[校園][純愛]《幸運星下的預言》: 第七十二章
越接近中六學期尾

就代表距離中七越近

亦即係話好快就會A-Level

大家以前都試過啦,
喺呢啲非常時期

學校會舉辦好多講座

請好多人嚟分享啲乜分享啲物

聽講遲啲更加會同每一個同學私下銜接

耳濡目染之下,
嗰排我同筱瑜講嘅話題

都係離不開呢方面

筱瑜:「係喎

你有冇諗過A-Level之後點樣

我:「唔知呀我冇諗呀

筱瑜:「唔信

講嚟聽下

我:「點解你唔信我冇諗呢

筱瑜:「er

直覺

我:「你幾時變到咁依賴直覺

同啱啱識嘅你完全唔同

筱瑜:「你夠係啦

之前都唔覺你咁多野講

更加唔知原來你咁無聊

乖豬講嚟聽下

我:「一望就知我邊有咁長遠嘅計劃

好得閒咩諗定咁多

筱瑜:「又唔知諗緊咩喇

唉

我:「望住我

筱瑜:「做咩

我:「諗緊你囉

筱瑜:「又喺度玩

無啦啦叫人望住你以為你唔知咩事添

好無聊呀

我:「其實我都覺得真係幾無聊

知唔知點解我要咁無聊

筱瑜:「唔知喎

唔係同你好熟咋喎

我:「我每一次講埋啲咁嘅濕鳩野

其實都真係打冷震

咁點解我咁堅持繼續講

咪就係因為有個人聽完之後會笑囉

筱瑜:「係咩

邊個咁無聊呀

我:「係囉真係好無聊

你知唔知呀,
其實嗰個人笑起上嚟好靚

不過平時硬係不拘言笑

咁我咪試下做小丑

睇下可唔可以憑自己嘅努力,
欣賞到咁靚嘅風景囉

雖然嗰啲手段都真係好垃圾

不過再垃圾都叫做達到目的

筱瑜:「低b

最無聊係你呀

得你咁無聊呀,
可以氹到嗰個人笑

我:「係咩

咁我要獎勵喎

筱瑜:「原來都係為咗追求回報

我:「咁你就唔啱喇

笑容已經係回報

我要嘅係bonus

筱瑜:「咁呀

你講嗰個人頭先俾咗錢我

佢話叫我請你飲野喎

我:「兩個人飲一杯

筱瑜:「一杯夠你飲定係我飲

我:「即係又冇計傾啦

買完野飲之後

我就唔使問,
梗係借頭借路送佢返屋企先

筱瑜:「快啲講啦你有咩打算啫

我:「點解你咁緊張先

筱瑜:「冇呀

純粹無聊想知囉

我:「有冇人話你好唔老實

筱瑜:「冇喎

咁之後你會點呢

我:「你放心啦

我唔會出國嘅

好心你就唔好睇戲睇上腦

成日覺得身邊人去外國讀書啦

筱瑜:「原來係咁

又話冇諗扮晒野

我:「係咪鬆一口氣呢

筱瑜:「痴線你講咩呀

我都唔知因咩要鬆一口氣

我:「繼續扮野丫

到我問返你咁你有咩打算先

筱瑜:「讀到嘅話就梗係讀落去

我:「你點會讀唔到落去

你都唔得咁我可以去乞食

筱瑜:「唔知架

校內唔錯唔代表出到去都得

其實我都有啲擔心

我:「你咁撚勁驚條撚咩

筱瑜:「似你咩開口埋口都係呢啲

我當你讀到喇

咁之後會想做啲咩

識你咁耐好似未聽過你講有咩夢想

我:「我啲夢想唔出得街

咁就梗係唔同你講啦

筱瑜:「又喺度扮野

講嚟等姐姐聽下

放心喎我唔會好似其他人咁樣一嚟就ban

呢啲人我都覺得好乞人憎

唔需要你鼓勵不過都唔好一嚟就斬釘截鐵話唔掂

我:「講真真係冇喎

細個好撚戇鳩嗰陣會諗過第日做鋼琴家

不過好快覺得冇癮跟住就冇學

筱瑜:「估唔到你有彈琴喎

我:「以前教我鋼琴嗰個miss好靚

身材又高挑

筱瑜:「傑仔呀

細細個就咁樣

唔怪得真係成日俾人話變態佬

我:「都痴線嘅我冇做啲乜

男仔鍾意靚野好正常,
梗係想同靚女一齊呀

依家都係同一道理

筱瑜:「亂噏你就最叻

我:「唔好咁孤寒啦

笑得大方啲唔使偷偷雞

筱瑜:「冇笑喎

跟住就因為個miss冇教你所以唔學

我:「你真係好撚醒

筱瑜:「都估到啦

我:「你問得我即係你應該都有你自己嘅夢想啦

筱瑜:「夢想就講唔上

不過以前都有諗過,
將來都幾想做關於文字創作嘅職業

好似寫故仔又或者劇本咁樣

未去到好熱愛不過有啲興趣係真嘅

我:「屌你啦你係理科人喎

文字創作

咁點解一開始唔揀文科

筱瑜:「哈哈

因為理科高分啲囉

雖然我一直都好鍾意睇書甚至係作文

不過唔夠高分就係唔夠高分架啦

求學,
又點會唔係求分數呢,
有時要現實啲好

我:「好撚同意
