[校園][純愛]《幸運星下的預言》: 第一百二十五章

畢業禮真係冇乜好講

咁不如直接跳去A-Level放榜

講真嘅，

之前嗰晚我又唔覺得真係好緊張

可能嗰陣唔係好清楚張證書嘅重量啦



淨係知道緊要，

不過唔知有幾重要

都係打完機跟住上床瞓覺

第二朝起身

諗咗好耐究竟著校服定係便服



最後都係決定著校服，

今次真係最後一次以中學學生身分入去呢間學校

件校服如果你唔揼嘅話，

可以著嘅機會多的是

不過意義都唔同啦



趁今年度學期重未正式完結，

正式嚟講我仍然係一個中七學生

最後一日希望好嚟好去

即使出面點樣熱，陽光有幾猛，

都係選擇著一件白色恤衫加一條黑色西褲再配一對皮鞋

同當年第一日入嚟嗰陣一樣

我諗我冇乜邊個唔想完完整整，

有頭有尾咁樣結束



可能你地覺得好無聊啦，

返學校拎成績表著咩衫都要諗咁耐

你咪當我得閒冇野做囉哈哈

著完之後就出門口，

同呀澤一齊返學校拎張成績表

入到學校各散東西去返自己班房

去到課室，



真係好似拍戲咁樣

籠罩住令人窒息嘅氣氛

人就好多，

但係全部一言不發

玩手指嘅有趴喺度嘅都有

聽歌嗰啲梗係唔少得啦

以往最嘈嘅班房，

原來真係可以會一刻鴉雀無聲



我都好相信在場嘅人日後會各奔前程，

我地相處嘅時間，

依家真係去到倒數嘅階段

準備派之前

老師講一大堆肺腑之言就梗架啦，

我唔知有幾多人有聽啦

你知啦好多人都係扮聽



無他嘅，

因為嗰陣嘅環境甚至自己嘅情緒

再加上腦入面咁多野諗

邊度再得閒接收其他人講咩丫

我諗嗰陣好多人都係同一個諗法

就係講完未呀

派啦屌。


講完一輪終於開始派

佢跟學號派，

你知啦我姓張C子頭學號梗係偏前

我都特登留意頭幾個拎完嘅同學嗰啲表情

大約都估到理想定係唔理想

你問我就梗係想好似兩年前會考咁樣啦

拎完之後笑逐顏開

信心就有嘅

冇就死得啦用咗咁多時間

唔係話有一定得

不過比較有把握咁解囉

冇幾耐，

終於聽到miss嗌我個名

咁我就行出去拎啦

嗰陣我特登冇望miss

行出去接完講唔該就算數

諗諗下，

如果見到成績好我都驚自己忍唔住歡呼

你知啦唔係個個咁好彩，

喺成績唔好嘅同學面前咁做，

咪即係火上加油

如此低劣嘅行為我又點會做出嚟呢

調返轉當我諗衰啲

自己個分唔好，

忍唔住喊嘅時候

成班人見到我咁樣好瘀架嘛

我又驚到時忍唔住顧唔到咁多喎

所以拎完之後即刻出去班房

慢慢打開，

即刻yeah咗出嚟

見到個分符合預期

好難唔係咁嘅反應

好彩真係出嚟先打開

如果唔係我驚我俾人打

呢個分總算唔錯

亦都好慶幸付出嘅努力冇白費

其實嗰刻心情好亂

雖然話個分符合自己嘅預計

不過真係有啲興奮，

但係又唔敢咁暴露

冷靜完之後去搵呀澤

佢條撚樣高我兩分

不過佢就忙啲因為要返去改次序

知道條契弟咁好成績就夠

我見冇乜野做，

理所當然返屋企啦

走之前我先醒起，

係喎我想屙尿

哈哈，

硬係咁唔老實

途中經過其他班嘅班房

真係咁啱架咋，

如果唔係急尿我唔會行呢邊

要咁啱嗰日我唔係望左邊嘅風景

而係望右邊嘅班房，

見到一個女仔，

明明人地都唔要你

當你係水泡

自己硬係咁犯賤，

喺度諗佢啲野

明明已經同你冇關係啦，

佢都係好似之前咁見我唔到

淨係望住自己張成績，

好想問佢考成點，

諗諗下都係無謂

我嗰陣俾藉口自己

如果我依家唔急尿唔行過嚟，

今次一別真係唔知幾時再撞返

或者我自己諗多咗，

佢唔會改次序一樣入同一間u

咁如果佢改又或者失手呢，

到時唔同u，

人海茫茫之下幾時先再見得返

唔係好似中學咁樣，

禮拜五見完三日之後禮拜一再見

到時係好多好多個三日

甚至乎連自己都唔知係幾多個

當然我係唔會咁傻俾佢知我咁樣諗，

所以都只係隔住一個窗望佢

跟住就走喇，

正式結束中學生涯

如果唔行過嚟嘅話，

根本就唔算好嚟好去。