[校園][純愛]《幸運星下的預言》: 第六十一章

跟住落嚟

發生嘅事真係唔算特別

咁就容許我輕輕帶過啦

基本上每一日都會同筱瑜一齊返學

每日都係整定件三文治



加一包冇飲筒嘅朱古力奶

我又估唔到佢咁有恆心

真係風雨不改

大佬，

依家都係一個比較啱傾嘅朋友咋喎



就做咁多野，

而且從來冇失手

的而且確好佩服佢

有時我都真係唔好意思

有幾次同佢講叫佢唔使



點知佢問返我係咪厭

咁我例牌都係答埋啲氹佢嘅野

去到後期佢成日講真係唔辛苦

重話整慣咗唔整先唔慣

又話佢自己不嬲都要早起身

重串鳩我話我呢啲人似係做白老鼠

我覺得好食嘅

佢返屋企就整俾家姐



頂佢個肺丫

我真係冇呃咁多位，

當時我真係冇諗過其他野

鬼叫我之前未經歷過何謂拍拖咩

依家嘅我諗返起，

其實佢對我所做嘅野絕對係超出朋友以外嘅事

唔好意思囉嗰陣唔知丫嘛



佢又冇特別表示喎，

又好難怪一個咁遲鈍嘅我

我已經戴咗頭盔架啦

同埋當時嘅我覺得，

搵到一個啱傾嘅人，

比起一個所謂嘅伴侶

我會更加滿足

唔係話唔想拍拖，



而係我覺得同一個異性好難真係傾得咁埋

唔好怪我當時嘅諗法

因為真係情竇未開

幸運地我遇到一個咁嘅朋友

喺對方未有任何表示嘅時候，

咁就梗係安分守己啦

當然，



最主要都係未去到鍾意嘅階段

以前嘅我都真係幾死板

係嗰種一定要點點點先可以點點點嘅人

後來係咪

哈哈，

出到嚟社會，

有邊個可以保持住初心丫

就算真係有，

都唔會咁好彩係我啦

打從心底入面，

我係相當佩服呢種人

意志只要欠一分堅定，

就隨時被侵蝕

用把口講真係好易架咋，

到你親身體驗就會明白，

不如問返咁多位丫，

依家嘅自己，

符唔符合以前理想中嘅自己

呢啲野唔需要周圍同人講

亦都冇必要通處問人

因為問完都未必有結論，

夜闌人靜嘅時候，

自己腦入面就會有個答案

點樣呃都唔會呃得到。


都係講少啲廢話喇

唔好意思要各位體諒下

人到中年難免會長氣啲

好喇講返故事入面先

話說我地嘅中六生涯，

嚴格去講真係唔算特別忙

起碼對比上年會考係兩回事

嗰陣真係去廁所都要拿拿臨搞掂

務求用盡每分每秒，

今年就輕鬆得多

可能負責學生會嗰個miss都知

所以佢問我地學生會，

復活節去唔去camp

費用一舊水多啲

好似話玩三日兩夜

咁多咸濕仔唔好諗錯隔離

嗰陣未出呢個節目

佢話獎勵我地呢大半年個表現喎

哈哈我擺明hea都有獎勵呀

不過咁，

聽到呢個獎勵其實我唔算好興奮

因為我對去camp呢個活動冇太大憧憬

對上一次已經係小六

嗰次係硬性參與

咁點解我會有咁嘅感覺呢

事關我擔心瞓覺嘅問題

我瞓覺就比較有要求，

係屋企先瞓得最自在

床褥嘅硬軟度以及個環境

係好重要嘅因素

唔係未試過喺屋企以外嘅地方瞓

上面講嘅去camp啦

去親戚嗰度瞓都試過

始終冇屋企咁舒服

當然又唔係真係瞓唔到，

係入睡嗰下比較慢啫

正當我諗緊去唔去嘅時候

原來發現全部人都狗衝

包括我比較熟嘅筱瑜同埋映彤

有一兩個唔得因為一早book咗去旅行

九成人都話好呀好呀

一睇我呢個屎忽鬼，

就知係隨波逐流嘅人

一啲主見都冇，

所以最後望一望隔離嘅筱瑜

都係用點頭做結尾。