[校園][純愛]《幸運星下的預言》: 第一百二十六章
大家都知
八月頭先會公佈大學聯招結果
我呢啲廢青其實都係冇咩做
同下呀澤，司徒，映彤呢幾個出下街咁囉
呀澤，司徒佢兩個會密啲
始終映彤依家拍緊拖
我自己都唔想成日同佢兩個單獨出嚟
我又識佢男朋友嘅
係呀，
我係各自同佢三個出
唔係四個人一齊行
因為佢三個大家其實唔算好熟
到時幾個一齊出嚟，
我應該理邊個呢
難免會出現厚此薄彼
既然係咁就算啦，
反正時間又唔係冇
呢日同佢
聽日就同另一個
依家咁多時間
又冇人要陪
佢地約咁我就出架喇
大家都易話為
經過一個月頹廢生活
話咁快就去到Jupas放榜嗰日
我記得嗰日一早起身
落去樓下食定個早餐
返到屋企冇人再打埋個飛機
然之後進入聖人mode
整下整下都就嚟九點
依家我唔知係咪九點啦
原諒我脫離校園生活實在係太耐
真係唔熟悉依家啲資訊
當年我就係九點嘅
我仲好記得一搭正九點就上jupas個網
諗住先聲奪人啦
我屌點知上唔到喎
應該係太多人
等咗幾個字我先睇到
唔呃你，
我最後入咗A1
其實都唔係好興奮
你知我排嗰陣點解揀A1啦
跟住就即刻報平安
雖然雙親未必好了解係乜，
不過佢叫我打俾佢咪打俾佢
我呢啲毒撚
個電話冇幾可會咁受歡迎
嗰刻真係不停響
撳嚟撳去就係接聽同埋撥出
順便講埋其他人點啦
呀澤入咗去CU
原本我冇諗住喺度打出嚟
點知佢話咁多年前唔驚架喇邊有人相認
相認又點啫
咁囂張一於就爆佢大鑊
如果有讀者係CU同學仔嘅話絕對可以搵我
映彤真係同我一間
不過就唔同科
佢都係派得唔錯
Felix就唔係
我地幾個內斂啲就唔講邊間喇
總之我嗰間交通都幾方便
近地鐵站贏咗一半啦
當然啦小弟冇咁叻仔入kong u
咁究竟同邊個東鐵站近呢
自己估下算喇
經過一輪繁忙
同晒咁多位講完之後
望住個電話，
諗咗一陣
好唔好打過去呢，
結果都係算喇唔好搞
依家都只係自己知道自己犯賤
你打咗過去咁就連人地都知架喇
我嗰陣同自己講，
俾多一個月我，
一個月之後去到u，
就真係唔會再諗埋啲無聊野。
當年我有去玩ocamp
映彤佢就冇因為撞咗去旅行
唔緊要啦
以佢性格實識到人
女仔又唔係豬扒咁就得架樣諗喇
佢重要健談添
我就唔係呀
你知啦死毒撚唔去ocamp容乜易俾人杯
依家行新制就讀四年
我當年嗰科同大部分人一樣都係讀三年啫
講真你都唔想嗰三年係咁俾人杯
喺我角度盡快埋堆係最方便嘅做法
我亦都相信大把人都係咁樣諗
大家目的差唔多咁就易辦事啦
真真假假又有咩所謂
咁當然就唔好太假
唔需要話掌握得好精準，
相處幾日自自然然可以拿捏到個尺寸
去到就識架喇
依家紙上談兵再詳細都係冇用
玩完ocamp過多一兩個禮拜就正式開學，
你知我最鍾意喺夜闌人靜嘅時候思考
臨開學前嗰日
我同自己講，
聽日開始我就係大學生
五月嗰陣話要放低，
依家證明得個講字啦
我俾埋藉口自己
可能太眷戀中學生呢個身分
唔捨得同中學生涯完全分割，
但去到聽日冇得再俾藉口自己
因為確確實實唔再係中學生
我預咗有可能入到大學仍然都會見到佢，
見到咪見到囉
冇野，
我最希望自己係呢個反應
今晚係最後一晚諗佢
我都唔想去迫自己唔記得，
分咗手都可以記低開心野啫
但我知道自己嗰啲婆媽性格，
唔用強硬嘅手段我係走唔出個困局
呢幾個月你都知啦，
我記得嗰晚我好唔爭氣
眼淚又唔聽話，
不自控落咗去枕頭嗰度。
去到第二朝
我就去返尋日同映彤傾好嘅地點嗰度等
冇幾耐就見到佢過嚟
跟住好正常丫咪一齊行囉
映彤:「睇死你未食野啦
」我:「料事如神啦你
唔夠你玩喎
」映彤:「嗱
」跟住佢拎咗件三文治出嚟
唔係呃你嗰下我真係呆咗一呆
映彤:「你知唔知我為咗你呀
咁耐冇搵佢
尋晚就係特登問佢你條友朝早食唔食野
跟住佢話你會食三文治
於是我就喺樓下買俾你
警告你唔好唔食
」我:「好感動喎映彤姐
」以我所知
自從我分手之後，
映彤佢都同筱喻斷咗聯絡
如果佢冇呃我咁我真係幾多謝佢嘅
為咗我，
同一個已經冇聯絡嘅人聯絡返
跟住我打開嚟睇
唔係我最鍾意兼食得最多嘅腿蛋治
而係一塊餐蛋治
係時候轉下口味喇
唔可能永遠都抗拒新事物
舊嘅唔去新嘅又點嚟
朋友買俾我冇理由唔食丫
除非望到都唔開胃，
咁呢件又唔係
一擺落口
我:「好食喎喺邊度買
」映彤:「我樓下咋嘛
食完就行啦
」唔係講笑真係幾好食
順便可以講埋，
之後我地每次撞啱一齊返早嗰陣，
佢都約埋我一齊返
跟住就隊份三文治過嚟
唔收錢喎梗係食啦，
況且都真係唔錯·
話說回頭
估唔到大學生嘅第一日朝早都係食三文治
呀唔係，
唔應該用個都字
因為根本就唔同，
對於睇緊嘅你地嚟講，
可能覺得好簡單
只係腿蛋治同埋餐蛋治嘅分別
但係對於置身其中嘅我就複雜得多，
絕對唔係咁簡單
你話我中二病又好乜都好啦，
呢個係大學同埋中學嘅分別
最重要嘅一點，
就係有佢，
同埋冇佢嘅分別。