為左追到女神我要成為全級第一！: 第五章：

我地學校天台可以望到無敵大海景，如果黃昏上黎天台仲可以睇到日落既美景。我望住佢既側臉，臉頰帶點櫻色，十分可愛動人，個時仲有股女神光係佢身邊散發起來。

突然我有種心跳加速既感覺誕生，難道呢個就係戀愛既味道？但係而我而加既質素， 毫無疑問一定有一種賴蛤蟆想食天鵝肉既感覺，小欣佢天生自帶仙氣，而我天生自帶頹氣，我同佢點都格格不入。

唔知點解有種自卑既感覺，不過算啦都唔知小欣佢點睇我。我見小欣望住過海望得好入神，於是我就輕輕咁拍下佢，問下佢有咩感覺。
我：諗咩諗得咁入神啊？
小欣：冇啊近排屋企發生左啲事姐...
我：係咩，可唔可以同我講啊？
小欣：同你講都得，但你要答應我唔可以同其他人講，如果唔係你就知死！
我：好啊，如果我講左出去，我就不得好死！




小欣：你話架，唔好抵賴啊！

但係由於就快到半個鐘限時，所以我同小欣講不如去學校附近個海傍傾啦。講完之後我就帶左小欣去海傍坐底坐，而我就準備聽佢既經歷。原來小欣既爸爸因為生意失敗左，所以欠左十幾萬債，搞到佢地成家要搬去一間較細間既屋住。

聽完佢講完之後，我輕輕拍一拍佢，叫佢唔好灰心啦，咪就當呢個係上天比佢既挑戰囉。我望一望手錶，先發現原來都五點幾，於是我問佢洗唔洗我送佢返屋企，點知佢話唔洗，所以我送到佢去學校就同佢分道揚鑣，不過臨分開個時小欣佢都有講聽日見啦。

返屋企之後，唔知點解我竟然會係個封塵已久既櫃入面搵返本英文書出黎，然後仲要望左一兩個鐘...就算戰友搵我出山血洗峽谷，但我下意識咁拒絕晒佢地，我除左小學之外，都好耐冇浸淫係書香中。

睇返本英文書發現自己真係一敗塗地，成章竟然得三至四個生字係有印象...如果唔係有谷歌大神出手相助，我諗我起碼要多兩個鐘先明成章講咁乜...





用左咁耐腦細胞，都開始有啲眼訓，我出房食完晚飯，沖埋涼就秒速上床訓覺。