[校園][純愛]《幸運星下的預言》: 第四十一章

食完之後佢就返去繼續休息

我就繼續去幫手啦

兩三個鐘之後，

我靜靜雞過咗去醫療室嗰邊

睇下佢重喺唔喺度



順便拎糖食

點知過到去已經唔見咗

應該已經早退，

嗰日跟住都冇乜特別

都係一路hea做就算



拍住映彤搵返嚟嗰個戇鳩仔一齊做

大約四五點就走人

見冇乜特別，

咪返屋企抖下算數

返到去一路喺度諗映彤晏晝同我講嘅野，



唔通我同筱瑜真係有機

我都幾相信唔少中學雞都有呢個舉動

男仔好女仔又好，

無啦啦喺度發姣又或者叫春

究竟佢咁樣咁樣，

係咪即係代表咁樣咁樣呢

又暗自喺度將自己同埋其他同性比較

突出自己優勢



從而加強自己信心

搞到中學生涯嘅愛情，

好似一場角力賽咁樣

不斷比較大家條件

佢喺我身上做嘅野，

有冇試過喺其他人身上做過

我唔信你地冇做呀



嗰陣嘅我真係認真喺度諗，

映彤條花生友真係冇講錯

的而且確，

我冇見過筱瑜喺其他人面前講咁多野

特別係佢極度鬼祟嘅一面

鍾意整蠱人呀玩惡作劇

我出去同人講，

啲人一定以為我鳩噏



諗諗下唔通真係有機

不過大家都知，

男仔(或者係毒撚)面對呢啲問題，

十個九個都係唔識處理

最起碼係冇方向先

我嗰陣就係處於呢個階段，

究竟我要點做呢



真係一頭霧水

同埋真係認真講，

當時我亦都未真係鍾意筱瑜

純粹覺得啱傾

種種條件令我覺得，

佢係一個值得交嘅朋友

就係咁多啫冇特別

所以好快我就打破自己幻想，

都係唔好諗咁多住

至少自己對人冇野先

諗咁多咪又係盞自己煩

何必攞苦嚟辛呢，

不過真係想問佢有冇事

始終嗰下真係整到

以我當時認識嘅佢去推斷，

唔係真係好痛佢絕對唔會要我幫手

佢自己都講過唔鍾意麻煩人

如非有需要佢點會要我扶佢，

更遑論孭佢

所以都係問佢依家點啦。


一開電腦就見到on msn

原來喺度聽緊歌

見親佢都係聽衛蘭

我:「誰也以為我不會拍錯拖。」

筱瑜:「你又識嘅」

我:「大佬得你有聽咩

你send過俾我丫嘛」

筱瑜:「痴線架喺度偷睇人地聽咩歌」

我:「第一我冇偷睇

第二你係show埋出嚟

第三如果我話我都係咁啱聽緊你信唔信」

筱瑜:「唔信」

我:「唔信就算

你又證明唔到我唔係聽緊」

筱瑜:「我證明唔到你冇入女廁，

咁係咪代表你有入女廁丫」

我:「搞錯呀你個腦咁快嘅

知唔知我同親人講呢句，

啲人一定會hang機」

筱瑜:「傑哥喎

對住佢唔轉快啲，

用乜易俾佢陰到

你知你幾狡猾又陰濕」

我:「其實呢你用啲字可唔可以正面啲

搞到啲人以為我真係好似你咁樣講就大鑊」

筱瑜:「中文唔好

唔好意思喎」

我:「真係離晒譜

我今日咁英勇，

換嚟就係狡猾陰濕」

筱瑜:「係喇係喇我錯喇

最型係你得未呀」

我:「算你識做

點呀醫生話你隻腳斷未呀」

筱瑜:「你把口真係冇句好

佢話冇斷呀

令你失望添」

我:「你真係福大命大

唔係我及時伸出援手，

唔係講笑真係要請我食飯」

筱瑜:「冇話唔請

你有命嘅話我一定唔會走你數」

我:「咁我等住食

唔玩喇佢話你咩事呀」

筱瑜:「佢話我筋膜炎呀

唔大件事抖幾日就得

不過禮拜一唔會返學」

我:「你唔返咁我唔去學生會室嚕

冇你嘅學生會室我去嚟做乜」

筱瑜:「唔好掛住我呀

禮拜二我就正常返」

我:「冇得唔掛喎

幾驚你懶到禮拜二都唔返」

筱瑜:「我想返不過醫生話抖多日好啲喎」

我:「真定假呀係咪你吹水」

筱瑜:「係呀係呀全部都係我吹水呀

滿意未呀」

我:「有人嬲咗喎」

筱瑜:「係咩邊個呀

唔知喎」

我:「講下笑啫唔使咁係咪呀」

筱瑜:「嗱有樣野真係要你幫手嘅」

我:「做咩呀」

筱瑜:「你知我禮拜一唔返學啦，

不過嗰日有功課架嘛

放學之後你可唔可以拎過嚟」

我:「哦原來係咁咋

輕鬆啦」

筱瑜:「本來想叫映彤佢嘅

不過佢話嗰日唔得閒

要夜啲先拎到俾我

咁就不如叫你啦」

我:「人工唔該」

筱瑜:「得啦唔會待薄你」

我:「屌咪又係朱古力奶

不過唔緊要我受」

筱瑜:「重有一樣」

我:「竟然」

筱瑜:「哈哈到時你咪知囉」