[校園][純愛]《幸運星下的預言》: 第一百二十九章

Zoie同我拍咗幾個月就和平分手

講你都唔信，

我同佢依家再見亦是朋友

我知你班咸濕仔肯定諗埋啲唔知咩

唔使問肯定係呀



我都可以講完全冇你地所諗嘅野

點解分手

其實唔係由我提出

係佢話做返朋友好啲

講真，



喺呢段感情上面自問自己覺得做得唔錯

係咪有第三者

我就一定冇先

己所不欲，勿施於人

至於佢



我唔敢講完全冇啦

因為我從來唔會check佢手機

呢個行為極不尊重個人私隱

就算佢令我覺得有不安感都好啦

我都唔會咁做

何況佢冇呢

佢再開始拍拖

冇記錯係分手之後年幾兩年



如果真係出軌

咁應該係一分手就拍拖啦

所以你問我

我地分手應該就唔關第三者事

記得嗰晚講分手

大家都唔係好似拍戲咁喊苦喊忽

講講下佢話做返朋友比較適合啲



跟住我就「哦。」咁樣

重叫我唔好送佢返屋企

如果唔係佢會忍唔住

嗰陣我冇將佢呢句說話詳細解讀

依家諗返其實有啲唔明點解佢要忍唔住

我相信呢句說話絕對唔係信口開河

可能係我嗰陣無心裝載

我淨係話咁好啦拜拜咁樣



又估唔到分手之後真係可以做返朋友

唔係真係好深交嗰種

你當係幾個月甚至半年先至出嚟食一次飯咁樣

佢點諗我就唔知

我對佢就冇乜尷，

由講分手嗰陣都係咁

或者事隔幾年真係有進步，



唔想自己再搞到嗰次咁狼狽

話我仆街都係咁講

學識灑脫未嘗唔係一件好事，

冇人話分手一定會唔開心嘅

平常心都得嘅啫，

亦都可能因為咁樣，

所以當初會同Zoie拍拖

佢從來都唔知咁樣諗

點講得出口俾佢知。


咁我都唔會一分手即刻再拍拖

俾人講閒話破壞形象就唔好啦

上到u第二段戀情係year2嘅事

呢個女仔叫Brenda

大家都明白大學最常聽到嘅稱呼都係英文名

我又冇諗點解喎

印象係咁樣囉

當初識佢其實好係無厘頭架

有一次去大房上堂

即係撈埋其他班呢

咁我就坐喺度照例扮聽書

突然間見到有個女仔個口喺度郁下郁下

我就覺得咁奇怪嘅

跟住先知食緊香口膠

咁就開始留意佢

你話係咪好無厘頭

跟住一路觀察啦，

發覺佢個人好靜

基本上都唔係點出聲

可能我被呢種熟悉感影響，

下意識覺得眼前呢個女仔有份吸引力喺度

吸引力對於每個人嚟講都好主觀啫

佢合我眼緣咁解囉

其實佢同Zoie唔係好似

如果講似嘅就得身型同埋膚色

佢兩個都係同我咁上下高

雖然望落去唔算係一件好事，

不過拖手嗰陣隻手唔使放得咁低

錫錫嗰陣個頭亦都唔使烏得咁落

其實都好方便

當然啦鬼叫我自己唔夠高咩

我都控制唔到架

兩個都係一樣咁白

紮辮就唔使講應該好多女仔都係咁

除咗呢啲之外

其實佢兩個嘅特質唔係好相同，

一個靜啲一個好動啲

一個鍾意睇書另一個就鍾意整野食

呀唔係，

共通點重有一個

就係佢兩個都好鍾意問我初戀係咪佢

點知我呃唔到Brenda

我:「咪你囉

重有邊個好似你咁識貨」

Brenda:「我上年見你同隔離班個女仔拍拖啦

蠱惑呀你」

我:「哦

原來嗰陣已經留意我」

Brenda:「同一間u有幾大

平時出出入入都見到啦」

我:「係咪咁留意我啫」

Brenda:「唔知呀

講大話你就最叻」

我:「初戀係邊個有咩咁重要

最緊要隔離嗰個係你

人比人比死人呀」

Brenda:「咁我想知丫嘛

係喎你兩個點解散嘅」

我:「性格不合囉

簡單」

Brenda:「聽講佢唔係好難相處咋喎」

我:「你先蠱惑

一早起定我底」

Brenda:「係喇係喇快啲講啦」

我:「冇錫錫冇得傾」

Brenda:「麻鬼煩」

我:「講多次嚟聽下」

Brenda:「講咩呀」

我:「冇野喇」

Brenda:「錫咗喇

唔好走數呀」

我:「明走你呀」

Brenda:「死人頭又呃人」

我:「性格係好嘅

不過可能佢覺得同我唔係好啱做情侶囉

同你有火花啲」

Brenda:「都唔知邊句真」

我:「句句都真」

Brenda:「頭先你先吹水

又話我係你初戀

明明就係隔離班嗰個女仔」

我:「痴線

都係嗰句依家隔離係你咪夠」

Brenda:「咁又係呀」

好彩，

佢都唔知。