[校園][純愛]《幸運星下的預言》: 第十五章
去到第二日,
收咗工就去請人食飯啦

今晚佢話想去食主題餐廳

我都唔記得咗係食乜

事前我叫佢你卜位啦咁樣

食邊度佢話事我冇所謂

所以佢就揀咗呢間主題餐廳

食乜唔係重點所以唔多講喇,
我:「你就爽啦又去日本

某人:「你唔去啫

搵咁多扮乜野丫

我:「費事阻住你同你男朋友二人世界

我好識做嘅

某人:「自己都可以去架

我:「幾年前我有冇講過

我唔鍾意去旅行

某人:「有呀

我都係想問呢個諗法你有冇變啫

我:「個幾兩個月之前你先問過我

某人:「係咩哈哈我都唔記得咗嚕

我:「睇你個死樣肯定掛住拍拖啦

我同你話晒都中學識到依家,
果然係重色輕友

某人:「定期約你出嚟食飯都叫重色輕友呀

你知唔知你幾威呀

冇乜邊個中學同學我有keep住聯絡架

我:「係咪真架

某人:「幾年前我都係咁同你講

你唔信咋嘛

我:「係喇係喇係喇

你對我真係好嘅啫

某人:「核突到死

唔好講呢樣喇,
幾時搵返個伴呀

我:「屌你轉話題轉得咁快

某人:「咁你傾唔傾呀

你都好似單身咗一段日子喇喎

我:「係咩

我冇數過喎

某人:「其實呢我有一樣野想講好耐架

我:「講咩呀

某人:「你覺唔覺你啲ex呢有個共通點呀

當俾人兜口兜面講中,
難免會有思緒上嘅衝擊

即係個腦袋會暫時一片空白,
不過唔可以停咁耐,
如果唔係會俾人知道最真實嘅情感

我:「係咩我真係唔係好覺喎

某人:「除非你金屋藏嬌

我:「痴線一定冇

某人:「你幾個ex我都有見過啦

我:「講起上嚟你真係好八卦

都唔知嗰陣有咩特別要特登約出嚟食

某人:「幫下眼咁啫

大家識咗咁耐係咪先

我:「好彩你都好識做

佢地幾個都有同我講返有你喺度傾計唔會悶

起碼唔會令到個氣氛好尷尬先

某人:「唔係你估

嗰陣唔敢講係依家先敢同你講

其實你嗰幾個女朋友呢真係有個共通點

我:「係咩

某人:「你個眼神,
話俾我知其實你知

係咪

我:「唔知喎

跟住我就冇講野,
喺度微笑

識咗咁耐真係冇得呃

某人:「咁多年,
有冇放低過

我:「你講邊樣呀

某人:「你知我講邊樣嘅

我:「乜都放低咗啦咁多年

重細咩成日記住

某人:「冇嬲咩

我:「從來都冇,
不嬲都覺得係自己問題

咁多年乜都化,
搵食呀大佬咁得閒理咁多野咩

某人:「咁又係嘅

搵食真係艱難呀

不過依家講返丫,
其實嗰陣唔知點解你兩個會溝得埋

我:「哈哈真係唔知喎

依家你問我都係咁答

某人:「緣分真係好出奇

我:「係掛

唔好講喇食野啦,
頂你條友又扮細食

某人:「冇扮

真係飽唔好屈

食完飯返屋企,
一路行返去嗰陣諗起頭先講嗰啲話題

明明都放低咗(自己覺得),
一有人提返,
唔知點解嗰啲片段又湧返上嚟

即係話,
咁多年入面,
根本就冇擺低過

一直以嚟都係自欺欺人

佢有樣野講啱咗,
有時緣分真係好奇妙

好多野依家諗返都係無厘頭,
唔知點解會相遇,
唔知點解會認識,
更加唔知點解會熟絡,
當你好刻意嗰陣,
就冇你想要嘅野

反而誤打誤撞先至有驚喜,
特別當返到屋企,
再一次見到床頭嘅幸運星,
真係好似行咗入去一條時光隧道咁樣

諗返起一段青澀嘅經歷,
日後唔會再遇上第二次

就算擁有天時地利,
偏偏差咗一個人,
一個唔可以被取代嘅人。