[校園][純愛]《幸運星下的預言》: 第一百三十章

或者喺情場入面，

我仍然係一位新手

重未參透呢個遊戲點玩

我同Brenda又係拍咗一陣就分手

半年?八個月



我都唔記得喇

同Zoie嗰次一樣，

講分手嗰晚，

我都覺得算係和平嘅

當然啦，



跟住我同Brenda已經冇聯絡

分手之後做唔返朋友

我覺得都正常嘅

佢唔搵我梗係有佢理由

所以我都冇點樣去逼佢



佢唔想聯絡咪唔聯絡囉

依家大家都只係互相follow instagram嗰種關係

入到u連續兩段感情都唔係好長久

同Brenda分手之後，

我喺u就再冇拍拖

你知啦我都係一條毒撚

咁多女仔過嚟搵我咩

我又被動喎



Year3最後一年認認真真安全畢業就算

時間管理自然要做得好啲啦

唔想俾其他人分薄自己時間

所以唔係好渴求拍拖

亦都冇一個令我會破例嘅人出現

哈哈吹到有得揀咁樣

依家喺度講出嚟都打冷震



好彩最終都順利畢業

我好記得老豆老母嗰日嗰個樣

我唔明點解咁開心啦

你問我我淨係覺得

做返一個真真正正嘅男人

講得出做得到

因為咁我先開心啫

我估佢兩個都唔知佢地個仔咁尊重呢個承諾



呢啲咁感性嘅野唔講出口啦

自己知咪得

影完相之後，

我就叫老豆老母返屋企啦

我同成班同學傾計玩多陣先

熱鬧過後有個空檔自己休息下

我坐咗喺度自己諗



好快就唔再係學生，

真係要行出嚟社會

迫於無奈接受呢個咁大考驗

唔怪得楊千樺講過，

畢業之後先知一世都要考試

呢刻個感受最深

我知自己好快唔可以再坐喺度咁樣慢慢諗

出到嚟做野講效率

重有咁多時間喺度諗咩

趁住依家勉強都重係一個學生，

要懷緬過去就懷緬

計劃將來就計劃

呢個係學生身分嘅福利

第日唔可以咁奢侈。


跟住就坐喺度瞇埋眼，

諗咗好多野，

依家重記得當年考A-Level嗰陣嘅事

越諗就覺得以前自己低能

其實根本就唔可怕

以前唔識諗冇經驗

就覺得A-Level最惡哽

又諗下第一日入嚟呢間u嗰陣啲野啦

真係一個p牌仔

乜都唔識

唔知邊度打邊度

依家

戴住眼罩都識行

呢個就係過咗三年嘅證據

唔到你否認

要交FYP嗰陣，

無數次覺得好難捱

點解時間過得咁慢

去到呢一刻調返轉

原來三年其實係好快過

雖然感情生活唔算好美滿

不過整體嚟講我都覺得唔錯架喇

你當我冇乜大志

好容易就滿足

係呀順便喺度講埋

雖然大家唔同u，

有啲更加已經出嚟做緊野

不過同中學嗰幾個friend聯繫依然非常頻密

呀澤啦，司徒啦，映彤啦

重有幾個我就唔喺度一一詳述喇

我同呀澤兩條友真係好撚無聊

成日過去大家間u嗰度玩埋啲戇鳩野

應該係得佢先會同我玩埋呢啲咁撚無聊嘅野

映彤週不時問我放學之後去邊度

唔通我同佢講我要去CU玩人咩

鬼叫近咩一架火車就到

有齊天時地利人和冇理由唔玩丫

咁我當然唔會同佢講做啲乜

返屋企呀去買野呀諸如此類啦

至於映彤

佢同Felix分咗手

都單身咗一排，

佢話大家都有共識

好似越行越遠咁樣

佢真係一個好果斷嘅女仔

話斬就斬，

從來都唔會回望

至少喺我面前係咁啦

我同佢有冇野

冇啦，

話就話大家單身啫

或者識得太耐

已經冇咗嗰種隨時撻著嘅火花

變咗係好朋友嗰種關係

唔係講笑，

有一兩次我真係有諗多咗

佢條友竟然like我ig舊post

你諗下係咪痴線

起碼兩三次

我問佢重喺度扮野

我:「你係咪對我有興趣呀

變態無啦啦like我ig舊post

坐咗好耐」

映彤:「咩呀你講咩呀

邊有咁得閒」

我:「你自己睇喇

唔好話yingtung_0924唔係你呀」

映彤:「呀呀呀

關你咩事啫睇下係咪唔得呀」

我:「幾時開始對我咁迷戀」

映彤:「無聊得唔得呀

食你嘅野啦」

跟住再睇佢反應覺得唔似真係鍾意我

可能佢真係咁撚無聊睇我啲舊post

嚇得我丫

跟住越諗越多，

直至去到最後

我先醒起，

係喎，

唔知嗰個人係咪好似我咁

著住畢業袍

同一片親朋戚友影相留念，

我唔會ff佢好似我咁無聊

一個人坐喺度緬懷以前

邊有咁得閒丫

但係我想講，

我有呢三年嘅生活，

佢一定係居功至偉

冇佢嘅話，

A-Level我有冇呢個成績真係未知之數

直至有個人行埋嚟叫我去唔知邊度呀

我先至睜開雙眼，

唔再漆黑一片

其實真係好想講一啲說話

明知唔會聽到都好，

我都好想趁依家重係一個人嘅時候

望住一片藍天，

細細聲道出

咁先至夠卑微

我希望有一日唔係對住個天講，

亦都唔係內心自言自語

哈哈，

對住佢成日都咁奢侈

永遠有咁多希望

由從前到依家都係咁，

xx:「過嚟呀傑仔

差你咋」

我:「得喇」


「多謝，好耐冇見。」