[校園][純愛]《幸運星下的預言》: 第九十一章
跟住我地去咗食飯
畢竟今日都係佢請
咁我都唔想食咁貴啦
女朋友都係咁話
雖然食一餐所謂好啲嘅
都唔會對佢有咩負擔
不過佢依家都始終係一位學生
經濟方面都係倚靠佢屋企人
費事食咁貴啦
甚至乎我話自己俾自己都得
係佢話男朋友生日點可以唔係由作為女朋友嘅佢請喎
我先至被佢屈服
真係奇怪俾錢都咁開心
哈哈又或者扮野呢
其實就好唔鍾意不過扮到好興奮
講笑啫我諗佢唔係咁諗掛
我:「一陣唔使食蛋糕
因為我麻麻地
你真係鍾意食先買啦
」筱瑜:「你話點就點啦
唔鍾意食咪唔買囉
冇問題呀
不過唔係你講一講我真係會買哈哈
」我:「唔使喇
」筱瑜:「不過禮物唔可以唔收喎
」我:「下
你講真
你唔係送咗俾我喇咩
」筱瑜:「送咩呀
」我:「你個人囉
18歲生日整咗個又靚又叻嘅女朋友俾我
我好易滿足架
」筱瑜:「低b
」我:「我就唔介意收多份嘅
」筱瑜:「一早買咗喇
就係等今日先送
」我:「乜撚嚟架
」筱瑜:「如果你之前冇講大話
你就會鍾意嘅
」我:「咩呀唔知你講乜
嗰件禮物我同你講過
」筱瑜:「係呀
」我:「死喇點解我冇乜印象嘅
我有同你講過我鍾意啲乜
」大家都知
我都係正常嘅男人
鍾意啲乜心知肚明啦
我記得我就冇同筱瑜講過嗰方面啲資訊
唔係佢介意
而係我覺得同佢講冇癮
依家佢話我有同佢講過我鍾意嗰樣野
真定假呀
我點會同佢講成人話題呢
係咪佢記錯咋
跟住我係咁問佢究竟係咩禮物
佢話好快就知唔答我住
你知啦俾人吊癮好攞命
搞到我係咁喺度諗究竟佢會送咩禮物。
食完飯行一陣我地就搭巴士返屋企
筱瑜:「今日你覺得點呀
」我:「第二個就話鳩之佢
有你陪住呀做乜都好啦
」筱瑜:「喂呀想聽真話
口花花
」我:「你唔係鍾意聽我就唔講啦
對住其他人講唔出
淨係識對住唯一嘅女朋友講
」筱瑜:「語氣唔同嘅話我諗都真係幾甜
」我:「傻豬嚟嘅所以話你識咩
知唔知男人用講笑語氣講嘅說話先至係真話
」筱瑜:「係咩真係唔知喎
又睇下你點講
」我:「就係因為好難講出口
先至扮到輕鬆啲咁解啫
咁樣易啲開聲
係你地啲女人唔信成日話人吹水
」筱瑜:「嬲呀小氣鬼
」我:「冇呀都係咁講啫
」跟住佢即刻貼埋嚟喺我耳仔邊講
語氣亦都好溫柔
筱瑜:「講笑咋點會唔信你呀
鍾意得你，
我對你就百般信任
幾時問我都係咁講
」我:「幾時都話呢個女朋友冇得頂
又靚又識體諒人
煮野又叻
不過究竟係咩禮物
」筱瑜:「落車先啦
依家架車多人
唔想影響其他人
講又講得唔盡興
」筱瑜永遠就係咁
任何時候都會設身處地去諗，
呢點真係咁多年都冇變
嗰種程度我都真係覺得過於誇張
唔怪得對住我可以唔發脾氣
坐下坐下就落車，
跟住佢唔知喺邊度拎咗個盒出嚟
筱瑜:「你自己打開啦
」一開原來係一個銀包
有啲熟口面不過突然間醒唔起
我:「好靚喎多謝
」筱瑜:「你話鍾意架
就係咁我先買低
」我:「屌記得喇
係咪上次幫你表弟買禮物嗰次見到
」筱瑜:「你依家知點解嗰日唔聽你講啦
我唔係唔聽你意見
所以唔將佢送俾表弟呀
」我:「原來係咁
不過講真我真係冇嬲
對住你真係嬲唔出
」筱瑜:「小氣鬼扮野
嗰次我就唔信你真係冇嬲
又唔講得喎因為要俾驚喜你
」我:「點樣嬲都唔夠依家咁開心啦
多謝因為我都覺得真係好靚
」筱瑜:「鍾意就好喇
」講下講下都返到佢屋企
我:「拜拜喇靚靚女朋友
」筱瑜:「等陣先
」跟住我一擰轉頭諗住問佢咩事嗰陣，
佢成個人急步衝前
然之後我就見到佢同我貼得好近
再一兩秒之後佢就成個人嘴埋嚟
初吻呢回事，
一生都只係得一次
每個人都係咁，
從來唔會有例外
一過咗就冇，
所以我要好努力去記住嗰刻嘅感覺
日後錫幾多次都於事無補
第一次的而且確係最矜貴
永遠都唔會被取代
我個初吻?
其實個感覺真係好奇怪
淨係feel到個嘴濕濕地
同埋佢隻唇膏味好好聞
應該係果香嚟
可能大家會問筱瑜食完飯就錫埋嚟
咁大家可以放心，
筱瑜係一個極度注重口腔衛生嘅人
啱啱識佢嗰陣有講啦
衫袋褲袋梗係有香口膠
冇嘅話都會有薄荷糖
再加上成日都見佢飲水
同佢傾計永遠都唔使特登擰歪面
因為關於口腔嘅護理
佢真係做到好足
對於我嚟講，
完全冇唔好嘅感覺
不過咁，
我嗰刻真係反應唔切
大佬話晒都係初吻
咁又點會有經驗呢
淨係識企定定
直至幾秒之後就分開，
呢個時候已經見到佢面紅紅
我諗我都有嘅
因為覺得耳仔好熱
筱瑜:「初吻……
俾咗你喇
希望你會記得自己嘅18歲生日
隔離係有個女仔陪你度過
返到屋企同我講聲啦
拜拜
」嗰陣我冇話自己一定記得，
因為記唔記得從來都唔係呢一刻可以講嘅野
依家講到天花龍鳳都係冇用，
你問返依家嘅我就答到喇
我諗至少都冇令佢失望嘅
唔係又點會打到咁多廢話出嚟呢，
係咪呀。