[校園][純愛]《幸運星下的預言》: 第二十一章

食飯嗰度照舊啦

抄抄下嘅時候佢又俾咗包朱古力奶我

筱瑜:「俾啲甜頭你

一陣加油呀」

我:「一包冇飲筒嘅朱古力奶就叫做甜頭」



筱瑜:「唔係你想點呀

唔好飲囉俾返我」

我:「痴線你買我一定飲」

筱瑜:「其實我想問你好耐

你係咪每日都冇食飯」



我:「睇時間囉

多功課咪唔食

唔多嘅話咪食快啲跟住上嚟囉」

筱瑜:「唔肚餓嘅咩」

我:「你又唔好話喎真係冇」



筱瑜:「定係想留返啲錢打機」

我:「其實你真係好醒

點解可以咁犀利」

筱瑜:「嚟嚟去去你啲活動都係嗰幾樣

有幾難估丫」

我:「屌又被你睇穿」

筱瑜:「我問過映彤

佢都係咁話呀哈哈」



我:「你兩個識乜野

話時話點解你成日都喺度」

筱瑜:「班房好嘈呀

咁咪過嚟溫書做自己野囉」

我:「屌柒佢地咪得囉

你驚嘅話我幫你」

筱瑜:「我自己唔慣啫唔關佢地事



lunch time點會唔嘈

其實都正常嘅，

所以咪我自己落嚟囉」

我:「小姐咁大方唔得架

下下都係就人邊個就你呀」

跟住佢無啦啦指住我

筱瑜:「你囉」

我:「屌你啦搵我笨柒」



筱瑜:「又唔好講到咁衰」

我:「唔講住喇做野先

總之放學我會去電腦室整埋佢，

應該會整完先走。」

筱瑜:「咁好啦加油喇」


放學嘅鐘聲一響起，

我就即刻九秒九衝落去電腦室



諗住拿拿臨整完返屋企打機丫嘛

一打開個file，

真係不得不讚筱瑜

準備功夫永遠都做得好足

同你講晒點樣打，

基本上你求其搵個冇跟開嘅人都知道點樣做

好簡單啦咁我照住佢指示做

打落去發覺好彩一早嚟，

因為都要打唔少字

唔係夾硬塞字數，

而係有啲位真係要講得好詳細

原來主席條撚樣冇講錯真係要打千零字

好彩細佬我打字速度唔係好慢

打開機嘅男仔梗係知點解喇哈哈

我諗十個男仔有九個都係上網鬧人練返嚟，

成功非僥倖呀，

都唔知問候咗人地老母幾多次先至識

唔可以話好快不過唔係慢先

我以前有個習慣好衰

就係唔會一路打一路save，

除非我知一陣間要出去，

唔可以喺電腦面前，

如果唔係我一定係打晒先至save

你見我講得以前都知咩事啦

之後點解學精咗?

其實就係因為呢一日

去到尾聲嘅時候，

我用緊嗰部電腦無啦啦熄機

成個人一片空白，

幾秒之後就怒火中燒

不過都冇俾憤怒蒙蔽我嘅理智

喺學校丫嘛屌

你知電腦室一定有條友喺度，

我喺度拍枱發洩嘅話佢實會行埋嚟

所以即使好嬲，

都唔可以發出嚟

曾經有一絲希望可以回復檔案

但係重開機之後我見到個word檔係一片空白嘅時候，

我就知已經浪費咗頭先個幾鐘

浪費都唔緊要，

依家就嚟六點先係最大問題

學校最遲六點半閂門，

基本上我係唔夠時間做晒

即係返屋企又要打過，

嘥時間做一樣原地踏步嘅野真係好差

跟住見到筱瑜無啦啦入嚟

一見到我就行過嚟我方向，

呢個時候我個腦得五個字，

今次大撚鑊