《無啦啦多左幾個家姐同細妹Season 3》: 感受
人地成日話暴風雨既前夕總係特別平靜，我而家終於體會到呢句說話既真締。
一改平日既風格，飯桌上無人講野，大家各有各食，除左大家姐擺出一副天真爛漫既笑容，與世無爭既姿態之外，其他人都面無表情，默默食自己既飯。
但咁平靜既環境反而令我更加驚，感覺如坐針氈，明明一大堆佳餚係我面前但我都無乜胃口，只係扒左兩啖飯就放低左碗筷，唔敢再有過多既舉動，怕刺激到枱面上其他既野獸。
就算阿月不斷向我報以求助既眼神，我都無辦法亦唔敢出手相助，因為氣氛實在太可怕。
唉…開始真係有D後悔帶左佢黎，好似推左佢去死咁…我都無諗過會變成咁。
黎左呢個屋企咁耐，我都從未試過咁驚，驚到背脊不斷出汗。
點解大家姐仲可以咁開心？唔通佢唔知道會變成六國大封殺咩？定係其實佢想見到世界大戰？
真係好彩而家Anna唔係香港，如果唔係我都幾肯定佢會拎劈阿月，之後就係我。
呀屌，仲要小心Ellen，佢癲起上黎真係估唔到佢會做D乜。
不過最後居然咩事都無發生，大家平平安安食完呢餐飯，總算鬆一口氣。
好啦，咁都係時候帶佢去二家姐間房睇…
正當我準備動身既時候，Sarah居然先我一步起身，嚇到我郁都唔敢郁，打算先睇下佢有咩行動。
點知佢居然一直向廚房既方向行，最後仲入埋去，消先係我視線之中。頭先先抹走既汗立刻猶如泉湧，唔洗一陣就已經成頭濕哂。
無諗過最後居然會係Sarah出手，我而家既心情就好似《機動戰士高達ZZ》Axis戰入面古利明比呂露卡暗算一樣咁複雜，偏偏係你！？
睇黎都係要阻止佢架啦，唔通比佢係度搞出人命，令屋企變成兇宅咩。
但Sarah再次出現既時候，卻無拎住刀，而係拎住幾件精美既蛋糕。
呀係喎，頭先佢已經話左今日有甜品，太緊張唔記得左添…
原來有甜品，我都係坐返低先…
唔只我一個有咁既反應，就連阿月都有相同既反應，睇黎佢都係做好左會被人斬開九碌既覺悟先坐低食呢餐飯。
不過結果同我地兩個既推測完全相反，咁先令人大吃一驚。
Sarah：「唔洗咁驚，個蛋糕無毒架可以放心食。」
嘩…呢句野聽落超級有骨，擺明就係講緊當初阿月用神經毒劑對付我既事。
阿月亦都無反駁，只係默默咁點左一下頭，接過Sarah遞俾佢既蛋糕。
同頭先既情況稍有不同，大家係享用甜品既時候都露出失蹤多時既笑容，但就仍然默不作聲。
大家姐：「嗚哇!~呢件蛋糕真係超超超級好食呀！Sarah同Yui你地整蛋糕既手勢真係愈來愈叻呀！」
嗯，大家姐係例外，佢仲係咁Hyper，好似咩都唔關佢事咁。
Sarah：「呢個蛋糕我係打算學黎等有朝一日可以整比二家姐食。」
嘶…Sarah今日戰意真係極高，好似下下都想隊死阿月咁。
Sarah：「你覺得件蛋糕好唔好食？」
無錯，正如你所想既一樣，被問既人唔係我亦唔係邊個，正正就係阿月。
阿月：「啊…好食啊檸檬味好香又唔會太甜，岩岩好，好好食。」
Sarah：「咁就好，可唔可以幫我拎一件比二家姐？」
比二家姐…Sarah你…
Sarah：「因為我真係好想比二家姐試下我同Yui努力整出黎既蛋糕…可唔可以幫我呢個忙？」
阿月並無即刻回答，而係沉思左一陣，但似乎好快就做好決定，抬頭望住Sarah。
月：「我明白喇，交俾我。」
Sarah：「多謝你…仲有…對唔住。」
對唔住？我係咪聽錯？做乜Sarah要同阿月講對唔住？唔係應該掉返轉架咩？
阿月聽到都傻左一傻唔識反應，只係識繼續望住Sarah，啞口無言。
我諗佢同我一樣唔明白點解Sarah要向自己道歉，又或者係自己想道歉但被Sarah搶先而不知所措。
Sarah：「之前聽到係你害到阿明要訓醫院個陣我真係好憎你地，好想你地有報應，不過頭先聽完大家姐講你地既事先知道原來你地經歷左咁多野，之前過得咁辛苦，但我居然心胸咁狹窄想自己既屋企人…」
Sarah講講下仲自己喊左出黎，嚇到我即刻起身行去抱住佢幫掃背安慰佢。
我：「傻豬，唔係你既錯，當時既情況係邊個都會有相同反應，更何況你個陣都唔知阿月佢地既身份，你又何必咁自責？」
講到呢度，我先意識到情況不對，馬上扭頭望下其他人既神情，果然如我所料，個個全部都頭dup dup，除左大家姐托住頭面帶微笑望住我係度食花生。
哎…你地幾個…
我：「喂你地唔好咁啦…嚇親人啦…」
「其實要道歉既人係我先岩，同你地唔同，我係明知佢係家姐既屋企人我都仲要去傷害佢，仲只係因為一D微不足道又低能既諗法而搞出咁多野，最後連累左咁多人…」
就係我繼續安撫Sarah既時候，背後忽然傳黎阿月把聲。
月：「明知佢係家姐好重視既人我都仲係要咁做，我呢個人真係…」
喂喂喂，做乜連你都喊埋一份架，我唔方便安慰你架喎。
幸好，係呢個時候一直係旁邊食花生既大家姐終於都出手，做同我一樣既事，不過就係對阿月做。
女人係水造既生物，呢句說話真係無錯。
不過咁總算係一個Good Ending吖？Sarah佢地並無對阿月抱有敵意，反而係歉意更大，好容易就接受左佢。
原本我仲打算由我親自帶佢去睇二家姐間房，而家都唔洗啦，Sarah佢地爭住做，介紹二家姐間房介紹得幾雀躍。
但離別既時刻總係特別快來臨，好快阿月就要返去，仲帶住Sarah為二家姐準備既蛋糕。
臨走前，大家都企係門口寒喧。
阿月：「我會好好將呢件蛋糕交到家姐手上俾佢試下架啦。」
Sarah：「咁就拜託你啦，如果方便既話歡迎你再黎玩呀，我地可以一齊整蛋糕~」
唉，真係無佢收，又係蛋糕。
大家姐：「好啦都夜架啦有乜下次再傾啦，你地幾個返入去先啦，我送阿月妹妹返去就得。」
佢地幾個聽到大家姐既說話紛紛化身乖巧既小狗，一個一個咁返入屋內，由我守尾門。
但我並無跟大隊返入屋，因為我感覺到阿月佢仲有野想講，所以我繼績留低望住佢。
月：「你…有一班好好既屋企人，大家都好溫柔好善良。」
嗱我就估到會係咁，我真係聰明。
我：「咩我有一班好好既屋企人，你都係其中一分子，佢地都係你屋企人。」
佢無再答我，只係點點頭，微笑左一下就登上左大家姐準備既車離開。
呼…事情總算向好既方向發展？
真係慶幸當初無報警拉佢同阿日，如果唔係事情都唔知會發展成點。
至少二家姐一定會好唔開心先…