《無啦啦多左幾個家姐同細妹Season 3》: 笑容
因為Sarah既反應比左好大既信心我，所以我係第日就決定將同樣既說話再講一次比Ellen佢地聽。
而佢地既反應亦同Sarah一樣，亦即係無乜反應。
Ellie甚至即刻開始分析到底係咩一回事，總知就係大家都覺得唔關二家姐事，仲叫我唔好太擔心，話二家姐唔係咁既人。
當然我都相信二家姐唔係咁既人，但正因為咁我先咁擔心二家姐。
而且更令我在意既係之前日月話我令二家姐痛苦，所以先會有佢地既出現。
亦即係話歸根究底係我，又係我既問題引起呢一切，最後仲害左自己。
唉，又係呢個套路，不過自己已經唔係幾年前個個自己，唔可以咁易崩潰，自己身邊仲有好多人。
我仲應承過Anna，一定要做出一番成績，而且咁亦可以算係對二家姐既一番報答，多謝佢咁多年黎咁照顧我同幫我。
我會搵二家姐同佢好好傾一次，但會係安頓好一切之後先。
畢竟我仲背負住責任，唔可以再咁任性，拋低一班咁信任我既朋友只顧自己既事。
鋪頭好快就要開張，對我同我既朋友都係好重要既事，應該話呢一刻無野比呢件事更重要，而且二家姐有心避開我地，要搵到佢都唔係一時三刻可以做到。
所以…係囉…暫時就係咁先啦…
再過左幾日，就黎到鋪頭開張既大日子，亦都係我地幾個事隔一排重新聚頭既日子。
唔知大家係咪都意識到今日係比較重要既日子，全部人既衣著都比平時更加正經，雖然未去到著西裝咁正式。
可惜既係由於我地第一次自己創業並未累積到人脈，加上係樓上鋪既關係就算係第一日開張都好，都係無乜人流。
黎既大多都係大家既朋友，另外公司亦有派人黎祝賀，除此之外就只有小貓三四隻。
不過呢D野急唔黎既，人氣既野真係要慢慢經營積聚出黎，唯有繼續努力啦。
呢番說話我都有同阿輝佢地講，佢地都同意，我諗就算我唔講佢地都明白呢個道理，因為我見大家都無難睇既面色，例如黑面，頹樣之類。
反正都無客人，不如做下自己野打發時間充實下，靚靚仔仔砌好幾隻模型放係display櫃吸引下客人仲好。
於是係我既提議下，大家就開始係鋪頭既各個角落做自己野，有既噴油，有既油戰棋亦有人選擇砌模型，大家自成一角。
咁樣過左唔知幾耐，我地終於迎來下一位客人，門被打開既瞬間我好明顯feel到全場人都馬上望左過去，睇黎大家都好緊張。
不過好可惜，情況同頭先一樣，都係我地既熟人，應該話我既熟人比較貼切。
黎既人係Ellen，奇怪既係得佢一個，Ellie唔係佢身邊，更唔見Sarah佢地。
黎既係自己既女朋友，我當然唔可以就咁坐係度做自己野啦，馬上就行埋去招呼佢。
但佢並無即刻理我，而係周圍望下先，似乎係想觀察下我地既情況。
Ellen：「唔…比我想像中冷清喎…」
我：「係呀，不過咁都無辦法啦，萬事總係起頭難，但堅持落去先會見到希望架嘛。」
Ellen：「嗯，有呢種心態非常好吖，但係只靠心態係唔夠架都需要D技巧輔助，咁先可以快D成功，你地有無開Facebook page之類？」
Facebook page…?係喎點解我無諗過？而家係資訊科技既世代，生意要成功就應該由從方面著手。
Ellen：「睇你個樣肯定係無架啦，開返個啦，搵個醒目D既去打理，upload多D product相，有需要就用D錢落廣告去俾多D人見到，咁樣生意就應該可以快D上軌道啦。」
我：「係既Ellen大人，放心啦我一定會努力既。」
Ellen並無即刻答我，而係用一個好難形容既眼神望住我，帶兩分憂怨？
我當下即刻有D驚，擔心係咪自己又做錯左D乜，但係都係得一刻，因為下一秒佢就拖起我隻手。
Ellen：「唔好太勉強自己呀…如果我地幾個有乜可以幫到手就即管開聲啦，我一定第一時間仆黎幫你架知唔知？」
妖，係我班friend面前講呢D，我會感動架嘛，喊左出黎既話你話幾失禮呢。
不過好老實講，我無預計到Ellen居然會講呢D野，係我記憶中佢總係勇往直前，帶領其他人前行既堅強女仔，同鐘意默默係背後支持人既Ellie形成一個強烈對比。
呼…睇黎大家都有所改變呢。
Ellen：「嘩！個盒咩黎架！！好得意呀！！！」
就係我仲感嘆緊Ellen既改變既時候佢又回歸到我熟悉既個個Ellen，唔知見到D乜著哂迷，一下fing甩我隻手跑向貨架，拎起一盒野之後又跑返過黎我面前。
哦…？PetitGguy？啊又真係幾得意既，女仔會鐘意都唔出奇。
見佢咁愛不䆁手，就買比佢啦。
模型當然就唔係買完就算啦，要好好砌埋佢先得架嘛。
所以我就決定送佛送到西，親自出身陪Ellen一齊砌呢隻PetitGguy。
雖然教女朋友砌模型係一件好麻煩既事，但原來當中都有樂趣，又可以增進感情，都唔差吖。
最緊要係咩？咪就係見到佢個開心樣。見到佢望住砌好左既PetitGguy開心到見牙唔見眼個樣，我自己不禁都開心埋一份，而且仲有佢個句甜美既多謝。
咁就已經夠喇，係咪先。