[校園][純愛]《幸運星下的預言》: 第八章

唔知大家知唔知啦

每一年當選嘅學生會，

都會有一個室係俾學生會班人用

我地俗稱為學生會室

應該間間學校都有嘅



今年我就好好彩，

成為呢個制度之下嘅受益者

lunch time又或者放學之後，

有部分成員都會入去做自己野

映彤肯定係其中一個啦



有時佢男朋友Felix會喺度陪佢

都預咗俾人閃架喇，

人少少你話唔放閃都冇人信啦

好彩已經事隔一段時間，

對於我呢條毒撚嚟講都唔係話有好大影響



咁佢男朋友唔喺度嗰陣呢，

就會同幾位成員入嚟

多數都係做功課又或者溫書

可能鍾意個環境夠靜

幾個都係女仔嚟嘅

筱瑜係其中一個

佢地幾個都係同一班兼且係玩開嗰堆嚟

睇到呢度各位可能會問



咁冇男仔嘅咩

你又唔好話喇真係冇喎

因為班撚樣每逢lunch time，小息同埋放學呢，

都會去樓下打籃球

有叫我不過我唔打喇

事關小弟唔鍾意玩球類運動

籃球，踢波，羽毛球，排球冇一樣鍾意



鬼叫全部都唔叻咩屌

興趣麻麻自己能力又唔強咁梗係唔玩啦戇鳩

所以好多時學生會室入面都係得我一個男仔

不如喺度安安靜靜做功課順便睇下女重好啦哈哈

大熱天時我先至唔做運動

用乜易搞到成身汗臭到人

自己黐立立唔舒服不特止，

又會搞著人地



呢啲行為真係好差

我梗係唔會做呢啲野啦

咁好人係咪先

有時映彤都會問我點解喺度

映彤:「做咩喺度嘅唔去打波」

我:「大佬識咗幾耐呀咁都重要問」

映彤:「問下得唔得啫」



我:「實得

出面熱囉唔想打囉滿唔滿意呀」

映彤:「得

實得架」

以前我會撩佢嘅

例如講埋啲死人野氹佢咁呀

不過人地依家已經名花有主咁就唔搞咁多喇。

當選咗學生會

開始同其他成員交流多咗

特別係筱瑜啦

話晒都係同一個位

好多時都係坐埋一齊做功課

接觸多咗之下發現佢其實唔係真係咁cool

有時我見其他人問佢野嗰陣，

佢都好樂意解答人

唔會主動問你，

不過有問必答嗰種

講到你識為止先至做返自己野

有次佢有個friend問佢，

唔知熟唔熟淨係知係同一班

我坐喺隔離梗係聽晒佢地講咩啦

佢個friend問埋啲戇鳩問題

詳細問乜我真係唔記得咗，

我淨係記得係數學

你當係等比數列咁樣

實質係咩真係冇印象，
嗰條友重重複複問咗幾次同一樣野

俾著係我屌死佢啦

「搞撚錯呀又唔識頭先咪講過囉」

佢竟然完全冇發脾氣

講咗半個鐘重同嗰條友講

話有唔明可以再問

同埋平時待人接物真係唔係臭串嗰種

成日都會加句唔該喺前後

你唔望佢個樣其實聽落去好舒服

我同佢係同一個位，

有時要傾做乜野嗰陣佢都唔係用命令式語氣

有商有量嗰種人

除咗正經野我同佢冇乜傾計架

講得最多就係食唔食香口膠

事關佢好鍾意食

見親佢個口都係嚼下嚼下

冇記錯係益達檸檬味

每次佢拎兩粒出嚟啪嗰陣，

跟住就會望一望我

我feel到有人望我

當然係望返住佢

跟住佢就會問我食唔食

我打死都食啦係咪先

我就冇口臭問題嘅

因為喺呢方面一向都有好充足嘅護理，

唔係自吹自擂

之前我有講過自己有幾唔鍾意有口臭嘅人啦

萬一自己都有，

俾人話返轉頭就唔好啦

所以一直以嚟都好注重呢方面嘅問題

又講遠咗返返嚟先

佢聽到我話好呀，

之後就倒兩粒出嚟俾我

基本上我同佢接觸得最多就係喺呢方面

當然佢都係同之前一樣，

你唔去主動撩佢佢真係可以唔講野

好專心做佢當下嘅野

冇表情呀唔出聲呀咁樣，

你可以話佢好投入嘅

唔怪得咁靚女身材又高挑，

都冇男仔行埋嚟搵佢

依家真係明點解。