《無啦啦多左幾個家姐同細妹Season 3》: 坦白
係Ellen既指導之下，我地鋪頭開始左好多唔同既嘗試，開Facebook page，落廣告同直播，甚至仲係唔同係Facebook group開post曲線宣傳，嘗試增加曝光度。
係多管齊下既嘗試之下，經過一個月我地亦終於收到想要既結果，人流開始增加，生意亦漸漸變好。
雖然唔知可唔可以咁講，但我自己就覺得鋪頭終於上左軌道，可以稍稍鬆一口氣。
跟著落黎就係要諗點樣守住呢股勢頭，聽人講守業比創業更難，真係諗起都有D驚。
唔知會唔會好似D電視劇咁會有其他同行追撃我地呢？玩減價戰呢d招數睇電視入面成日見，我地會唔會會咁樣比人追住黎打呢？
唉永遠得返自己既時候就會亂咁諗野，真係想打自己一巴，奈何有客係度唔敢嚇親人。
無錯，今日咁啱大家都有事，得返我自己一個睇鋪。
唔…？Sarah又話今日會上黎陪我既，都呢個鐘數啦喎仲未見人既？會唔會有咩事架？
就係我拎出電話準備打比Sarah既時候，大門就被打開了。
起初我以為開門既人就係Sarah於是就放低電話行去迎接佢，但當我見到黎既人個陣，卻發現對方另有其人。
其實唔係Sarah都唔係咩令人驚訝既事，畢竟我地打開門口做生意，有客人黎都係正常不過，但我真係諗都無諗過呢兩位會黎。
我指既「呢兩位」，就係係我幾次關鍵時刻間接為我出謀獻策既魯路修同埋佢女朋友，我記得好似係叫…Cherry?
點解佢地會識走上黎？係睇左我地既廣告定係晨哥介紹佢地黎呢？
點都好啦，而家人地係客人，要好好招呼佢地先得，反正佢地似乎都唔認得我，唔洗咁緊張啦。
同一時間，大門再一次被打開，今次終於係Sarah而且仲有Yui。
佢哋打開大門既一刻起初都好開心，但係發現到魯路修同Cherry係度馬上收起笑容，轉至掛上一副驚訝，甚至用手掩住自己個口。
雖然係有d誇張，但都可以理解既，畢竟我自己都嚇左一跳。
但我都係希望唔好嚇到佢地兩個，所以我馬上就拉左呢兩個已經嚇傻左既人返收銀處，叫佢地冷靜D唔好嚇到人，當佢地係普通客就可以，本來人地就唔係咩明星，只係我地一個恩人啫。
聽到我咁解釋既Sarah同Yui開始冷靜落黎，係我既安排下坐係一邊做自己野。
至於我，就企係一邊，默默關注事態發展。
其實又可以有乜發展吖，人地只不過係行街，佢地又唔認得我，咁緊張做乜。
但係諗起佢地之間既經歷，最後仲可以咁幸福，真係好替佢地開心。
不過同時我又記起當時自己有諗過如果自己遇上呢種情況會係點，估唔到而家真係發生左，好彩時間比較短，只係兩年我應該捱得過既。
唔係應該，係一定會捱過先岩。
魯路修：「哇好平呀呢盒，想要！」
Cherry：「吓呢款你有好多隻啦wor，我記得有紅色又有綠色，而家又買？再係咁屋企好快無哂位架啦，真係要買？」
佢哋既對話成功吸引到我，亦幫我拉返自己去現實，我隨即望左過去，想話睇下佢地到底講緊乜。
一望之下發現原來佢地講緊既係我地為左拉客而特價既RG Unicorn，的確係幾抵架。
岩啦買啦，幫趁下細佬我啦搵食艱難啦。
可惜既係，魯路修聽完Cherry既一席話之後似乎諗通左，放番低盒模型，好失落咁話要去廁所。
哈哈…睇黎佢好「尊重」Cherry…唔？
佢一離開鋪頭，仲企係貨架度既Cherry就馬上招手叫我過去。
我：「你好，有乜可以幫到你？」
Cherry：「麻煩你幫我快D包起佢吖，我想俾個驚喜佢，唔該你吖。」
佢一邊講一邊拎出現金遞比我，而我亦十分識趣，迅速接過錢同盒模型，直奔收銀處。
好彩呢一個月黎既訓練令自己既手法變得純熟，成功趕係魯路修返黎之前包好盒模型，交到去Cherry手上，等佢可以收埋盒野。
Cherry：「唔該哂你吖，個傻佬返到屋企發現盒野一定好開心架啫。」
我：「你真係一個好女朋友，你男朋友真係幸福。」
Cherry：「哈哈，我地結左婚架啦，見佢最近做野好辛苦所以咪買盒模型獎勵下佢囉~不過講開又講，你好似好熟口面…我地係咪係邊度見過？」
呃…死喇呢鋪，佢認得我？點算好？
Cherry：「嘛，唔想講都無乜所謂既，我諗你都係晨哥既朋友，如果唔係佢都唔會專登叫我地黎支持下啦？點都好啦，創業係好辛苦但要堅持住呀。」
原來真係因為晨哥，雖然佢脾氣係好奇怪，但都應該要多謝佢帶左生意比我。
係呢個時候魯路修亦推開門重新返入黎，繼續遊覽我地既鋪頭，至於Cherry就向我點點頭，默默跟住魯路修陪佢一齊行。
最後魯路修仍然念念不忘咁望住貨架上既RG Unicorn，如果佢知道真相既話一定好開心。
至少如果換轉係我的話，我一定會開心到訓唔著。
就係呢一pair離開無耐，一直坐係我後面既Sarah同Yui終於動身，行到我旁邊。
Sarah：「佢地呢一對真係好好呢~真係羨煞旁人。」
我：「嗯，我都係咁諗。話時話點解你地咁遲既？」
Sarah：「啊…因為Daddy有D野想問我地…所以遲左，不過我地有準備埋野食架，快D黎食啦。」
嗯…Sarah講到岩，我諗應該都係有關二家姐既事啦，Uncle想知都好正常既。
我都係時候準備去搵二家姐…不過又係要去邊度搵…應該要從大家姐個邊入手…？
我一邊思考要係邊度入手一邊食呢兩位美女為我準備既佳餚，美人配美食，簡直一絕。
但唔知點解，自己始終未能感到喜悅。
Yui：「係wor阿明你之前話要同你班朋友交代返自己真正身份既事，結果最後點？」
啊…呢排實在太忙搞到無左回事添…點算好呢應該處理邊一樣先好D？
我苦苦思量左好耐，最後決定繼續將二家姐既事放埋一邊，先向阿Ray佢地坦白呢一切。
會有咁既決定係因為考慮到好多野，最重要係我認為大家一齊搞生意信任係非常重要，如果無信任的話大家好難合作。
係無錯我已經呃左佢地，但我希望係未造成任何壞影響之前自己先坦白並好好道歉，希望用自己既誠意解決呢一切。
係做好決定之後，我就拎出自己既電話打左一個訊息，send哂比佢地幾個。
「有件事想同大家講，不如約一日大家一齊出黎？」