[真人真事] 我係一個專門收兵娘娘，即係ptgf: 玩具

第一章

//滴血奉獻 待你像偶像
但你任我 天生天養
愛的轇轕 就似家裡 難算的帳//
https://youtu.be/mbKkYeSq8sM

「我好似好耐冇食糖啦。」我小聲嘟囔。

「咁你諗著點算呀？」榮安打住機，抬頭望咗我一眼。





仲要問嘅？梗係代表我想食糖啦，白痴。

「我諗我應該唔打算買糖食嘅。」為免串得滯，我講完之後嘟起個嘴向佢撒嬌。

「但係我打緊機喎，打埋先啦。」佢低頭，一邊操控住遙控制一邊講。

「我遲啲食的話，會死㗎。」我睜大眼睛，楚楚可憐咁，點知佢都係冇望過我一眼。

「等陣先啦... 」佢緊皺眉頭，繼續埋頭打機。





此時，我冷笑咗一下。違抗我嘅命令？不得好死。佢遊戲機上嘅螢幕顯示呢場尚餘8分鐘，而午飯時間仲有18分鐘。我哋共進午餐嘅公園距離學校係3分鐘嘅路程，公園至小食亭就係2分鐘，小食亭至學校係6分鐘。

意思即係，佢打完機之後去買糖再返學校嘅時間非常緊迫，好大機會遲到。

當我plan完個計劃嘅時候，佢啱啱好打完機。

「贏咗啦，我去買糖。」榮安從長凳企咗起身，打算順手執埋啲外賣發泡膠飯盒。

「安安。」我咬到下唇蒼白晒咁同佢講。「我凍。」





呢個時候，乾燥嘅秋風配合地迎面吹嚟，周圍嘅枯葉沙沙作響。我抬頭凝視佢雙眼，營造一個「世界只剩下我們倆」嘅幻覺。

佢神魂顛倒咁除低咗件毛外套，遞畀我：「唔好冷襯。」

我含情脈脈咁將凌亂嘅秀髮翹向耳背後，要求佢幫忙：「你幫我披呀。」

佢嚇咗一跳，然後雙眼發光，將外套一揚，伸手披咗喺我肩膊上度。嗰一刻，我哋好近好近。我不忘喺佢右耳呼咗暖洋洋嘅一口氣，令到佢近乎觸電般。

「你行去買啦。」我輕輕咁喚醒佢。

「哦。」佢轉身就走，但行徑有如醉漢咁，迷迷糊糊咁，連步路都企唔穩。

「我想去廁所，一齊返去學校先。」我望過去左邊，同隔籬嘅旻恩講。





就喺我哋兩個踏入課室門口嘅一刻，上課鐘聲響咗，我就知道我嘅計劃成功咗。

待續