[真人真事] 我係一個專門收兵娘娘，即係ptgf: 日常爭霸

//白雪公主不多
認命扮矮人的有太多個 早有六個
多我這個不多 我太好心還是太傻//
https://youtu.be/Ei_rxBWzeh4

入到班房，我返咗座位休息，而呢個時候班主任入咗嚟。

「各位同學，真係非常抱歉。過往嘅星期入面，我都忘記提醒你哋講日水運會要注意嘅事項，所以而家緊急呼籲...」何老師一邊氣喘一邊宣布。

我梗係唔會浪費時間聽垃圾講解垃圾，所以我即刻將檯面嘅雜物移至抽屜入面，準備趴喺桌上呼呼大睡。





就係咁安睡咗2個鐘，下課嘅鐘聲響起。

「起身啦。」旁邊嘅子霖拍一拍我嘅肩膊。

「放學啦咩？」我揉住眼睛問。

佢見到我嘅惺忪樣貌，忍唔住嘴角向上揚：「係呀，你瞓咗好耐啦。」

「嗯。」我坐直個人，將啲書本放入背包。





忽然，一個黑影伸手向我頭頂。痴線㗎，子霖想伸手摸我個頭呀!!! 我冇得避呀!!!

呢個時候，另一個更大嘅黑影喺我身後出現。

「還返嚿擦膠畀你。」原來係符海熙，佢將擦膠塞咗喺子霖隻狼爪度，阻止佢非禮我啲頭髮。

符海熙係我嘅舊紅顏知己，以前同我好熟稔，我亦都好了解佢。不過自從一年前同佢因為小事爭執之後，我哋即使係同班但都冇交流。喺大部分同學嘅眼中，我哋係陌生人，素不相識。

子霖呆咗，海熙亦都唔願意放手，場面變得尷尬。





「椗瑜，你放學去... 」隔籬班嘅榮安闖進班房叫嚷，見到我哋三個嘅場面亦嚇呆咗。「 ...邊度。」

空氣尷尬到凝固咗，周邊嘅同學亦將視線轉移到我哋身上，想食花生睇好戲。

「嘩。」臻儀最享受就係用我錯綜複雜嘅感情線作為笑柄，當眾嘲笑我。

「我想去廁所。」說罷，我即刻用快過保特嘅步速離開課室。

喺鏡子面前梳洗一番後，我離開廁所，點知子霖竟然喺門口等我。

「你冇事呀嘛？」佢緊張地問我。

有事呀，梗係有事啦！你個咁嘅兵仔想摸我個頭，膽大包天，嚇到我花容失色。





「病人冇咩大礙，而家可以辦理出廁所手續㗎啦。」我用一個九唔搭八嘅答法敷衍佢。我曾經聽過關於理解能力低嘅長者，聽唔明年青人心聲嘅言論。如今我領悟良多，知道唔可以怪責上一輩，因為我哋真係九唔搭八。

「你冇事就好啦。」佢向我展示一個猥褻嘅微笑。

「我趕住返屋企，拜拜。」然後我衝入課室，唔理三七廿一攞起背包就步出校園。

但我唔記得歸還件霉爛冷衫畀榮安，唉。