喪"師"2: 7-神聖童子軍16人

當我見到班細路眼中透住就嚟滿出嘅怒火同埋不滿，我就知道，係時候啦！
出發！當我地成班一踏出課室，連我都俾港孩「發爛咋」嘅威力嚇咗一跳，啲喪屍係退避三舍，讓咗條路出嚟俾我地。當我地行到馬路嘅時候，效果就更明顯，啲喪屍群就好似紅海咁散開，有啲避唔切嘅喪屍就瞓埋係地下抽搐。
於是，我地就咁長驅直進直衝去電視台，我係班學生中間望住佢對住啲喪屍尖叫咆吼，扯住條繩衝下衝下個下，我真係有一刻誤以為自己放緊一群癲狗。
不過我好快打消我腦入面呢個想法，佢地係拯救地球嘅英雄至岩。因為冇咩阻礙，我地好快就到咗電視台，行埋入廠。
雖然我未用過啲設備，但我見到大大隻「On Air」嘅紅色制，唔使諗我都知禁呢個制就可以直播。我禁咗呢個制，然後帶住班港孩係鏡頭面前。
我開始發言：「請全部喪屍注意，全球市民注意，我已經發現咗對付喪屍嘅方法。所以我依家要係呢度同地球所有嘅喪屍做一個交易，就係依家我要將地球嘅地域一分為二，我地人類同埋你地喪屍各佔一半，你地係北半球生活，我地係南半球生活，未來嘅日子我地相互都唔可以踏入對方嘅區域。你地同意的話就係12小時內遷移。但其實你地冇得簡，因為如果你地唔聽我嘅指示，我就放佢地出嚟，煩鳩死曬你地，到時你地連命都冇。」
我示意班小朋友示範下，佢地好配合咁係鏡頭面前尖叫同喊。因為呢個全港直播，所以隨後傳來應該全港大部份喪屍嘅哀吼。而我相信我地嘅直播好快就會俾其他國家發現，轉播，到時全個地球就真正安全啦！----三十年後。作為神秘嘅國際秘密守護組織最高話事人嘅我，坐緊係會議室同世界各地嘅員工開會。
「消息發佈同埋維持成點呀？」我問。
一個美國人對我講：「效果非常好！我地一路持續發散出嘅消息，令全球人類都繼續相信30年前喪屍爆發得到解決嘅原因係當時小朋友嘅強大力量，冇人知道係啲喪屍怕俾啲港孩『發爛咋』煩鳩死。」
我露出滿意嘅笑容，再問：「Well down！宣傳部呢？今年有咩新策略？」




一個日本人講：「有見及好多出面嘅人為呢班港孩命名為『神聖童子軍16人』，南北半球之界則被稱為『死亡地平線』，所以上下半年會各推出一部以此為名嘅電影。」
「好好！我中意呢兩個名，夠曬型！證人保護組呢？」
一個香港人翻翻手中嘅資料，個個就係豪仔，講：「全部生活工作正常，佢地都冇透露當年機密嘅行為。會持續監察佢地嘅朋友同家人，不過依家都物事人非，佢地個個都變咗做中年發福嘅呀叔同埋呀嬸，就算佢地依家走出去同人講自己係『神聖童子軍16人』之一，靠『發爛咋』救咗地球，我諗都唔會有人信。」豪仔講完之後露出一個意味深長嘅笑容。我聽完淺笑，低頭搖搖頭，然後抬頭對會議室入面所有人講：
「係喪屍爆發後嘅呢三十年，教育水平不停進步，我地已經再發展唔出『港孩』，所以為咗全球人類嘅安全，我地『國際秘密守護組織』嘅工作十分重要，我地要好好守護呢個秘密。
一、係為咗避免引起公眾恐慌。
二、係為咗避免洩漏咗風聲去喪屍到，引起再一次大規模犧牲。
所以以後就要靠曬大家通力合作啦！」

#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/