[校園][純愛]《幸運星下的預言》: 第一百二十章

大家都知啦

oral不嬲唔係全部人同一日考

唔同筆試

所以我同埋筱瑜兩個考試個日期係唔同

我就考先過佢



考之前都有出過兩次街嘅，

呢兩次我同佢都冇乜野講

我好落力去諗話題

唔知點解得出嚟個反應都係唔好

我冇諗過我同佢會有呢個情況出現



依家唔可以再話係偶一為之，

兩次都係咁喇

之前你一言我一句嗰種情況不復見

及後佢都話想溫返多啲書喇

就嚟考試，



我唔知佢係咪搵溫書做藉口啦

可能佢都覺得大家冇野講

咁咪冷靜下囉

定還是真係溫書啦，

總之嗰刻我就同意呢個決定

我係好唔甘心

一路行返屋企嗰陣我都一路話自己

係咪真係自己問題，



搵唔到話題呢方面真係責無旁貸

我真係唔明點解忽然之間可以冇晒嗰種火花

我有聽呀澤講，

究竟我地之間係咪多咗個人

所以喺第二次出嚟嗰陣

我有特別觀察筱瑜，

我見到佢聽咗個電話



佢講電話嗰陣，

面上展露嘅表情正正係我認識嘅筱瑜

好寬容，

呢個電話佢特登行開講

所以我聽唔到佢講啲乜

返嚟嗰陣我循例問佢係邊個，

佢話係家姐囉

跟住我就覺得有啲奇怪



平時佢家姐打過嚟佢唔會特登行開聽

當然你都可以話，

可能今次大件事呢

但我睇佢個表情完全唔凝重

唔似係一般聽到大件事嘅反應，

當然啦可能呢單野我唔聽得

所以就特登行開講，



不過真係咁巧合

識咗佢咁耐從來冇試過行開講電話

偏偏大家依家個關係有啲停滯不前，

佢就行開講

甚至呢個真係佢家姐

腦入面有好多種諗法，

不過我冇講出嚟

淨係話「哦，原來係咁就算。」

亦都冇打算偷睇電話

畢竟我都覺得咁樣好唔尊重

講真我真係好想睇係邊個，

或者最尾係唔敢睇啦

親身證實或者真係好大衝擊力

所以我選擇一直扮唔知，

可能係我自己諗多咗呢

直至一個電話出現之前，

我都係抱住呢個諗法。


我記得嗰日係我考完英文oral，

一出嚟就打俾筱瑜，

佢都有聽我電話

咁我就同佢講返頭先嗰啲情況啦

講講下佢話屋企整緊野

唔得閒咁就冇講喇，

其實我都知依家同佢講電話唔會講得好耐

可能係我厚面皮

偷得一刻就一刻呢

保持個機會又好，

鞏固返大家關係都好啦

總之個出發點都係想變返以前咁樣

好明顯，

暫時進度就唔理想

跟住行行下我個電話就響

我以為係筱瑜，

咁就滿心歡喜拎咗個電話出嚟

一望原來唔係佢

而係眏彤

佢好少打俾我

咁就梗係聽啦，

我:「做乜」

眏彤:「你喺邊度呀」

我:「啱啱考完試依家行緊返去囉」

眏彤:「你今日考呀」

我:「係呀

你邊日丫」

眏彤:「唔係講呢啲野先」

我:「你想講咩先慢慢嚟」

眏彤:「你有冇搵過筱瑜」

我:「有呀頭先打咗俾佢囉

佢話喺屋企整緊野丫嘛」

眏彤:「下

佢咁同你講呀」

我:「你想講咩先」

嗰一刻我有預感，

我會聽到一樣自己唔鍾意聽嘅野

眏彤:「你依家過嚟學校附近個商場丫」

我:「做咩先得架」

其實我估就估到啲架喇

只不過佢一日未開口，

我一路扮傻詐唔知咁解啫

眏彤:「我見到筱瑜同緊個男仔行呀

就係喺個商場，

如果唔係做乜打俾你

快啲嚟呀十萬火急

我依家跟緊佢」

我:「咁我依家嚟

一路講定係點呀，

你會唔會聽到佢兩個講咩呀」

眏彤:「唔會依家都有啲距離

你兩個做咩事呀，

原本我以為個男仔係佢朋友又或者親戚嗰類

所以想打俾你問一問

點知你話佢同你講喺屋企整緊野

即係話」

我:「依家嚟緊有乜到時先講

咁啦我到咗之後打俾你」

嗰刻我就即刻跑去商場，

跑嗰陣順便整頓好自己嘅情緒

所以唔可以一直講電話

因為當時個腦有好多諗法，

好亂，

咁又點樣傾計呢

依家冇得再呃自己，

因為有人睇到佢同另一個男仔行街

同我講嗰個人亦同佢係好朋友

我亦都好了解同我講嗰個人嘅性格，

半信半疑唔會講出嚟

更加唔會為咗無聊而無啦啦叫人出嚟

我唔認為有刻意中傷佢嘅可能性

再加埋近期發生嘅事，

種種原因都令我覺得去到現場就一了百了

親身證實個衝擊力點樣大都好

我唔係話唔信我女朋友，

應該咁講，

以我嗰陣唔嗲唔吊嘅性格，

佢講完之後個原因而我覺得合理嘅話

我諗真係可以當冇發生過

相信大家都明白，

人真係冇可能任何時候都保持客觀嘅態度

特別係對住一個咁鍾意嘅人

不過點都好，

一陣都要一五一十講清楚，

我希望係我估錯。