[校園][純愛]《幸運星下的預言》: 第六十二章
消息公佈後

班同學真係好興奮

甚至連負責嗰個老師,
原來都係有蠱惑

因為佢同校長講,
今次個camp係有教育意義

同埋有功課要做

你知啦校長百足咁多爪,
周身都唔得閒

你咁講佢咪咁聽囉

所以佢就冇再去求證

呀sir私底下同我地講

當係輕鬆下玩下就得

總之每人一舊水多啲其餘學校包底

去camp嗰方面我乜都唔識

聽佢地講咁樣已經叫好抵

三日兩夜包一日燒野食

而且聽聞都多野玩

Gym房,遊戲室,幾個球類運動場

好似話重有卡拉ok房

個個聽完之後

就已經喺度諗嗰幾日做乜

真係傻嘅重有成個禮拜

每一次我落去學生會室抄功課

我都聽到佢地喺度討論,
映彤:「正呀

好耐未試過去camp

筱瑜:「我都好耐冇去

我:「你放心喎映彤姐

一定留間房俾你同埋Felix

映彤:「你條友真係冇句好

個樣衰到呢

筱瑜:「係囉你諗啲咩呀

我:「痴線你地諗乜呀

留間房俾佢地瞓覺咋喎

映彤:「一睇你個樣就知你想講咩啦死人頭

筱瑜:「今次真係盲都見到

我:「兩條友扯貓尾

算數

筱瑜:「係喎你諗住帶乜呀

我:「冇諗喎

咪又係嗰啲

衫褲鞋襪

筱瑜:「其他呢

我:「啤牌佢地話會帶

諗住玩show hand,鋤dee

呀邊個邊個又有籌碼

咁就夠啦

筱瑜:「野食呢

我:「有你丫嘛

筱瑜:「變態佬講埋啲咁嘅野

我:「屌唔係呀

我話你會帶丫嘛

筱瑜:「都唔係同一間房

我唔會咁得閒行出嚟拎俾你食架

我:「知你會嘅

映彤:「好野喎你兩個傾咁耐都重係雞啄唔斷

我:「咪係囉

識趣就行開啦

筱瑜:「唔使理佢呀映彤

你一唔喺度佢條友又會亂咁講野

我:「係咪除咗呢啲就冇野要帶

你知啦我好耐冇去過camp

筱瑜:「麻煩鬼到時提你喇

我:「整啖先你真係叻嘅啫

筱瑜:「行開唔制

映彤:「我行開先啱唔阻你地

去之前miss講咗

叫我地第二朝去某個地方集合,
佢book咗架旅遊巴

跟住一齊搭上去

地點就唔講喇費事自爆

總之唔係去到長洲咁遠

去之前嗰晚筱瑜真係打過嚟有提我

講得出做得到冇吹水

筱瑜:「點呀你執齊未呀

我:「衫褲鞋襪全部搞掂

冇啦應該係咪呀

筱瑜:「水樽呢

我:「有

筱瑜:「梳洗嗰啲都有啦係咪呀

我:「有

筱瑜:「沐浴露洗頭水護髮素

我:「係喎屌

唔該唔該

筱瑜:「你有冇旅行裝呀

唔係咁大支沐浴露重死你呀

我:「問老母先

佢話有呀

筱瑜:「好彩打咗俾你

如果唔係一係就冇得沖

一係就重到暈咗喺度

我:「所以話你叻囉

幾時都咁醒

照顧又周到

咁好嘅女仔邊度搵呀

筱瑜:「唔識你真係會俾你氹到

我:「你都痴線

識我就唔會俾我氹到咩

筱瑜:「係

聽過太多次喇

我:「睇下點

依家一定暗爽囉

筱瑜:「冇囉邊度有呀

明爽呀反正隔離都冇人

使乜暗喎

我:「即係氹到啦

筱瑜:「唔……咩呀……係囉

真係好煩呀

帶齊啦嘛係咪呀,
帶齊就算啦拜拜,
聽日見呀

其實臨尾我唔係好聽到佢講乜

因為佢無啦啦講得勁快

我都係推斷返個意思出嚟,
明明頭幾句口窒窒

不過幾句之內變咗機關槍

真係犀利又學到野。