話好啦咁我買架啦！我：嗯！之後我地就繼續周圍行下，最終小欣佢買左三件衫一條褲同一條連身裙。原來唔經唔覺已經6點，由於我地要遲30分鐘先可以入去，係個wts群組入面見到大家都好努力咁去佈置。

我同左小欣講今晚我同啊傑啊儀同啊明一齊同你係派對屋到慶祝，但冇同佢講話仲有成班人都有份，咁我都想有少少驚喜比佢既。佢聽到話有得去派對屋到慶祝就好興奮，我見佢咁興奮就問佢做咩咁興奮
小欣：人地咁大個女先第一次去派對屋咋！




我：下，乜原來係咁啊！
小欣：係啊，本身之前都有機會去既，但係個時屋企突然有事，所以就去唔到啦...！
我：咁你今晚盡情咁去挽啦！
小欣：一定啦，我仲要係咁影相啊，你要幫我揸機啊！
我：知啦小欣娘娘！

好快我地就去到派對屋樓下，啊儀同啊傑落左黎接我地，佢地見到我地都係白衫黑褲同黑裙，就異口同聲講左句嘩！洗唔洗咁夾啊！曬死人咩！而我同小欣都一齊講左句快啲行啦！
去到派對屋門口，啊儀係個褲袋拎左個眼罩要小欣戴上佢，話有個好大既驚喜比佢，小欣就笑晒口咁講有咩咁神秘啊，但佢都戴上個眼罩。我同啊儀就扶住佢入去，我地話停先好停啊，我入到去就見到成班人都手拎生日花炮。

啊儀話停小欣就企左係到，啊儀話數五聲之後就除左佢啦，我都唔執輸拎左個生日花炮黎。五，四，三，二，一！當小欣除底眼罩個一刻，我地成班一齊大叫生日快樂啊林小欣！小欣佢頓時比眼前既景象嚇親，但隨即就眼濕濕，跟著啊儀同啊心個啲女仔就行過去安慰佢。





佢平復好心情之後就露出佢個招牌笑容問我地幾時背住佢做左咁多野架，好多謝你地啊！嗯呢一幕啊明都有拍落黎，可以比小欣佢留念一下。

就係咁小欣既生日派對就開始左。