[校園][純愛]《幸運星下的預言》: 第三章

唔係話咩呀

嗰陣我覺得我地係贏唔到

咁易做學生會咩

亦都係因為咁樣諗，

所以就求求其其應承咗主席



諗住一定選唔到依家咪氹下佢開心囉哈哈

我曾經諗過叫埋呀澤一齊入嚟搗亂

不過開頭嗰陣已經講過啦，

我同佢喺學校刻意保持少啲聯絡

好多人以為我地依家唔同班就唔friend



咁就費事搞咁多野

同埋都有問過佢佢話唔想玩

我鳩吹話有女喎

佢都係唔制

條撚樣重懶過我



淨係叫我如果當選到要益佢喎

真係太天真邊有咁易當選，

所以都係話好呀好呀就算喇

喺呢個話題上面都唔多野講

咁就冇特別講落去，

去到第二朝，

一朝早就見到主席話今日記住留低開會

放咗學去6b班集合



喺度講下先，

我地中六得四班

6a係文科，

6b6c係理科，

6d就係商料，

而我就係6c班嘅

呀澤佢係文科仔自然就係6a班啦



一聽到主席話放咗學之後要去6b班集合，

咁就梗係屌佢啦

我:「有冇搞錯你係主席竟然去人地班房」

主席:「你知呀邊個佢係6b班呀嘛

費事要佢行咁遠啦」

呀邊個其實係佢鍾意嗰個女仔

對故事唔重要所以唔俾個名佢喇，

佢單戀人啫



我:「隔離班都話遠

佢就係人我地就唔係人

大佬你係主席梗係要俾個下馬威人地睇啦」

主席:「唔緊要啦都係一樣啫」

見佢個死人樣笑到烚熟狗頭咁樣都知講落去係嘥氣

所以跟住都冇理佢，

同埋諗深一層6b都係隔離班



行過隔離都唔係好遠啫

十二點幾我地就放學，

點解咁早放

事關每一年九月第一個禮拜都係放早，

中一至中七都係

見到隔離班重未放學，

亦都相信集合一堆人都要花啲時間

所以就二話不說落去樓下買包朱古力奶

一陣一路聽可以一路飲

簡直係人生樂事

買落去上返嚟都要兩三個字時間啦，

上到嚟竟然見到班房得兩個人

有一刻我諗緊今次係咪只係一個玩笑，

邊有人選學生會呀戇鳩仔

跟住我就諗，

我呢條毒撚邊值得人地玩我

冇野嘅冇野嘅，

所以就好快衝咗入去班房

我:「班契弟呢去咗邊呀」

xx:「佢地話去第二個班房呀

話下面嗰層嗰個房大啲喎

我兩個就喺度等你一齊落去」

依家同我講野嗰個就係映彤

呢個女仔小弟中一已經識佢，

好記得係中學第一個坐我隔離嘅人

而大家都知，

中學雞一坐隔離就會唔知點解鍾意咗人架啦

我都唔例外，

我同佢中一至中三年都同班

大家都係揀理科(講明先真係唔係夾定)

我又未癲到明知唔鍾意理科都為咗佢揀，

結果上到高中就唔同班

鍾意佢應該都有兩三年嘅事

我一直冇同佢講，

唔知佢feel唔feel到啦

你問我我就覺得佢應該當我係friend啫，

就係咁所以我一路都冇講，

未去到話真係好friend不過私底下都約過幾次出嚟

佢係嗰種典型好得人鍾意嘅女仔

溫柔，善解人意，

唔可以話去到好靚不過係好得意嗰種

有條馬尾仔，

同埋皮膚幾好

淨係以上幾樣都夠受人歡迎啦，

不過依家唔關我事嚕

因為上年已經做咗人地女朋友

我好記得聽人講嗰陣個心係離咗一離，

有啲錯愕，

不過再諗深一層都正常嘅

條件咁好嘅女仔重要係單身，

邊有可能冇狂風浪蝶丫

我又唔會好嬲因為自己都冇爭取過

冇得怪人嘅

不過嗰陣暗自同自己講唔好再停留喺佢身上，

我又唔係嗰啲搶人女朋友嘅人

搶都要講資格

我當我有都唔會做呢啲野，

到時受盡千夫所指承受唔起呢啲群眾壓力

既然係咁就不如提早抽離

鍾意佢嘅地步又未去到無了期等嗰種，

當然啦唔係話move on就move on

見到佢話完全冇野邊有可能

不過程度真係有所減退，

當係一個識咗好耐嘅朋友咁囉

頭先咪講班房有兩個人嘅，

一個係佢另一個咪就係佢男朋友，

叫做Felix

幾好人問佢做乜都得，

屌屎忽就唔知因為我唔會問佢

四眼仔嚟好似時下文青咁樣

喺埋一齊都算啱嘴型有計傾嘅，

不過我真係覺得我靚仔過佢囉哈哈

我:「咁真係唔好意思我啱啱衝咗入嚟阻住你地添」

跟住當然係俾一個會心微笑佢

Felix:「你諗啲咩呀」

我:「你諗咩我咪諗咩」

映彤:「識咗你幾耐一見你呢個樣就知諗咩啦

肯定係唔慌好野 」

我:「望個樣就知我諗乜真係犀利」

映彤:「咁多年同學乜都知道晒啦叻仔

好喇等埋你就可以一齊去下面喇。

我:「你兩個行先啦我跟住尾就得」

Felix:「都唔知你講乜」

我:「繼續扮啦

放心我唔會做電燈膽」

Felix:「咁就乖仔」

我:「屌

又要俾人放閃」

Felix:「你想放你都得嘅啫」

我:「冇你咁靚仔呀Felix哥」

Felix:「聽到未呀映彤

佢都話你男朋友我靚仔」

映彤:「我地呀傑哥講野你都信」

我:「不嬲都誠實」

只係嗰陣對住你唔係啫

哈哈。