喪"師"2: 6-行出呢個課室之後，最危險個個係我

哈哈！
我係咪要成為拯救地球嘅英雄啦！事不宜遲，我要即刻開始準備我嘅英雄大計。
唔係！係拯救地球大計至岩！
我打算帶班學生衝出去，然後去電台到做直播，睇下可唔可以同啲喪屍交涉。
呢件事一定要進行夠快：
一：我地唔夠糧食，再等，班小朋友嘅精神同埋體力都會消耗曬，咁佢地就冇力氣「發爛咋」。
二：我地越快令出面嘅狀況得到控制，就可以救得越多人。
三：暫時我睇返電力供應冇俾喪屍入侵所影響，但到咗聽日就唔一定啦！再等，可能到時我地想做直播都做唔到。於是我先分咗饉餘嘅食物俾班細路，等佢地補充能量。然後我就自己係到做工具，我剪咗16條（扣咗我，課室入面有16個小朋友）10米長嘅繩出嚟，再將每條繩嘅未端綁係一個呼啦圈到。之後我就開始向全班學生講我嘅安排：
「大家注意，注意。依家出面出現咗一班唔俾小朋友放學，又要小朋友做好多功課嘅壞人。為咗大家著想，我諗咗個方法幫大家，成功之後，令大家可以放學返屋企又唔使做功課。（我講到呢到，已經見到班小朋友勁專心，始終呢啲都係佢地好在意嘅事）你地可唔可以聽我嘅指示，互相合作？」
所有小朋友都點頭或者應我好、ok。




見到咁，我就繼續講落去：
「陣間我會係你地腰上綁一條繩（我舉起手中嘅呼啦圈），呢個嘅作用係防止我地走散。出面班人怕我地團結一致，一旦你地任何一個人走散，佢地就會捉你返去，逼你地日日，分分，秒秒咁做功課，唔俾你玩，唔俾你食。（我一面講，表情亦變得越惡狠）。所以大家要聚埋一齊，聽我嘅指示去邊就去邊，得唔得？我地嘅目的地係電台中心。陣間你地只需要尖叫、喊住咁對住出面啲人鬧，或者向佢地表達你嘅不滿就得啦！只要我地成班聚埋一齊，佢地就傷害唔到我地。」之後我就幫佢地逐個綁條繩係腰到，條繩話就話係用嚟保護大家。
怕大家走散係真嘅，但條繩更重要嘅係用嚟保護我嘅。
其實，依家行出呢個課室之後，最危險個個係我。喪屍怕港孩「發爛咋」啫！我又唔係港孩，又唔識「發爛咋」，陣間班細路一個唔覺意跑遠咗，咁我咪俾啲喪屍咬死。
咁梗係唔得啦，所以我就負責拎住個呼啦圈，帶住班細路行。出去之前，我覺得就咁叫佢地「發爛咋」都係唔夠，因為班入面唔係個個都好似明仔、晴晴、小可同埋小森咁「發爛咋」發到爐火純青。所以我先逐個同佢地「輔導」下，勾起佢地得唔到滿足嘅願望，又或者一啲大人激到佢地好嬲好嬲，嬲到仆街嘅事。當我見到班細路眼中透住就嚟滿出嘅怒火同埋不滿，我就知道，係時候啦！
出發！



#有興趣可讚黑柴Facebookhttps://www.facebook.com/%E9%BB%91%E6%9F%B4-879053098899020/