[校園][純愛]《幸運星下的預言》: 第七十章

話就話多咗幾個鐘諗

不過對我嚟講都係冇乜幫助

就好似考試咁樣

額外俾多啲時間你，

唔代表一定諗到點答



我依家個情況就係一樣

即使時間多咗，

不過都重係徘徊不前

有時我都唔明自己，

咁簡單嘅野都要諗到咁複雜



唔係淨係女人鍾意簡單複雜化

男人其實都係呀

可能你地會問，

咁樣喺以前鍾意緊映彤嘅時候

你又點樣問架



我就真係答唔出

唔係因為我唔記得，

我啲記性未至於咁差

幾年就唔記得晒

而係嗰陣真係冇問映彤

唔同今次喺度庸人自擾

以前唔知點解會咁樣

明明兩次都係鍾意啫，



點解會用唔同嘅態度對待

大個咗經歷多咗就梗係知啦

以前細個入世未深先乜都唔知啫

都係唔好越講越遠

返返嚟先

突然間好似如夢初醒咁樣

諗到一個好撚戇鳩嘅方法



係喎，

以前乜都講得出口

係因為未鍾意佢

依家連講一句都要部署

就係因為鍾意咗佢

關鍵即係喺鍾意嗰度啦

於是，

喺下晝嗰個幾兩個鐘



我就係咁催眠自己

我唔係鍾意佢

好似南無佬咁樣

不斷同自己講，

我都唔明點解會諗埋啲咁低能嘅方法

我從來都好相信，

呃人先要呃自己呢個道理



以前每一次喺學校犯事，

喺學校對住呀sir，

返屋企對住老母，

講大話就無可避免

咁我為咗要取得佢地信任

亦都唔想因為突如其來嘅事，

令我唔記得我係講緊大話

所以每一次我都係不斷同自己講嗰個大話

等自己都以為個大話嘅內容先至係事實

潛移默化之後對住任何人

都係講返大話個版本

每一次我都係成功

從來都冇顯露過破綻

所以你話我點會唔明自欺欺人呢個道理

既然係咁今次決定照辦煮碗。


經過嗰兩個鐘自我催眠，

終於落得堂可以去搵筱瑜

哈哈其實我都唔知有冇用

依家都真係講唔定，

跟住就去佢班房然之後一齊走

落樓梯直至到出去學校門口嘅時候

眼球總係唔安份停留喺佢身上

之前都未試過咁樣，

呢種反應話俾我知，

即係呃唔到囉

筱瑜:「做咩呀

我塊面有野咩」

我:「咁你靚女

我望多陣得唔得呀」

筱瑜:「下

你搞到我會好怕醜喎」

我:「其實我都唔想望你

不過冇計真係控制唔到」

筱瑜:「又唔見你之前係咁」

我:「之前你唔知啫」

筱瑜:「點會唔知

明明成日同你一齊行」

我心諗又好似係喎

證明佢觀察力有幾高

唔知係咪佢影響咗我

抑或自己本身，

對於聰明，細心嘅女仔會份外重視

覺得呢類女仔特別吸引

大前提當然唔好係豬西

我話唔介意你都唔信啦

我:「以前唔發覺

依家發覺

咁樣又得唔得呀」

筱瑜:「得

梗得架」

我:「你睇下你

讚你兩句就咁」

筱瑜:「有邊個唔鍾意聽架

即使係假都好」

我:「肺腑之言嚟架老友

假」

筱瑜:「係喇唔夠你講喇你話點就點啦

最衰都係頭先你講一講

搞到我都想食pancake」

我:「不如兩個人食一個

你餵我一啖我餵你一啖

我覺得咁樣一定唔使落糖水」

筱瑜:「好

嚟囉」

我:「下

你講真架」

筱瑜:「假

一陣俾人見到呀」

我:「驚條撚

我預咗俾你整污糟件衫都唔驚」

筱瑜:「痴線點會整污糟

你講到我唔識餵野食咁樣」

我:「總之我預咗俾你整污糟

玩下囉」

筱瑜:「睇嚟一陣要證明俾你睇

你係錯嘅」

我:「好」

原來以退為進就搞掂，

諗咁多野做咩丫，

不過又唔好話，

係以前先至會咁無聊

用咁多時間去諗埋啲咁唔等使嘅野。