《無啦啦多左幾個家姐同細妹Season 3》: 來訪

 哎…我到底做左乜野呀…點解會一時心血來潮話帶佢返屋企坐下架，如果Ellen Sarah見到的話一定又不斷哦我。
 
唉算啦反正都黎到門口，唔通而家先縮沙叫人返去咁on9咩…
 
我：「好啦唔好淨企係度咁on居啦，我地入去啦。」
 
月：「我諗落都係唔係幾好…不如都係算啦…」
 
我：「傻啦有咩好怕喎，反正都黎到門口啦，唔差在入埋去，係咪先。」
 




Sorry其實我怕到仆街，屋企班女王唔係人咁品，我無辦法想像如果佢地見到我帶阿月返黎會係咩反應。
 
好彩既係Anna而家唔係香港，如果俾佢見到佢肯定拎刀斬我九條街都似。
 
我戰戰競競咁打開屋企既大門，好似自己做錯左事，其實根本就無，都唔知自己驚乜春。
 
但開到門，我都係呆左一呆，因為Yui企正係玄關位等緊我地，。
 
Yui：「你地返黎啦？晚飯已經準備好啦，隨時可以食架啦。」
 




咩事呀…點解佢見到阿月一D都唔surprise，好似知道我會同阿月一齊返黎咁既？
 
阿月同我一樣唔知應該點俾反應，我地只係呆呆望住對方，之後就好似寵物咁係Yui既帶領下慢慢行入飯廳。
 
入到飯廳映入我眼裏既畫面更加衝擊到我既心緒，其餘幾位女王居然全部都坐哂係度望住我地三個，仲要個個都臉無表情。
 
發生咩事…唔通佢地知道左我會帶埋阿月返黎？
 
就係我想開口問下到底發生咩事既時候，忽然有一個黑影係我身旁閃過，一下捉住我兩邊膊頭，仲對我後頸吹氣，嚇到我彈起，即刻望向後面睇下邊個咁大整蠱。
 




不過其實唔洗睇我都估到係邊個，會對我做咁既野既人係呢個屋企就只有佢。
 
一轉身果然就見到大家姐，佢仲笑到四萬咁口，好似執到錢咁。
 
啊唔係，呢家人執到錢係唔識笑，因為佢地根本唔當係一回事。
 
咁睇黎應該係晨哥話左比大家姐知，之後大家姐再話返比Sarah佢地知啦。
 
咁都好既，預先話左比佢地知可以打個底，佢地起碼有個心理準備，唔會太過surprise。
 
不過…而家咁樣好似未免太過鎮定喇掛…？咁樣反而令我更加不安…
 
點都好啦，都係先介紹左阿月比佢地識先啦，我印象中佢地今次係第一次見阿月？
 
我：「eh…佢就係之前我同你地提起過既阿月，亦即係二家姐既…」




 
Sarah：「唔洗介紹啦阿明，大家姐頭先已經講哂比我地知。」
 
「過黎食飯先啦，大家都等緊你地返黎，今日蘭姨煮左好多好餸，甜品仲有我同Yui整既蛋糕。」
 
發生咩事…做乜氣氛會咁恐怖，Sarah比我想象中冷靜好多，甚至冷靜得有D恐怖…
 
一陣間會唔會出事架…