[校園][純愛]《幸運星下的預言》: 第三十章

大家都知

六點幾嘅地鐵，

車廂入面肯定係迫爆

相信我唔講大家都會有共鳴

特別依家體會更加深啦



放工時間，

隔離全部都係麻甩佬

有冇搞錯

有啲重要遞高隻手扶住，

嗰陣味真係冇得頂



當然我都知搵食辛苦

佢都唔想嘅

你黑面都於事無補，

唯有擰歪面睇電話咪算囉

嗰陣我同筱瑜嘅情況就係咁樣



等車嘅時候已經成堆人，

諗住太子都算係多人落嘅站

應該會好啲啦，

好明顯之後證明我係鳩噏

一上到車就係咁行入面，

因為真係太多人

我又驚整到其他人同埋筱瑜，

嗰陣真係步步為營，



直接去到車廂中間有得挨嘅位置

即係中間有條大圓柱嗰個位呢

原本我地就拍住企，

跟住見到真係好多人，

於是佢就繼續挨住，

我就行出嚟企喺佢對面

真係幾厘米嘅位置



我唔係想抽水

事實上嗰度真係好多人，

咁我又驚佢俾人撞

所以咪行出嚟面對住佢囉

挨唔挨有咩所謂，

可能嗰陣時真係太迫，

所以大家咁近重要對望緊

氣氛都唔係好尷尬



我講氣氛咋唔係講我自己呀

我自己梗係有啲緊張啦，

毒撚係咁架啦我想嘅咩

筱瑜:「做咩望住我呀」

我:「唔望你個樣望邊度

咁靚女係咪先

同埋依家咁迫，



望住幅牆不如望你

望第二度你又講架啦」

筱瑜:「你真係冇句好」

我:「聽啲唔聽啲

頭兩句呀」

筱瑜:「唔知喎聽唔到喎

好攰呀」

我:「邊個叫你約今日交收」

筱瑜:「佢叫我囉

佢話今個禮拜係得呢日得閒

冇所謂啦咁樣」

我:「屌」


筱瑜:「喂，

傑仔呀」

我:「做咩呀」

筱瑜:「可唔可以借嚟挨」

我:「下

你咪挨緊囉」

筱瑜:「唔係呀我講個頭呀」

我:「你鍾意啦

我諗你唔係好重啫」

筱瑜:「係掛哈哈」

跟住佢就挨咗落嚟，

呢次唔係好似平時搭巴士咁樣挨膊頭

大家幻想一下，

佢同我就對住企

中間只有幾厘米差距，

即係伸埋啲直情可以嘴埋咁滯嗰啲距離

佢依家個挨法，

係成個人將個頭擺咗落我膊頭嗰度

唔係搭巴士咁樣向左或向右挨落去

佢一挨落嚟嗰下，

真係好大衝擊

會feel到自己成個人都變到好僵硬

好彩面皮厚如果唔係真係面紅

人生應該冇乜邊次咁緊張

考oral都唔係呢種級數，

根本就冇得比哈哈

佢應該真係好攰，

因為平時佢唔會咁樣講

作為一個男仔，

可能呢啲就叫做本份掛

最怕，

係佢攰都唔挨落嚟啫

佢依家咁樣做，

我又點會辛苦呢哈哈

已經唔講本身佢就好瘦，

第一次嘅體驗，

往往會暗自幫你釐定一個標準

日後試過幾多次都好，

你所回味嘅，

可能只有當日嘅第一次

他日試幾多次，

都搵唔返當初嗰份悸動

又或者調轉一個講法，

唔好講到邊次邊次，

總之，

最打動到心扻嗰次就係

呢種感覺第二個唔會知道，

即使係血濃於水嘅至親都唔會清楚

唯有三更半夜，

上到張牀瞇埋眼嘅時候，

自自然然就會知，

從來都呃唔到自己。