[校園][純愛]《幸運星下的預言》: 第九十二章

好快就放暑假

暑假真係冇咩特別

呀唔係嘅

我同佢都叫多咗一樣活動

就係一齊去溫書



兩年前準備會考嗰陣

我就係得自己一個，

兩年後今日邁向A-Level

身邊多咗一個女朋友陪我去迎接呢件大事

冇計啦嗰陣見識少



睇到A-Level好重要

成個世界都係圍繞住佢，

歷練多咗先知A-Level對比往後嘅事，

根本就不值一提

我唔講乜就講社會丫，



淨係玩人心都已經玩死

喺公司做嘅野

甚至只係講一句說話

都要步步為營

之前我喺度都講過啦

咁就唔嘥時間重複，

不過講開又講

都係多得筱瑜



我先知自己原來童心未泯

點解咁講呢

話說小弟不嬲將鼓勵唔係睇得好重

覺得有同冇都差唔多冇乜分別

對於我嚟講，

呢個行為唔足以成為一個推動力

一直以嚟我都係咁睇



誰不知原來唔係

原來嗰陣嘅我，

暗地裏都重有一份童心。


話說有一日

我同佢照舊出嚟溫書，

做做下真係遇到樽頸位

你當係chem嗰邊嘅野



邊個topic我就真係唔記得咗

總之唔係我擅長嘅範圍

我見佢好專心做緊野，

咁就冇煩佢自己坐喺度

好快佢就察覺到

筱瑜:「做咩呀

邊度唔識呀」

我:「呢度囉」



筱瑜:「你只要咁咁咁就得喇」

跟住佢講咗一輪，

筱瑜:「有咩唔識唔使驚阻住我」

其實佢真係好了解我

佢連我點解唔問佢都估到

講真嘅，

我唔想因為我拖累佢嘅進度

之前都有講啦，

佢係一個好自律嘅人

邊日邊日做乜，

做完之後跟住點

佢全部都有計劃

我唔想因為我搞到佢進度停低落嚟

係呀嗰陣我真係好單純咁諗

我:「我知

不過唔想煩到你丫嘛

條條都問你咁到時你點樣溫呀」

筱瑜:「溫故而知新呀

重有呀，

你有唔明點可以唔幫你」

我:「都係我水皮搞到你」

印象中我冇試過咁樣放負

可能嗰排真係遇到樽頸位

又有啲壓力

早排我有講過點解咁想入u啦，

所以情緒不自覺地變差

筱瑜:「傑仔呀你望住我先」

嗰陣心諗唔係掛，

喺度錫錫咁明目張膽

當然一秒之後佢就釋除我嘅疑慮

好明顯係我諗多咗

筱瑜:「唔准咁話自己呀

個個都會唔識唔明架啦

咁唔通個個都渣咩

講真你真係好醒目好聰明

講幾句你就識

自問都唔係一個講得好叻嘅人」

我:「你都講得唔叻

唔係掛」

筱瑜:「係呀

得你一個聽得明我講乜

咁你話你係咪好醒喇」

我又唔係真係傻嘅

梗係知佢想點啦

我:「多謝你囉咁識講野」

筱瑜:「記住，

唔准再咁諗

我呢個女朋友不嬲對你好寬容丫係咪先

就當今次俾面我

命令你唔准再咁樣諗

知唔知」

我:「唔知會點呀」

筱瑜:「唔知就

以後臨走都冇goodbye kiss」

我:「你好毒呀」

筱瑜:「係呀咁你知啦」

我:「冇goodbye kiss又點啫」

跟住一下就錫咗佢塊面

好彩隔離冇人，

筱瑜:「搞錯呀死人頭原來扮野」

我:「係呀

鬼叫你咁靚女

係要諗下點樣錫你」

筱瑜:「唔睬你呀溫書」

原來鼓勵真係好有用

簡單幾句說話同埋一個眼神

已經係一支無可取替嘅強心針

多謝你丫。