[校園][純愛]《幸運星下的預言》: 第六十八章

鑑於我真係唔知佢點樣諗

同埋喺我心目中，

佢一直都有一個聰明嘅女仔

觀察力又高

過於進取只會弄巧反拙



點都要睇準環境先至出擊，

最怕就係亂咁表白做唔返朋友

呢樣係最唔想出現嘅結局

講真有邊個唔想同鍾意嘅女仔一齊

我可以答你冇一個男仔會唔想



只不過唔等於胡亂表白架

連朋友身份都冇埋係最差一環

唔知大家有冇共鳴啦

親身經歷好朋友經歷好甚至上網睇到都好

歷史上都大把人慘遭滑鐵盧



鍾意唔係大晒，

唔係淨係話一齊啦咁簡單

三言兩語就明白所謂嘅愛情，

咁塵世間就唔會咁多人為情所困

所以一定要慎重部署

反正我成日同佢一齊

試下講啲無聊野

睇下佢咩反應都好，



其實我都幾樂於見到佢怕醜

雖然唔係話怕醜就一定鍾意

不過如果套用返我自己嚟講，

唔會完全冇感覺先囉

我知你地會鬧我

搞錯呀筱瑜做到出晒面你都唔知

咁當局者迷丫嘛老細



睇嘅野可能真係冇旁觀者咁清楚

會將佢所有對我做嘅野，
全部都歸咎於好朋友身份

都係佢同我熟啫咁樣

我依家先發覺一個男仔點樣有自信都好

第一次追女仔嘅時候，

都會突然急降

何況我本身亦唔算一個好有自信嘅人



咁就梗係更加謹慎啦

表錯情真係柒到搵窿捐

講返嗰陣先啦

基本上傾傾下計，

我就會乘機講得好曖昧嘅野

唔係呃你

真係鍾意嘅時候的而且確比之前難開口

不過冇計啦照講啦



其實都係好垃圾嗰啲

「你喎梗係幫你啦」

「我唔信你信邊個呀」

「痴線佢邊有你咁靚」

全部都提及佢

諗住咁樣可以襯托出佢有幾好

點知佢當我吹水

成日都扮蟹話多謝

唔扮蟹就話又講呢啲

點解你呢排成日講嘅咁樣

暫時佢好似唔信以為我真係吹水

不過我想講全部都係事實

認真講唔知點解真係講唔出口

唯有嬉皮笑臉咁去講，

我都明白唔講可能會後悔，

所以特登用一個輕鬆嘅手法表達

不過暫時睇嚟冇乜效。


要知己知彼先至可以得心應手

最簡單方法梗係問身邊朋友，

其實我有諗過好唔好同映彤講

不過我覺得條友靠唔住

肯定會靜靜雞同筱瑜講

佢啲屎忽野我大約都知

所以唔可以同佢講住

唉，

我有幾多真心朋友丫

嚟嚟去去咪得兩個

我見今晚會打機順便同呀澤講啦

佢條撚樣成日喺學校見到我同筱瑜一齊行，

每次都係陰陰嘴笑極度衰格

我:「唔係呃你

依家真係鍾意咗筱瑜」

呀澤:「係咪依家先呀

之前唔係咩」

我:「真係唔係」

呀澤:「發生咩事

無啦啦鍾意人

映彤呢」

我:「一早冇野啦」

跟住我就將筱瑜幫我整走粒釘呢件事講出嚟啦，

呀澤:「估到你地有野啦成日一齊

我都見過幾次」

我:「我知

每次都笑到好撚衰」

呀澤:「痴線我唔靚仔啫

都未去到衰啦係咪呀」

我:「個樣真係狗到出汁」

呀澤:「你都痴線

正人君子俾你講到咁樣

唔好講啲濕鳩野先

咁你依家係咪想去馬」

我:「話唔想就梗係呃你

不過當然要審時度勢」

呀澤:「係呀萬一衰咗連friend都冇得做

尷尬到暈」

我:「屌你一嚟就話衰咗」

呀澤:「我就唔信你冇諗過

更加唔信你唔驚」

我:「屌咁都俾你發現」

呀澤:「問下你老友囉

你話佢係筱瑜表哥定唔知表弟丫嘛」

我:「係喎」

又俾呀澤條友啟發到我

反正今個禮拜我會同司徒出嚟

順便問佢先

中學雞溝女係咁架啦，

搵智囊團幫手係等閒之事

雖然我都覺得幫唔到啲乜

不過問咗都冇壞丫。